1Mos. 6 - BUKO SIPUNENAN

Katai sirimanua

¹ Kele aramaigi sirimanua samba aramakakra ka sangaliot polak, putu'tunangan mata tatogatda tainanalep,

² iageti itcorangan tatogat Taikamanua sangamberi taiokko nenda malainge tubutda. Lepa talimouakerangan taiokko siobara nenda.

³ Lepa kuanangan si Tuhan, “Ta'kuobaake rapurimanua sirimanua teret buru-buru; sia sirimanua simasusuet le', bui ta'matei. Barania kineiget ruratra ta'isasabau sangotu ruapulu ngarura.”

⁴ Siburu nenda, samba leuet lepat nenda, ai sirimanua siabeu tubu ka polak. Sia nenda muntogat taiokkot sirimanua siputatalimou pasamba tatogat Taikamanua. Sirimanua siabeu tubu nenda iate simagege samba siabeu tiboitubu kateteret siburu.

⁵ Si Tuhan masitco kopet katainia sirimanua ka polak; sangamberi patuatra sarat makatai.

⁶ Ai oleian le bagania aigalai sia samba ai kudduake sia ka polak. Bulat mabesi le patuatnia,

⁷ pat kuanangan, “Kususubuake le sirimanua sigalaiKu nenda, samba leu sangamberi uma samba tarimeu bagei, aipoi aioleian bagakKu Aku galai sia.”

⁸ Tapoi katubut Noak maangka le bagat Tuhan.

Tiboi tubut Noak

⁹ Nene te tiboi tubut Noak. Ai telu tatogania simanteu iate si Sem, Jafet samba Ham.

¹⁰ Si Noak ta'aigalai sele, samba sarania le sirimanua simaroipo kateterenia. Ipurimanua sipaalei pasamba Taikamanua le.

¹¹ Tapoi sirimanua sabagei makatai le kamatat Taikamanua, samba tugrut tubu kaipa-kaipa ai.

¹² Taikamanua masiitco polak nenda samba sarat masiitco katai le, aipoi sangamberi sirimanua purimanuaiatnia makatai le.

¹³ Lepa kuanangan Taikamanua kai Noak, “Akuteuakean masikappluake purimanuaiat senen sirimanua. Kususubuake le geti sia pasamba polak, kalulut polak asutnan putugurat tubutra.

¹⁴ Galai le sara kinapat addeatnu sibara ka loina simaron; galai le bilik kabagania, samba lakkenungan rubreiat kabaga samba kaujania pasamba ter.

¹⁵ Kinapat nenda nantania buita sangotu telupulutelu eto, lionia lima pulueto, samba buaknia telu pulueto.

¹⁶ Galai le tutut kinapat nenda, samba galainungan paoggangannia sangeto barania ka tutunia samba karupinia. Samba galai le kinapat nenda telunga uddutat, samba kau le sara matat baliu ka be'benia.

¹⁷ Kubabaraake te geti eba addeat masisubuake senen sipungogoingoi ka polak. Senengamata ka polak matei le geti,

¹⁸ tapoi pasamba ekeu Kugalai le palelengan. Tuguru le kabagat kinapat nenda pasamba sinanalepnu, tatogam samba sinanalepra.

¹⁹ Ambit le kabagat kinapat nenda sangamuneng simanteu samba sangamuneng sinanalep kasenengamata uma' samba tarimeu pabagei-bagei,

²⁰ bule bui ramasubu.

²¹ Ambit le senengamata komennu samba tarimeu nenda.”

²² Igalaiake le si Noak sangamberi siparentaakenen Taikamanua katubunia.