1Mos. 50 - BUKO SIPUNENAN

¹ Rappoakenangan si Josep tubunia ka ukkuinia pasamba musou samba sigguknangan ukkuinia.

² Lepa parentaakenangan si Josep siagai masikelaake tubu simamatei addeat pusinginan tubut Jakob.

³ Pusinginan nenda ujuna epat pulu ngagogoi, teteret tupakei addeat pusinginan tubu simamatei. Tai Misir muleppei goni rubeiat ka Jakob, ujunia pitu pulu ngagogoi.

⁴ Kele ailepa teteret puleppei goni, kuanangan si Josep sipugagalai kai rimata, “Segeakekam tiboiet nene katubut rimata,

⁵ ‘Kateteret ukkuiku amalegrengan imatei, koniakenangan aku mupalelengan katubunia, kurateiakenia karatei sinarekngakenennia ka laggai Kanaan. Lulut nenda obaake aku kuei masirateiake ukkuiku. Lepa nenda toili aku.’ ”

⁶ Lepa kuanangan rimata, “Kenannan masirateiake ukkuinu kele sipinaleleknu katubunia.”

⁷ Lepa ei si Josep masirateiake ukkuinia. Sangamberi sipugagalai kai rimata, sikebbukat uma purimataat samba sangamberi siabeu ka Misir, mei simakere pasamba si Josep.

⁸ Sikalalepnia, sasarainania, samba sasarainan ukkuinia sabagei mei leuet. Sarat tatoga sigoiso samba terimeura tukaddiuake ka kupkumen Gosyen.

⁹ Pasukan sipukekereta samba sipukukuro le moi, pat patunanda nenda bulat mananta.

¹⁰ Kele arasege ka kudduat pasibobokat gandum ka Goren-Haatad, ka isit kabelaiat sulu bagat oinan Jordan, pugerirangan simakope reureu baga samba nganga simagok. Baraakenangan si Josep punen puleppei goni, pitu ngagogoi ujunia.

¹¹ Kele araitco sipulaggai ka Kanaan pupuleppet goni ka Goren-Haatad nenda, kuarangan, “Bulat mangelei baga punen puleppei goni sirimanua ka Misir nenda!” Nenda te lulunia kudduat nenda tuoniake Abel-Mizraim.

¹² Kise' te ragalaiake tatogat Jakob aponia sitoneakenen Jakob katubudra.

¹³ Ambitrangan tubut Jakob simamatei ka Kanaan samba rateiakerangannia kabagat ngaliu Makhpela, ka isit kabelaiat sulu Mamre, ka mone sinakit Abraham kai Efron tai Het nenda, addeat ibailiuake purateiat.

¹⁴ Lepat airateiake ukkuinia si Josep, toilinia ka Misir pasamba sasarainania samba sangamberi sirimanua sipasitututnia masirateiake ukkuinia nenda.

Si Josep masipusuibi bagatda sasarainania

¹⁵ Lepat ailango ukkuira, kuarangan sakebbut Josep, “Kipa ke ioba si Josep isiliake katai'ta siburu?”

¹⁶ Lulut nenda kaurangan patonekat nene kai Josep, “Kepei matei ukkuita,

¹⁷ koiniakenangan kai masikua katubum kele kise, “Appeake sele sigalaira sakebbunu siburu katubum.” Oto, sibailiu pagugulet Taikamanua panindogiet ukkuita, kutiddou kai, appeake sele sigalaimai.” Pusounangan si Josep kateteret aisilo patonekat nenda.

¹⁸ Lepa oi sasarainania nenda murappo kamatania samba masikua, “Kai nene paguguletnu.”

¹⁹ Tapoi kuanangan si Josep katubutda, “Bui numaloto; aipoi ta'momoi kugalaiake kele galajet Taikamanua.

²⁰ Apakerean bagamui masigalai katai katubuku, tapoi Taikamanua masisiliake katai nenda ibailiu puerukat, bule sipuaaili siburu nenda maigi sirimanua sipuririmanua kineiget moi tupaarau.

²¹ Bui imakarat bagam. Kususunnake le geti pakeietmui samba tatogamui.” Kise te aipusuibi bagatra si Josep pasamba titiboat simamoile, pat mangeleinangan bagatra.

Kamateiat Josep

²² Si Josep mariuriu le ikuddu ka Misir pasamba saeppunia; aipurimanua teret sangotu pulu ngarura.

²³ Ai itco peile si Josep punuteteu Efraim. Aiaili peile masipuuku tatogat Makhir, iete punuteteu Manasye, sibailiu bakkat togania.

²⁴ Kuanangan si Josep katubut sasarainania, “Kamateiatku amalegrengan, tapoi Taikamanua ipasikeli le geti kam samba ambitnangan bela barania ka laggai nene, ka laggai sipinalelekNia pasamba suppa kai Abraham, Ishak samba Jakob.”

²⁵ Lepa koinakenangan sasarainania si Josep musuppa, kuanangan, “Mupalelengan kam katubuku, ke' iambit kam Taikamanua ka laggai nenda, ambitmuan leu geti tubuku simamatei.”

²⁶ Lepa geti matei si Josep ka Misir, katetert ainia sangotu pulu ngarura. Kaurangan pusinginan tubunia simamatei samba galakngakerangania ka bagat peti simamatei.