1Mos. 49 - BUKO SIPUNENAN

Tiboiet Jakob pasilepa

¹ Lepa geti sogainangan si Jakob tatogania samba kuanangan, “Paruru kam sene, kabe'be'ku. Kupaagaiakenia katubumui aponia nuaili kam ka gogoi sibabara:

² Paruru kam, ale tatogat Jakob, arepmake Israel, ukkuinu.

³ Si Ruben, togakku sibebbukat, ekeu le karonanku, samba puroronku siboiki. Ekeu le simagege katalagat sangamberi togakku.

⁴ Ekeu malabbei ipanganyak kele oinan, bailiu ta'aan sipuboboiki; aipoi amerep ekeu pasamba sinanalepku kabe'be', anupalolit pereman ukkuinu.

⁵ Simeon samba si Lewi sipusasaraina; pamateira tupakei ka pugegege.

⁶ Ta' kutu'tut pukerekat bagatda, samba ta'kututut bagat parurukatda. Aipoi rapamatei kabagat golu le, masitataake geget banteng addeat muangka baga.

⁷ Tutelei le pugogolura, kalulut katainia. Tutelei le oddoi tubutda, kalulut gegenia. Kupasabu le geti sia ka sangalio Israel. Kupasaragai le geti sia katalagat sangamberi bangsa.

⁸ Jehuda, nutakep le geti tetekat saggaknu; raumun le geti ekeu sasarainam samba murappo kamatam.

⁹ Jehuda kelean le singa sibau tubu; imateiake saggaknia, lepa toili karumunnia; purapponangan samba muligri, samba berisara sirimanua simaeme masisuruakenia.

¹⁰ Si Jehuda masiukkaake geti tutura purimataat, reddenannia muparenta te geti teret buru-buru. Tai bangsa raambit le geti upeti, samba murappo sialei purereddet katubunia.

¹¹ Togat kalideinia iapraake ka loina, ka loinat anggur bulat simaeru. Taptapnangan bibiletnia pasamba anggur, anggur kele bonan logau.

¹² Bonan le matania kalulut mulo anggur, bulau sonnia kalulut mulo susu.

¹³ Si Zebulon mukuddu geti kabebet koat; sangamberi kapa' mura'ra' ka bebet buggeinia; pat aili ka Sidon puteterat kupkumennia.

¹⁴ Si Isakhar nenda kelean le kaliddei simaron sipuliligri ka paoggangan karakjak bairanennia.

¹⁵ Itconangan kopet iginia kudduat nenda samba kopet laingenia laggai nenda, iageti pulukuknangan masibairat bairanen, samba ibesiake mugalai sibailiu pagugulet.

¹⁶ Ekeu Dan, nuparenta le geti bangsam, ekeu ibailiu kele suku bagei ka Israel.

¹⁷ Ekeu kele ulou kabebet enungan, ulou simalaga son ka bebet polou, sipasipipila bukkut reret kuro pat bele' sipukukuro.

¹⁸ Oi Tuhan, katuaragat siake'Nu, nenda le kungengena.

¹⁹ Gad, ralalaba le geti ekeu sipararaurau, tapoi bailoknia nuraurau le sia geti.

²⁰ Asyer, komennu simananam simalilimai, nupatarek le geti komen ka tai rimata.

²¹ Naftali, kelean le simasusura sibebela; bulat malainge le tatogania.

²² Josep kele kalidei sibau tubu, kaliddei simaeppak kabebet bubuakat, sipababalau ka igrit leleu.

²³ Saggak masisaggangi simakope, ikukurunia pasamba silogui samba rourou.

²⁴ Tapoi si Josep riuriu le ron parania, riuriu le ron rourounia kalulut paroman Taikamanua simagege, Taikamanuan Jakob, Sijago Israel.

²⁵ Taikamanuan ukkuinu masiropake ekeu; Sipulugege' masisukatake ekeu pasamba urat sibara ka manua samba oinan sibara katei polak. Pasamba toga samba jaui,

²⁶ gandum samba ogo'. Panukanan Taikamanuan ukkuinu sisaliu kayot sangamberi leleu simakope baja'. Bule sangamberi panukanan nenda tugorosot ka utet Josep, samba kabukkut utenia. Nia le kilibet baga katalagat sasarainania.

²⁷ Benjamin kelean le jo'jot leleu simasabbak. Simanseman labanangan ibania. Sinoibo parubeinangannia.”

²⁸ Nenda te sipulurua suku Israel, samba tiboiet sitiboakenen ukkuira kateteret aikau panukanan ka senenda tatogania.

Matei si Jakob samba turateiake

²⁹ Lepa geti kaunangan tiboiet si Jakob ka tatogania: “Taan mauju kutoili kele taikebbukatku. Rateiake kam aku geti kabebera,

³⁰ kabagat ngaliu ka Makhpela, isit kabelaiat sulu Mamre ka laggai Kanaan. Ai sakingan si Abraham ngaliu samba mone ka bebenia sibara kai Efron tai Het addeat ibailiuake ratei.

³¹ Sedda turateiake si Abraham samba si Sara, si Ishak samba si Ribka; samba sedda leuet kurateiake si Lea.

³² Mone samba ngaliu sibabara sedda aisakingan ka tai Het. Rateiake kam aku sedda.”

³³ Lepa aikau tiboiet si Jakob ka tatogania, perep ai perep, lepa mateinia.