1Mos. 48 - BUKO SIPUNENAN

Si Jakob masipanukani si Manasye samba Efraim

¹ Piga pa' ujunia ipaagai kai Josep, kopet besit ukkuinia. Lepa ei nia pasamba rua togania, iate si Manasye samba si Efraim masialiake si Jakob.

² Kele aiarep si Jakob, si Josep amoiannia, paronnangan tubunia, iageti kuddunia kapereman.

³ Kuanangan si Jakob katubut Josep, “Taikamanua sipulugege aipatoilaan tubunia kaku ka Lus, ka laggai Kanaan, samba aipanukaningan aku.”

⁴ Kuanangan katubuku, “Kuake te geti kekeu migi sapunuteteu, bule muntogatnu ibailiu bangsa simigi; Kuake te geti laggai nene kamuntogatnu sibailiu bakkatra teret buru-buru.”

⁵ Riuriuakenangan ipatibo si Jakob, “Josep, karua togam si Efraim samba si Manasye siputu'tu' mata ka Misir ke'pei moi aku sene, kuaddeake le togakku, makere kele si Ruben samba Simeon.

⁶ Ke'bara minca tatogam, ta'an kuaddeake sia sibailu togakku, tapoi tatogam; rasilo le geti ikepakenda sibara kai Efraim samba kai Manasye.

⁷ Akugalaiake pagalaiat nenda addeat ka inam si Rahel. Kabagat puenungananku toili ka Mesopotamia, matei inam ka laggai Kanaan, ta'mareunan barania ka Efrata, samba bulat mareureu bagaku. Rateiakekungannia sedda, ka iggrit enunggan ka Efrata.” (Kineiget Efrata tuagai sibailiu Betlehem.)

⁸ Kele aiitco si Jakob tatogat Josep nenda, parerenangan, “Kasei tatoga nene?”

⁹ Aleginangan si Josep, “Nene te tatogakku siaket Taikamanua katubuku sene, ka Misir.” Kuanangan si Jakob, “Leggreake sia kabebeku bule kusukatnake sia.”

¹⁰ Si Jakob ta'momoi ipaitco simakolou kelulut amabajaan samba matania amaramunnan. Legreakenangan si Josep tatoga nenda kai Jakob, samba lakkaiakenangan samba sigguknangan sia.

¹¹ Lepa kuanangan si Jakob kai Josep, “Ta'an aku suksuk ioi tapaaili pasamba ekeu minca, tapoi kineiget iobaake le Taikamanua kuitco tatogam.”

¹² Lepa geti alanangan sia si Josep ka kupkup Jakob, lepa purapponangan si Josep kamatat ukkuinia.

¹³ Lepa nenda kudduakenangan karua togania ka bebet Jakob, si Efraim sisule nenda ka isit kai katsiu samba si Manasye sikebbukatbaka isit kai kattoet.

¹⁴ Tapoi si Jakob sailoakenangan kabeinia samba galakngakenangan kabeinia ka utet Efraim, beringan kabei sikatsiunia igalakngake ka utet Manasye.

¹⁵ Lepat nenda sukatnakenangan si Josep, kuanangan, “Taikamanua, Ia te Tuhan, panindogiet Abraham samba Ishak, Ia te sipasipalulu aku teret kineiget;

¹⁶ Ia te malaika sipasibebelaake aku ka sangamberi pangoringan. Bule Taikamanua nenda masipanukani tatoga nene. Bule mariuriu murimanua oningku samba onin Abraham samba Ishak kalulut tatoga nene! Bule sia mupunuteteu sia, samba mureddenan simigi ka polak.”

¹⁷ Si Josep ta'ioba masiitco ukkuinia aigalakngake kabei sikattoetnia ka utet Efraim, lepa ukkaakenangan kabei ukkuinia masisiliakenia barania ka utet Efraim ka utet Manasye.

¹⁸ Kuanangan ka ukkuinia, “Bui kisedda, ukkui, nene le toga sikebbukat; galakngake kabei sikattoetnu ka utenia.”

¹⁹ Tapoi ukkuinia aikera le, kuanangan, “Kuagai, togakku, kuagai. Si Manasye leu magegege samba reddenannia leu geti ibailiu bangsa sabeu. Tapoi baginia geti mabeu pei le gegenia bele pei ka sia, samba reddenan baginia nenda ibailiu le sangamberi bangsa sabeu.”

²⁰ Lepa sukatnakenanga si Jakob tatoga nenda ka gogoi nenda, kuanangan, “Rakukua te geti onim tai Israel, ke'bai rasukatnake sirimanua. Rakukua te geti, Bule Taikamanua masikau ekeu kele si Efraim samba si Manasye.” Kise te si Jakob iboikiake si Efraim kai Manasye.

²¹ Lepa kuanangan si Jakob kai Josep, “Kele siitconu, kamateiatku amalegrengan, tapoi iroropmake le kam geti Taikamanua samba ambitnangan kam toili ka laggai taikebbukatmui.

²² Kineiget kuake le' katubum sibailiu puaagainu bele pei le ka katubut sasarainam, sara baruk leleu sialauku pasamba lanjau samba siloguiku ka kabeira tai Amori.”