1Mos. 46 - BUKO SIPUNENAN

Si Jakob mukuddu ka Misir

¹ Patabuninangan sangamberi bibiletnia lepa tutituinia. Sagenia ka Bersyeba pangruatnakenangan buluakenennia ka Taikamanua panindogiet Ishak ukkuinia.

² Kasara pasiitsot mata kateteret sinoibo, kuanangan Taikamanua, “Jakob, Jakob!” Aleginangan, “Oi, Tuhan.”

³ Kuanangan, “Aku te Taikamanua, Taikamanua panindogiet ukkuinu. Bui' numaloto mei ka Misir. Kubabailiuake geti muntogatnu bangsa sabeu sedda.

⁴ Aku le geti masipaalei ekeu ka Misir, samba masiambit muntogatnu toili ka laggai nene. Si Josep ailenia kabe'benu, ke'aiailingan teterem.”

⁵ Lepe tutui si Jakob barania ka Bersyeba. Sangamberi togania masisakaiake ukkuira pasamba toga, sinanalepra ka kereta sikau rimata Misir.

⁶ Sia leuet masiambit tarimeu samba sangamberi pukayoat sigabadra ka Kanaan, lepa tuitui sia ka Misir. Si Jakob masiambit sangamberi sapunuteteunia, iate

⁷ sangamberi sapunuteteunia simanteu samba sinanalep.

⁸ Saladdou muntogat Jakob siooi ka Misir iate:

⁹ Si Ruben, toga sikebbukat; tatogania: Henokh, Palu, Hezron samba Karmi.

¹⁰ Simeon; tatogania; Jemuel, Jamin, Ohad, Jakhin, Zohar samba Saul, togat sinanalepnia tai Kanaan.

¹¹ Lewi; tatogania: Gerson, Kehat samba Merari.

¹² Jehuda; tatogania: Syela, Peres samba Zerah, togat Jehuda bagei iate Er samba Onan matei ka Kanaan. Tatogat Peres: Hezron samba Hamul.

¹³ Isakhar; tatogania: Tola, Pua, Ayub samba Simron.

¹⁴ Zebulon; tatogania: Sered, Elon samba Jahleel.

¹⁵ Sangamberitda iate tatogat Jakob situtuakenen Lea ka Mesopotamia, aileu bagei togania sinanalep sipuoni si Dina. Oto sangamberi muntogat Jakob sibara kasinanalepnia kai Lea igitra telupulutelu sia.

¹⁶ Gad; tatogania: Zifyon, Hagi, Syuni, Ezbon, Eri, Arodi samba Areli.

¹⁷ Asyer; tatogania: Jimna, Jiswa, Jiswi samba Beria pasamba Serah, sasarainanda sinanalep. Tatogat Beria iate si Heber samba Malkiel.

¹⁸ Kapuluenemra nenda iate muntogat Jakob sibara kai Zilpa, iate pakoinien sinanalep sikau Laban kai Lea, togania sinanalep.

¹⁹ Si Rahel sinanalep Jakob ai rua togania, iate si Josep samba si Benjamin.

²⁰ Ka Misir si Josep ai rua togania iate si Manasye samba si Efraim situtuakenen sinanalepnia si Asnat, togat Potifera sipasiuukkaake imam ka Heliopolis.

²¹ Benjamin; tatogania: Bela, Bekher, Asybel, Gera, Naaman, Ehi, Ros, Mupim, Hupim samba Ared.

²² Kapuluepatda nenda iate muntogat Jakob sibara kasinanalepnia kai Rahel.

²³ Togat Dan iate si Husim.

²⁴ Naftali; tatogania: Jehzeel, Guni, Jezer samba si Syilem.

²⁵ Kapitutda nenda iate muntogat Jakob sibara kai Bilha, pakoinien sinanalep sikau Laban kai Rahel, katogania.

²⁶ Muntogat Jakob sieei ka Misir sangamberinia igitra enen pulu enem sia, ta'pei tuguru tatalikunia.

²⁷ Tatogat Josep siputu'tu mata ka Misir ai rua sia, bailiu sangalalep Jakob sisesege ka Misir sangamberinia igitra pitu pulu sia.

Si Jakob samba sangalalepnia ka Misir

²⁸ Si Jakob masikoiniake si Jehuda muboiki muenung ka sia masisogai si Josep bule iailiake ukkuinia ka Gosyen. Kele arasage ka Gosyen,

²⁹ sakai si Josep kakeretania addeat paaili ka ukkuinia sedda, kateteret arapaaili, lakkaiakenangan ukkuinia si Josep samba pusounangan simauju.

³⁰ Kuanangan si Jakob kai Josep, “Kineiget akuobaakean tubukku matei, kalulut akuitcoan ekeu samba kuagai aipeile ekeu muririmanua.”

³¹ Lepa kuanangan si Josep katubut sasarainania samba kasaepput ukkuinia, “Buitamei aku samba masipaagai kai rimata; sangamberi sasarainangku samba saepput ukkuiku sikukuddu ka Kanaan amoian sia.

³² Kukua le geti, kam sipasijajago biribiri samba jaui, samba araambitnan terimeunu samba sangamberi bakkatnu.

³³ Ke'bai isogai kam rimata samba iparere galajetmui,

³⁴ kuamuian katubunia, kam nene sipasikeli tarimeu barania peile ka sisule, kele taikebbukatmui. Kabagat nene koiniakenangan geti kam mukuddu ka kupkumen Gosyen.” Aikua pagalaiat nenda si Josep, kalulut tai Misir masitsit sia paalei pasamba sipasijago tarimeu.