1Mos. 45 - BUKO SIPUNENAN

Si Josep masipaagaiake tubunia ka sasarainania

¹ Taan amoi iopmake patuaatnia si Josep kamatatda sipugagalai katubunia. Kalulut nenda koiniakenangan sia rakaddiuake kudduat nenda, bule ioi ipaagai katubut sasaraianania kaseinia siripokatnia.

² Lepat arakaddiuake kudduat sangamberi sipugagalainia nenda, pusounangan si Josep simaron, pat areprengannia tai Misir sikukuddu ka uja, samba sege katuareman nenda ka uma purimataat rimata.

³ Kuanangan si Josep katubut sasarainania, “Aku nene si Josep. Aipeileu muririmanua ukkui?” Masiarep nenda sasarainania malotorangan simakope pat taioinangan raaleginia.

⁴ Lepa kuanangan si Josep katubutdra, “Konan kam sene.” Malegrerangan, samba kuanangan minca, “Aku si Josep te, sinakiakenenmui ka Misir.

⁵ Bui numaloto kam ele iolei bagamui kalulut sasakiakemui aku. Siripokatnia Taikamanua le amasiambit aku sene muboiki kakam masipaarau siberikabaga.

⁶ Kalulut ruangamincaan aibara pulajeat ka laggai nene samba aipei limangarura ujunia sirimanua taan masipapakru ele masimonei.

⁷ Aiambitnan aku Taikamanua muboiki kakam masipaarau kam pasamba enungan kiseiet nene, samba masijamin puririmanuamui samba katuriuriugat nupupunuteteukam.

⁸ Oto, siripokatnia ta'kam paluluatnia akukuddu sene, tapoi Taikamanua le. Aibaliakean aku sibara puakuket simabuak rimata Misir.

⁹ Kineiget, olaake nutoili kam ka ukkui samba kua kam katubunia, si Josep, togania, masikua kise, ‘Aibailiuakean aku Taikamanua sibakkat sangamberi Misir; olaake nuoi.

¹⁰ Ukkui momoi ikuddu ka Gosyen, malegre kabe'beku – ukkui, pasamba sapunuteteunu, biribiri, kambing, jaui samba sangamberi bakkat ukkui.

¹¹ Ke'bai ai ukkui ka Gosyen, momoi kupasikelinia. Pulajeat aipeile limangarura samba kubesiake geti ukkui, keluarga samba tarimeu ukkui bui ibara berisara simagulai.’ ”

¹² Kuanangan minca si Josep, “Kineiget anuitcoan kam saramui, ekeu leu Benjamin, aku nene sibulatnia si Josep.

¹³ Kua kam katubut ukkuita, sangamberi gegeku sene, ka Misir, samba poiliatkam katubunia sangamberi siitcomui. Lepa olaake kam nuambit kamnia sene.”

¹⁴ Lepa nenda lakkaiakenangan si Benjamin, baginia nenda, lepa pusonangan; samba ailalakkaiake si Josep pusounangan leuet kasia si Benjamin.

¹⁵ Lepa geti, aipeile si Josep musosou, lakkaiakenangan sangamberi sasarainania samba sigguknangan sia. Lepa nenda taddaakerangan rapatibo pasamba si Josep.

¹⁶ Kateteret ka uma purimataat rimata marepnangan, amoi sasarainan Josep, rimata samba sipugagalai muangka baga.

¹⁷ Lepa kuanangan rimata kamatat Josep, “Koiniake sasarainam nenda rakau bairanen kalideira gandum samba toili ka laggai Kanaan,

¹⁸ masiala ukkui samba muntogatra lepa oi sia masiailiake aku. Iageti kaukungan katubudra polak simaeru ka Misir, samba oinangan geti rapurimanua simakolou sibara buat polak nenda.

¹⁹ Koiniake leu sia masiambit sibara sene piga pa' kereta addeat kasinanalep samba katatogadra sigoiso, samba masiala ukkuira.

²⁰ Buian rapaatu pukayoat sigalakngakenenda, kalulut sangamberi simaeru ka sangalio Misir ibailiu geti bakkatra.”

²¹ Tatogat Jakob masigalaiake parentat rimata nenda. Kaunangan si Josep katubudra piga pa' kereta, siripot siparentaakenan rimata, samba leu panarengan ka enungan.

²² Kaunangan leuet kasene-senendra patsara sia leppei sibau, tapoi kai Benjamin ikau le telungotu bulagat perak samba lima leppei sibau.

²³ Kaunangan raambit ka ukkuinia pulungamuneng kaliddei aibairanennia maigi bibilet bulat simaeru sibara ka Misir, samba pulu kaliddei bagei, aibairanennia gandum, roti samba komen bagei addeat komen kapuenunganannia ka Misir.

²⁴ Lepa geti taroakenangan sasarainania, samba kuanangan katubudra, “Bui nupagolu kam ka enungan.”

²⁵ Kaddiuakerangan Misir samba toili kai Jakob, ka ukkuira ka Kanaan.

²⁶ Kuarangan katubut ukkuira, “Si Josep aipeilenia muririmanua! Nia sibakkat gege ka sangamberi Misir!” Masiarep katuareman nenda, si Jakob taipuletsei, samba ta'matonem bagania katubudra.

²⁷ Tapoi lepa arapoiliat sangamberinia sikuat Josep katubudra, samba kele aiitco kereta siambitra sibara kai Josep addeat masialania samba masiambitnia ka Misir, bara ron tubunia.

²⁸ Kuanangan, “Togakku si Josep aipelenia muririmanua! Sarat nenda le kukiddi! Bui ta'mei aku samba masiitconia kepei matei aku.”