1Mos. 42 - BUKO SIPUNENAN

Sakebbut Josep mei ka Misir masisaki gandum

¹ Kateteret aiarep si Jakob, ka Misir ai gandum, kuanangan katatogania, “Angoi nupuagai kam tubumui?

² Akuarepman, ka Misir ai gandum; kenan kam sedda samba saki kam gandum bule bui' tamatei lulut laje.”

³ Lepa ei sipulu sakebbut Josep nenda masisaki gandum ka Misir.

⁴ Tapoi si Jakob ta'aiobaake si Benjamin, bagit Josep, mei pasamba sia, kalulut malotonia babara lepageti katogania nenda.

⁵ Kalulut pulajeat ka laggai Kanaan, tatogat Jakob pasamba migi sirimanua sabagei moi masisaki gandum ka Misir.

⁶ Sipasisakiake gandum ka sirimanua sibara kasangalio polak iate si Josep, sibailiu simakayo ka Misir. Lulut nenda oi sakebbut Josep samba murapo' kamatania.

⁷ Kele aiitco sakebbunia si Josep, iagai sia, tapoi igalai le kele taiagai sia. Sialeigolo' rerenangan sia, “Kasei kam?” Alegirangannia, “Kai tai Kanaan. Akuoikai masisaki komen.”

⁸ Kenanen iagai sakebbunia si Josep, tapoi sia taraagainia.

⁹ Lepa repdepnangan pangamutetnia pagalaiat sia. Samba kuanangan, “Kam nene sipananaiko; anuoi kam sene masigaba kaipa gulainia laggaimai.”

¹⁰ Alegirangan, “Taa, tuanku. Kai, sapagugulet tuan moi sarat masisaki komen le.

¹¹ Kai nene sipusasaraina le, tuanku. Kai nene sirimanua simaroipo le, ta'sipananaiko.”

¹² Kuanangan si Josep katubudra, “Bokoi! Anuoi kam sene addeat masitaiko kaipa gulainia laggai nene le.”

¹³ Alegirangan, “Kai nene pulurua sipusasarainan, tuanku, kai toga sibara sisara ukkui ka laggai Kanaan. Sara katalagamai amateian samba sisule kineneiget ainia pasamba ukkuimai.”

¹⁴ “Aisesengan kele sikuaku,” ngangan Josep, “kam nene sipananaiko.

¹⁵ Kuoba kusibo kam: Musuppa aku ka onin rimata, ta'nukakaddiuake kam laggai nene ke'bagimui sisule ta'moinia sene.

¹⁶ Sara katalagamui buita toili masiala bagimui nenda. Sabagei geti tuukum le teret imatoila sikuamui. Ke'taa, kaonin rimata, kam nene sibulatnia sipananaiko saggak!”

¹⁷ Lepa geti guruakenangan sia kabagat tangsi telungagogoi ujunia.

¹⁸ Ka gogoi sikatelunia kuanangan si Josep kamatadra, “Aku sirimanua simaloto samba simareddet ka Taikamanua. Kam geti kuarauake le pasamba sara enunggan.

¹⁹ Addeat masipakoinong kam nene simaroipo, sara katalagamui tuukum kabagat tangsi; sabagei momoi toili samba masiambit gandum sinakimui addeat muntogatmui sipasiorik laje.

²⁰ Lepat nenda taroakemuian bagimui sisule katubuku. Nenda te patoilaketnia lepa geti, tiboietmui nenda maroipo, samba kam taan kuukum matei.” Sia raoba seteuakenen simakayo nenda.

²¹ Lepa patiborangan kapasambadra, “Oto, sita kineneiget tuukum kalulut seletta katubut bagitta siburu; itiddou paroman, tapoi ta'atapuletsei, kenanen ataitcoan, pangoringannia. Iate lulunia kineneiget taenungi kam pangoringan nene.”

²² Kuanangan si Ruben, “Ta' pa' akukuangan siboiki peile katubumui, bule bui nugalai kam jo katubut toga nene. Tapoi ta'anuarepi kam. Kineneiget kamateiatnia isiliake katubutta.”

²³ Si Josep iagai le ngangandra, tapoi sia ta'raagai pagalaiat nenda, kalulut rapatibo kai Josep pasamba sara sirimanua siagai masingangaake nganga le.

²⁴ Iageti kaddiuakenangan sia si Josep, lepa pusounangan. Kele amoian ipatibo minca, toilinia minca katubudra, lepa alanangan Simeon, samba koiniakenangan rakabenia kamatat sangamberi sasarainania.

²⁵ Parentaakenangan si Josep bule sangamberi goni siambitra sakebbunia tukau kabagania gandum, samba bulagatdra senendra tuguruake kabagat goninda nenda. Samba bule tukau leu kan addeat panarengandra ka enungan. Parentania nenda tugalaiake.

²⁶ Lepat nenda sakebbut Josep sanekirangan kalideira pasamba gandum sinakitra nenda, lepa toili sia baradra sedda.

²⁷ Kakudduat pugogoiatra, sara katalagatra bukanangan gonin gandumnia ikau kan kalideinia. Sesenangan bulagat kauddut gandum nenda.

²⁸ “Bulagatku itoiliake,” ngangnia kasasarainania. “Itco, ai kabagat goningku!” Paatuatra ibailiu maleu, samba kabagat loto panonorangan kapasambagatra, “Apa igagalai Taikamanua katubutta?”

²⁹ Kateteret arasege ka Kanaan poiliatrangan katubut ukkuira sangamberi sienungienda. Kuarangan,

³⁰ “Simakayo Misir makela le ipanibo katubumai samba masisuksuk kai masitaiko laggainia.

³¹ Alegimaian, ‘Kai sirimanua simatopit, ta'sipananaiko, kai sirimanua simaroipo le.

³² Kai sangamberimai sipusasaraina aikai pulurua, toga kasara ukkui, samba sara atataannia, beringan sisulemai ainia pasamba ukkuimai ka Kanaan.’

³³ Kuanangan simakayo nenda, ‘Kuoba kusibo kam addeat masiagai, apa kam nene sirimanua simaroipo: Sara katalagamui buitamukuddu; sabagei momoi toili masiambit gandum kakeluargamui sipangongorik laje.

³⁴ Lepat nutoili kam masiambit bagimui sisule, agaikungan geti kam nene ta'sipananaiko, tapoi sirimanua simaroipo le. Iageti sasarainamui siukumku nenda kutotoiliake le geti katubumui samba momoi nukuddu kam ka laggai nene samba tuobaake pasaki.’ ”

³⁵ Lepa geti, kateteret ararugutnake gandum ka goninda, seserangan kudduat bulagatra senesena ai kabagania bulagat; lepa makopenangan lotora, kisedda leuet ukkuira.

³⁶ Lepa kuanangan ukkuira, “Kam nene masikau aku imapepe sangamberi tatogakku. Si Josep ta'ananai; Simeon ta'ananai; samba kineiget alamuian leu geti si Benjamin. Bulat makope pangoringanku!”

³⁷ Lepa kuanangan si Ruben ka ukkuinia, “Obaake le si Benjamin kaku, ukkui; lepa geti ambitkungannia minca, ke'taa, mateiakenungan karua tatogaku simanteu.”

³⁸ Tapoi kuanangan si Jakob, “Taa! Si Benjamin tamomoi nuambit kamnia; kebbunia amateian samba kineiget niangan le amulegei. Babara sitaipasesese katubunia ka puenunganan nenda. Amabajaan aku, samba pureureugat baga siakemui katubukku nenda masibaraake kamateiatku le.”