1Mos. 41 - BUKO SIPUNENAN

Ipakolou si Josep katukolobat pangamutet rimata Misir

¹ Pasat ruanga ruru, pangamutnangan rimata Misir, ainia muririo ka bebet bagat oinan Nil.

² Sinulut bara pitungamuneng jaui simamomo' samba kulitnia simakirisau barania ka oinan nenda. Lepa taddaakenangan ikom parou kabebet oinan nenda.

³ Lepa geti bara minca pitungamuneng jaui bagei; sangamberi tarimeu nenda makainang samba legeina le kulit sisabbuk tolat. Sangamberi jaui sikainang nenda murio kabe'bet sangamberi jaui simamo'mo' kabe'bet oinan nenda.

⁴ Lepa geti jaui sikainang masikom jaui simamo'mo'. Lepa nenda suru rimata ka peremannia.

⁵ Lepa geti lau'lau'nangannia samba pangamutnangan minca. Kabagat pangamutetnia itconangan pitungaotti gandum simabaga samba amaraan mututu kasara totoat.

⁶ Lepa geti tu'tu leuet pitungambe gandum bagei, simakainang samba malajuan lulut rusa sikalaut.

⁷ Iageti gandum sikainang nenda masikoilo si pitungambe sibara baga siboiki. Lepa nenda suru rimata samba againangan amangamutnannia.

⁸ Simansepnia si rimata kele mareureu bagania, lulut nenda gugluakenangan masisogai sangamberi siagai tawa samba simaagai ka Misir. Lepa poiliatnangan pangamutetnia ka tubutdra, tapoi berisara sia amoi masikolouake katukolobatnia.

⁹ Lepa geti kuanangan sipasikeli lo' katubut rimata, “Gogoi nene bui takupoiliat selekku.

¹⁰ Siboiki amugolu si tuan katubut sipasikeli roti samba katubuku, lepa guruake kai ka tangsi, ka lalep utet sipasijago uma purimataat.

¹¹ Kasara soibo pangamutmaian ruamai, samba pangamutetmai nenda ta'makere katukolobatnia.

¹² Sara tailainge tai Heber ainia sedda pasamba mai. Nia sipasikeli utet sipasijago uma purimataat nenda. Poiliatmaian pangamutetmai katubunia, lepa kolouakenangan katukolobat pangamutet nenda.

¹³ Sibulatnia sangamberinia bulat amuaili kele sikuania, iate: si tuan masitoiliake aku ka kudduatku siboiki, tapoi si pasikeli roti nenda tuukum matei le.”

¹⁴ Iageti rimata masikoiniake rasogai si Josep, samba belaakerangannia simaruei ka tangsi. Lepa aipasikirit samba aisili bibiletnia si Josep, ailiakenangan rimata.

¹⁵ Kuangangan si rimata katubunia, “Amangamutnan aku, samba beri leu sara sirimanua amoi masikolouake katukolobatnia. Ai sipasikukua katubuku, ekeu momoi masikolouake pangamutet.”

¹⁶ Aleginangan si Josep, “Ta' aku, tuanku, tapoi Taikamanua le masiake katukolobat simakolou.”

¹⁷ Lepa kuangangan rimata, “Amangamut aku, ai aku muririo ka be'bet oinan Nil.

¹⁸ Lepa bara ka oinan nenda pitu jaui simamo'mo' samba kulit simakirisau, iageti taddaakenangan mukom parou ka be'bet oinan nenda.

¹⁹ Lepa geti bara leuet pitu jaui bagei pakainang-kainang samba legeina le kulit sibolit tolat. Ta' pei akuitco jaui sikatai nenda ka sangalio Misir.

²⁰ Sangamberi jaui sikainang nenda sapru aikom pitu jaui simamo'mo' siboiki.

²¹ Tapoi lepa nenda sangamberi jaui sikainang nenda mariuriu lei makainang. Lepa suru aku ka peremanku.

²² Lepa geti laulaunangan aku samba pangamutkungan minca, itcokungan pitungambe' gandum sibara baga samba amaraan, mutu'tu' kasara totoat.

²³ Lepa tu'tu leu pitungambe' gandum sikainang samba amalajuan kalulut rusa sikalaut.

²⁴ Ngambet gandum sikainang nenda masikoilo ngambet simabaga siboiki. Akupoiliatnan ruania pangamutetku nenda ka siagai tawa, tapoi berisara sia amoi masipakolou katukolobatnia.”

²⁵ Lepa kuanangan si Josep kai rimata, “Karua pangamutet nenda makere katukolobatnia; Aipaagaian Taikamanua katubut tuanku apa galaiakenennia geti.

²⁶ Pitungamuneng jaui simamo'mo' nenda iate pitungaruru, samba pitungambe gandum sibara baga nenda iate pitungarura leuet; karuania makere katukolobatnia.

²⁷ Pitu jaui sikainang situoottou sikateitei, samba pitungambe gandum sikainang samba simalaju kalulut rusa sikalaut nenda iate puteterat pulajeat ujunia pitungarura.

²⁸ Kele sikuaku katubut tuanku, aipatoilaan Taikamanua kai tuanku apa galaiakenennia geti.

²⁹ Lepa geti babara te' pitungarura pukayoat kasalio laggai Misir.

³⁰ Lepa nenda babara te geti pitungarura pulajeat, iageti sangamberi pukayoat nenda ka Misir kalipogi, kalulut pulajeat nenda magebanangan laggai nene.

³¹ Pasat nenda taan matotoila geti minca legei pukayoat ka laggai nene kalulut pulajeat nenda, aipoi bulat besi'nia pulajeat nenda.

³² Pangamutet tuanku ruangamincaan aipuaili, nenda katukolobatnia, aiteuakean Taikamanua samba igagalaiake Taikamanua.

³³ Kalulut nenda, maerupei le nusausau sara sirimanua simaagai samba simasuku paatuat samba tukau katubunia gege ipasikeli laggai nene.

³⁴ Maeru leuet tuanku Parao masigalaiake kele nene, iate masiuddetnake sipasikikinere laggai nene samba kabagat pitungarura pukayoat nenda masiruruake seperlima sibara kabuat polak laggai Misir.

³⁵ Buita raruruake sangamberi gandum kabagat senen rura simaeru sibabara nene, samba kageget tuanku Parao, masilabbu gandum ka senen laggai sibailiu bahan komen samba masikoiriakenia.

³⁶ Kise te sangamberi gandum nenda ibailiu panarengan ka laggai nene kabagat pitungarura pulajeat sibabara ka laggai Misir, bule laggai nene ta'masubu kalulut pulajeat nenda.”

Si Josep tusausau ibailiu simakayo ka Misir

³⁷ Rimata samba taipegawainia masisilo pinaatut Josep nenda.

³⁸ Lepa kuanangan rimata katubudra, “Taan babara tasesese sirimanua sabagei simateu bele pei si Josep, aipoi nia sipaalei Ketsat Taikamanua le.”

³⁹ Iageti kuanangan rimata katubut Josep, “Taikamanua aipaagaian sangamberinia nene kekeu, oto makolouan ekeu pei le maagai samba masiku paatuat kasirimanua sabagei.

⁴⁰ Ekeu kurioake ibaiiu simakayo, samba sangamberi taikauamangku rareddet le geti parentam. Sarat aku le simagege katubum.”

⁴¹ Lepat nenda goloknangan rimata kakabeinia sipsip siputularat purimataat, lepa junungakenangannia ka simongai Josep kaunangan, “Pasamba nene kurioake ekeu ibailiu simakayo ka sangalio Misir.”

⁴² Lepa geti leppeiakenangan katubut Josep sara juba lenan simaramo, samba ngalouakenangan kalolokatnia sara inu mas.

⁴³ Lepa kaunangan kai Josep kereta purimataat sikarua addeat puenungnia, samba sipasijago abeuakenen rimata muenung kamatat kereta nenda pasamba masisogaake, “Pasikeli kam! Kau enungan! Kau enungan!” Kise' te' aiturioake si Josep ibailiu simakayo ka sangalio Misir.

⁴⁴ Kuanangan rimata katubunia, “Aku te rimata samba aku masisegeake, ta'anai berisara sirimanua ka sangalio Misir moi masigalai apa pa' keta'nuobaake.”

⁴⁵ Lepa kaunangan rimata sara onin Misir katubut Josep, iate Zafnat-Paaneah. Kaunangan leuet sara sinanalep sipuoni Asnat, togat Potifera sipasiukka Imam ka laggai Heliopolis.

⁴⁶ Si Josep ainia telupulungarura kateteret aipugalai kai rimata Misir. Iageti tuitui si Josep ka uma purimataat rimata samba einia masigoilik sangalio laggai nenda.

⁴⁷ Kabagat pitungarura pukayoat nene, polak masibaraake moneiet simalilimat.

⁴⁸ Gandum nenda iruruake si Josep, lepa koiriakenangannia ka senen laggai. Ka senen laggai koiriakenangan gandum buat mone kabebet laggai nenda.

⁴⁹ Gandum siruruakenennia nenda bulat maigi le pat ariakenangan si Josep masitekong, kalulut iginia kele ngai kabebet koat.

⁵⁰ Kepei iaili teteret pulajeat nenda, si Asnat sinanalep Josep masitu'tu'ake mata rua tatoga simantau.

⁵¹ Kuanangan si Josep, “Ai galaian aku Taikamanua masikalipogi sangamberi pangoringanku samba katubut muntogat ukkuiku.” Kalulut nenda ioniake togania sikebbukat “Manasye”.

⁵² Kuanangan leuet, “Aiakean Taikamanua tatoga katubuku kateteret pugejaat bagaku,” lepa ioniake togania sikarua “Efraim”.

⁵³ Pitungaruru teteret pukayoat sisilora ka laggai Misir nenda atukapplungan.

⁵⁴ Iageti oi leu pitungarura teteret pulajeat, siripot kele sikuat Josep. Kasangalio polak muaili pulajeat, tapoi kasangamberi laggai Misir ai panarengan komen.

⁵⁵ Kateteret aitadda araorik pulajeat tai Misir, tiddourangan kan katubut rimata. Lepa koiniakenangan sia rimata raei kai Josep samba masireddet sangamberi apa iparentaake geti si Josep katubudda.

⁵⁶ Kateteret pulajeat nenda memei makokope samba makakra kasangamberi laggai, iageti belaakenangan si Josep sangamberi gandum samba masisakiake gandum katubudra tai Misir.

⁵⁷ Sibara kasangalio polak sangamberi sirimanua moi ka Misir addeat masisaki gandum kai Josep, kalulut pulajeat nenda bulat maron ka sangalio polak.