1Mos. 39 - BUKO SIPUNENAN

Si Josep samba sinanalep Potifar

¹ Si Josep aruambitnannia tai Ismael nenda ka Misir, samba tusakiake kai Potifar, sara ulet saladdu raja siukkaake utet sipasijajago uma purimataat.

² Si Tuhan masiropmake si Josep pat eddet igalaiake sangamberi galajetnia. Kudduatnia ka lalep tuannia, tai Misiri nenda.

³ Si tuannia masiitco, si Tuhan masirop si Josep samba lulut nenda tueddet simakolou igalaiake sangamberi galajetnia si Josep.

⁴ Maangka bagat Potifar katubut Josep samba rioakenangannia ibailiu sipasikelinia; lepa uddetnakenangan si Josep masipasikeli lalepnia samba sangamberi bakkatnia.

⁵ Kateteret nenda, kalulut si Josep, sukatnakenangan lalepda tai Misir nenda si Tuhan samba sangamberi apa bakkatietnia, ka lalep samba leu ka mone.

⁶ Sangamberi bakkatnia si Potifar katoneminangannia kai Josep. Kabagat nene pasikelat ka lalepnia si Potifar ta'an makarat bagania, kecuali komennia. Si Josep putubuatnia malainge samba maeru.

⁷ Piganga gogoi pa' tusabau, sinanalep Potifar taddaakenangan imaale bagania kai Josep, lepa nananangannia merep simakere.

⁸ Si Josep ta'ioba samba kuanangan katubunia, “Bojoi, ina, si tuan Potifar aikatonemingan bakkatnia katubuku. Ta'an aipaatu apa pa' bagei ka lalep nene.

⁹ Sene gegeku makere le beunan gegenia. Ta'anai beri sara taaikatonemi katubuku, sarat ekeu le, aipoi ekeu sinanalepnia. Kaipa iooi kugalaiake pukakatai nenda samba mujo ka Taikamanua?”

¹⁰ Kenanen senen gogoi sinanalep Potifar nenda ina'na' si Josep, si Josep ta'ioba masiarep pana'na'katnia nenda samba merep pasambania.

¹¹ Ka sara gogoi kele ai tuguru si Josep kabagat lalep masigalaiake galajetnia, berisara sirimanua sedda.

¹² Sinanalep Potifar nenda tiktiknangan si Josep pasamba jubania samba kuanangan, “Konan taperep simakere.” Oppunangan tubunia si Josep tuobanangan, lepa tuitunia ka uja', tapoi jubania aikalipogi kakabei sinanalep nenda.

¹³ Kele aiitco sinanalep Potifar si Josep amutuituiannia samba jubania kalipogi,

¹⁴ sogainangan sapaguguletnia samba kuanangan, “Itco pei! Tai Heber siambit simanteuku ka lalep nene, masipaloloi sita. Guru'nia ka biliku samba ioba masielet aku, tapoi mugerei le aku simaron.

¹⁵ Kateteret aiarep kupugerei, tuituinia ka uja' samba kalipoginangan jubahnia.”

¹⁶ Lepa koiriakenangan jubah nenda sinanalep Potifar pat toili simanteunia.

¹⁷ Kele aitoili simanteunia, poiliatnangan nenda katubunia, kuanangan, “Tai Heber siambitnu sene nenda, gurunia kabagat bili' masipaloloi aku.

¹⁸ Tapoi kele akupugerei, tuituinia ka uja' samba kalipoginangan jubahnia.”

¹⁹ Si Potifar bailiu bulat magolunia.

²⁰ Samba parentaakenangan bule si Josep tulaba' samba guruakenia ka tangsi, ka kudduat rimata silaba tugeliake.

²¹ Tapoi si Tuhan masiropmake si Josep samba mariuriu le ipununtukiNia baga, pat siutet tangsi obanangannia.

²² Siuteake tangsi nenda masikatonemi bule sangaiberi situukum bagei ipasikeli sia si Josep samba kai Josep le aikau puukuket ka sangamberi galaiet galaiakenen kabagat tangsi nenda.

²³ Siuteake tangsi nenda ta'an ai jago sangamberi sikaunia kai Josep, kalulut si Tuhan poi masiropmakenia pat tueddetnangan kasangamberi galajetnia.