1Mos. 34 - BUKO SIPUNENAN

Dina samba Sikhem

¹ Ka sara gogoi ei si Dina, togat Jakob samba Lea sinanalep, masibalou piga pa' tainanalep tai Kanaan.

² Kateteret si Sikhem, togat Hemor sibailiu rimata ka kupkumen nenda masiitco si Dina, ambitnangan siokko nenda, lepa pajonaungannia.

³ Bulat maala le bagania kai Dina, pat bara patuatnia katubu siokko nenda samba ibesiake bule siokko nenda iobania.

⁴ Kuanangan si Sikhem ka ukkuinia, “Kutiddou besiake nuala siokko nenda ibailiu nia sinanalepku.”

⁵ Arepnangan si Jakob, si Dina togania arapalolitnan pusiokkonia, tapoi tatogania aipeile sia masijago terimeunia ka su'su', si Jakob imengmengake le pagalaiat nenda teret ratoili tatogania.

⁶ Lepa ei si Hemor ukkui Sikhem masiailiake si Jakob, patibo ka sia.

⁷ Tapoi kateteret nenda tatogat Jakob toilidra ka su'su'. Masiarep sipuaili nenda, tugegerangan samba bulat magolu le sia. Aipoi pasigagalai sikataika togat Jakob nenda, si Sikhem aipaloloian sangamberi tai Israel.

⁸ Kuanangan si Hemor kai Jakob, “Togakku si Sikhem ioba togam; kutiddou bule nuobaake togakku mutolimou ka sia.

⁹ Kauan tagalai pukerekat baga, bangsam samba bangsamai mutalimou sipagagalu.

¹⁰ Iageti momoi nukuddu kam kakai ka laggai nene; kaipa le nuoba kam, samba pukuddungan le kam sene.”

¹¹ Lepa geti kuanangan si Sikhem katubut ukkui Dina samba ka sakebbunia, “Arepikam panindogatku nene, lepa akekungan geti apa siobat bagamui.

¹² Kua kam panguruat apa besiakenenmui, samba teuake kam mas putalimougat. Kuake geti apa tiddougetmui, tapoi obaakekam kutalimouake siokko nenda.”

¹³ Kalulut si Sikhem aipalolitnan pusiookkot bagidra si Dina, tatogat Jakob paboko kai Sikhem samba kai Hemor ukkuinia.

¹⁴ Kuanangan katubut rua sirimanua nenda, “Maila kai kuobaake kai bagimai mutalimou pasamba sirimanua sita'pei atusunat.

¹⁵ Kuoba kai masisilo panindogat nenda pasamba sara enungan galaiakenen, iate Kam buita ibailiu kele kai, katukolobatnia sangamberi taimanteu katalagamui buita tusunat.

¹⁶ Lepa nenda silo'maian panindogatnu pagalaiat mutalimou simagalu nenda. Pukuddumaian geti katalagamui samba ibailiu sara bangsa pasamba ekeu.

¹⁷ Tapoi ke' ta'nuoba masisilo' enunganmai, samba ta'nuoba tusunat, alamaian minca siokko nenda samba tuitui kai.”

¹⁸ Iageti si Hemor samba si Sikhem masisilo panindogatdra.

¹⁹ Samba si Sikhem matareknia masisilo enungan galaiakenen nenda kalulut ioba'poi si Dina. Katalagat muntogatnia, si Sikhem le bulat tusuru'.

²⁰ Lepa geti ei si Hemor samba si Sikhem ka kudduat paailiat ka matat baliu gugurukat laggai, samba patibo katubutda sipulalaggai, kise,

²¹ “Tai Israel nenda saaleita. Oto edangannia rakuddu ka laggai nene pasamba sita samba kaipa raoba ei. Laggai nene malio addeat kasia. Momoi taputalimou ka taiokkora, samba sia leu momoi raputalimou ka taiokkota.

²² Tapoi ka enunggan nene le raoba sirimanua nenda mukuddu pasamba sita samba ibailiu sara bangsa pasamba sita, iate sangamberi taimanteu katalagatta buita tusunat kele sia.

²³ Senengamata mungkuat tarimeura samba sangamberi pukayoatra ibailiu bakkatta. Oto kauan tasilo kam panindogatra bule rakuddu pasamba sita.”

²⁴ Sangamberi sirimanua siparururu' nenda masisilo panindogat Hemor samba Sikhem, iageti sangamberi sirimanua taimanteu simakebbukat ka laggai nenda tusunat.

²⁵ Pasat telungagogoi, kateteret ai sia mangongorik kalulut tusunat, oi rua sia tatogat Jakob, iate kebbut Dina sipuoni Simeon samba si Lewi, lepa alarangan tegledra guru sia kabagat laggai. Lepa geti mateiakerangan senen sirimanua taimanteu sedda,

²⁶ samba leu si Hemor samba si Sikhem. Lepa alarangan si Dina ka lalep Sikhem, iageti tuitui sia.

²⁷ Kele ailepa pamateiat nenda, tatogat Jakob sabagei masiparauragi laggai nenda sibailiu silit besit patuat kalulut pusiokkot bagidra arapalolitnan.

²⁸ Alarangan mungkuat kambing, biribiri samba jauinia, kalideinia samba sangamberi sibabara kabagat laggai samba ka su'su'.

²⁹ Alarangan sangamberi bibilet simakeppu saki, luplupakerangan tainanalep samba tatoga, samba rauraurangan sangamberi sibabara kabagat lalep ka laggai nenda.

³⁰ Kuanangan si Jakob katubut Simeon samba Lewi, “Anupubesikingan kam aku. Kineiget tai Kanaan samba tai Feris samba sangamberi sipulaggai ka laggai nene rapulagaki le aku baga geti. Kasita ta'maigi sita. Ke'bai sipulaggai nenda musara sangamberidra samba masisaggangi aku, sangamberi keluargatta masubu le.”

³¹ Tapoi alegirangan, “Tamomoi kuobaake kai bagimai rakaunia sibailiu sipaelet.”