1Mos. 33 - BUKO SIPUNENAN

Paaili si Jakob pasamba si Esau

¹ Itconangan si Jakob ioi si Esau pasamba epatngotu sirimanuania. Kalulut nenda iparubei tatogania kai Lea, kai Rahel samba karua pakoinietnia.

² Iuddetnake karua pakoinietnia pasamba tatogadra ka mata, lepa geti si Lea pasamba tatogania, lepa si Rahel samba si Josep bulat kateitei.

³ Si Jakob muenung kamatatra sangamberidra, samba masilegeri kakebbunia, purekkuknangan teret pitungaminca.

⁴ Tapoi si Esau pabalau masiailiake si Jakob, iageti lakkaiakenangannia samba sigguknangannia. Samba pusuorangan ruadra.

⁵ Kele ai itso si Esau sangamberi tainanalep samba tatoga nenda, panonounangan, “Kasei sia pasamba ekeu nene?” Alegeinangan si Jakob, “Sia nenda tatoga sipanguruatnakenen Taikamanua kaku.”

⁶ Lepat nenda ei karua pakoinietnia pasamba tatogadra, lepa murekkuk.

⁷ Lepa geti oi si Lea pasamba tatogania, samba kalepakatnia oi si Josep samba si Rahel, lepa purekkukrangan sangamberidra.

⁸ Panounounangan si Esau, “Apa pinatum kapasamba mungkuat sirimanua siailiku simaruei?” Aleginangan si Jakob, “Masiangkaake bagam.”

⁹ Tapoi kuanangan si Esau, “Pukayoatku simemetnia. Ta'anai lulunia nuake panguruat kaku.”

¹⁰ Kuanangan si Jakob, “Ke'akupasanangan paatuatnu, silo le panguruatku nene. Kaku, masitso pumataatnu makere ke masiitco pumataat Taikamanua, kalulut ukunu katubuku.

¹¹ Kutiddou, silo le panguruat siambitku nene. Taikamanua simanuntu baga le katubuku samba masiake sangamberi obaketku.” Lepa pusuminangan si Esau, pat silonangannia.

¹² Lepa kuanangan si Esau, “Kauan tapatarek tubu taei, muboiki le aku muenung kekeu.”

¹³ Aleginangan si Jakob, “Nuagai le, tatoga nene masaggo, samba kupagaba le sangamberi tarimeu si putotottot. Ke' tugirit simaola, kananen bai sangagogoi le, sangamberi mungkuat tarimeu nenda matei le geti.

¹⁴ Puenunggan le boiki, ailei kumoileake kuoi. Muenung le geti aku simaola pasamba terimeu samba tatogakku nene teret ailimaian ekeu ka Edom.”

¹⁵ Kuanangan si Esau, “Kaseddabainia, maeruan kulegeiake katubut piga pa' sipasitutnaku.” Tapoi aleginangan si Jakob, “Buian imabesi tubum, kuoba le masipasanang paatuatnu.”

¹⁶ Kise te ka gogoi nenda aitoili minca si Esau ka Edom.

¹⁷ Tapoi si Jakob einia ka Sukot, lepa rioakenangan lalepnia samba kudduat pukuneman tarimeunia. Iate lulunia kudduat nenda tuoniake Sukot.

¹⁸ Kabagat puenunganan barania ka Mesopotamia, sega le si Jakob ka laggai Sikhem ka kupkumen Kanaan kabagat arau baga. Lepa rioakenangan sapounia ka sara su'su' kalegret laggai.

¹⁹ Su'su' kudduat pusapougat nenda aisaki ka sapunuteteu Hemor, ukkui Sikhem, sakinia sangotu bulagat perak.

²⁰ Lepa geti rioakenangan meja sedda pasibuluat samba oniakenangannia “Taikamanuan Israel iate Taikamanua.”