1Mos. 32 - BUKO SIPUNENAN

Ipatarek tubunia si Jakob paaili kai Esau

¹ Si Jakob masiriuriuake puenunganannia. Iageti oi piga pa' malaika masiailiakenia.

² Kateteret ai itco sia si Jakob, kuanangan, “Nene pusapougat Taikamanua,” lulut nenda ioniake kudduat nenda Mahanaim.

³ Pasat nenda koiniakenangan piga pa' pakoinietnia si Jakob muboiki ka sia muenung ka laggai Edom addeat masiailiake si Esau, kebbunia.

⁴ Kuanangan si Jakob katubudra, “Kua le ka kebbuku kai Esau kise, ‘Aku si Jakob bagim. Ujunia nene amukuddungan aku kai Laban.

⁵ Kineiget aian kaku jaui, kalidei, biribiri, kambing samba pagugulet. Kuake katuareman katubut tuanku, bule tuanku maangka baga geti.’ ”

⁶ Kele aratoili minca sapakoinien nenda kai Jakob, kuarangan, “Ameian kai Esau, kebbunu samba kineiget ainia kapuenunganan ioi masialiake ekeu. Ioi pasamba epatngotu sirimanua.”

⁷ Masiarep nenda bulat maloto samba makarat baga le si Jakob. Lepa sangamberi sirimanua pasambania iparubei bailiu rua rubeiat, kisedda leu et biribirinia, kambingnia, jaui samba untania.

⁸ Patuatnia, “Ke'bai moi si Esau samba masisaggangi rubeiat siboiki, iageti rubeiat sikarua momoi pei le rabela.”

⁹ Lepa geti panindounangan si Jakob, “Oi Taikamanua, sipanindogiet taikebbuaku si Abraham, samba ukkuiku si Ishak, arepmake aku! Ekeu amasikoiniake aku toili ka laggaiku samba ka sasarainangku. Samba Ekeu amasipalelek geti masigalai sangamberi simaeru kaku.

¹⁰ Ta' mateu aku masisilo sangamberi nuntut baga samba putopinan sipakoinongNu katubuku. Kateteret akutalipoki bagat oinan Jordan, ta'anai akuambit aponia pa' sarat tutura le. Kineiget moi aku minca pasamba ruanga uddutat nene.

¹¹ Kutiddou simakope, “Belaake aku kakabei kebbuku si Esau. Maloto aku katubunia babara oinia masisaggangi samba mateiakenangan kai sangamberimai samba leu saina pasamba tatogania.

¹² Repdep le, Anupalelekngan masigalai sangamberi simaeru kaku samba masiake katubuku muntogat simaigi. Igidra kele igit ngai ka buggei, pat ta'anai beri sara sirimanua momoi masiadde sia.”

¹³ Kele ailepa ai pugogoi sedda, alanangan si Jakob sangarubeiat tarimrunia addeat masipanguruatnake kai Esau,

¹⁴ Panguruat nenda'iate ruangotu kambing sinanalep, rua pulu kambing simanteu, ruangotu biribiri sinanalep, ruapulu biribiri simanteu,

¹⁵ telu pulu unta siputotottot, pasamba togania, epat pulu jaui sinanalep, pulu jaui simanteu, rua pulu kalidei sinanalep samba pulu kalidei simanteu.

¹⁶ Parubeinangan sangamberi tarimeu nenda bailiu piganga mungkuat pa' lepa sene-senen mungkuat ikau katubut sara paguguletnia. Kuanangan katubudra, “Puenung le muboiki kaku, samba jago le bule ai paoggangan ka mungkuat siboiki pasamba mungkuat bagei.”

¹⁷ Si Jakob masiparenta katubut pagugulet si boiki, “Ke'bai paaili kam kebbuku si Esau, samba irere, ‘Kasei tuannu? Kaipa nuei? Kasei sibakkat tarimeu sigiritnu nenda?’

¹⁸ Iageti alegi le, ‘Sibakkatnia si Jakob paguguletnu. Aiake nene sibailiu panguruat katubut Esau, tuannia. Paguguletnua Jakob aiailiake kai.’ ”

¹⁹ Katubut paguguletnia sikarua, sikatelu samba sangamberi sirimanua sikoiniakenennia masipasikeli sangamberi mungkuat nenda, ikau parenta simakere.

²⁰ Samba kuanungan leu: Paguguletnu si Jakob ainia ka teiteimai.” Kalulut aipaatu poi si Jakob: “Eddangan kuabanake patuatnia pasamba panguruat sitaroakenen siboiki, iapeite itcokungan pumataatnia; buleu isilo aku ka erut baga.”

²¹ Oto panguruat nenda itaroake le' boiki, tapoi ia kasia mugogoi ka pusapougat.

Si Jakob mupaatuat ka Pniel

²² Ka soibo nenda leu et suru si Jakob, iageti ambitnangan karua sinanalepnia, karua pakoinietnia samba pulusara togania, mutalipo ka bagat oinan Jabok.

²³ Kele ailepa italipoake sia, toilinia samba tolipoakenangan leu et sangamberi tarimeunia.

²⁴ Tapoi mukuddu le nia sarania. Iageti oi sara simanteu palaba pasamba si Jakob teret maleggre pato.

²⁵ Kele aiagai tubunia sirimanua nenda ta'mamamanangnia kabagat palabakat nenda, bobonangan kokdok Jakob pat sesle.

²⁶ Lepa kuanangan sirimanua nenda, “Obaake le aku, ta'an mauju ibebela sulu.” Aleginangan si Jakob, “Ta'kuobaake ekeu Tuan, ke' ta'nupanukani aku.”

²⁷ Parerenangan sirimanua nenda “Kasei onim?” Aleginangannia, “Jakob.”

²⁸ Kuanangan sirimanua nenda, “Onim ta'an si Jakob. Aipoi apasaggakngan ekeu pasamba Taikamanua samba pasamba sirimanua, samba ekeu mamanang, lulut nenda onim ibailiu le Israel.”

²⁹ Kuanangan si Jakob, “Kua leu onim.” Tapoi aleginangannia sirimanua nenda, “Ta'an leu nurerere' kasei oningku!” Lepa panukaninangan si Jakob.

³⁰ Lepa geti kuanangan si Jakob, “Apa ailingan kai pasamba Taikamanua, samba aipeile aku muririmanua.” Kalulut nenda ioniake kudduat nenda Pniel.

³¹ Kateteret ai bela sulu, kaddiuakenangan si Jakob si Pniel, samba matekkeinia kalulut kokdoknia atusesle.

³² Teret kineiget leu et muntogat Israel ta'rakom akkula ka kokdok tarimeu, kalulut kokdok Jakob aiorakngan bo'bo'bo'.