1Mos. 28 - BUKO SIPUNENAN

¹ Lepa geti sogainangan si Ishak si Jakob, lepa sukatnakenangannia samba kuanangan, “Bui nuputalimoau pasamba taiokkora tai Kanaan.

² Kenan le ka Mesopotamia, ka lalep Betuel, sibbuam, samba putalimou pasamba sara katalagat togat kammannu si Laban.

³ Bule Taikamanua Sipulugege masipanukani putalimogatnu samba masiake katubum sapunuteteu simaigi, pat bailiu ekeu taikebbukat bangsa simigi!

⁴ Bule si Tuhan masipanukani ekeu samba sapunuteteunu kele leu aitusukatnakenia si Abraham, samba bule ekeu masibakkati polak kudduijietnu nene, sikau Taikamanau kai Abraham!”

⁵ Kise te aiobaake si Ishak si Jakob iei ka Mesopotamia, kai Laban, togat Betuel tai Aram nenda. Si Laban iate Kebbut Ribka inan Jakob samba Esau.

Si Esau mutalimou minca

⁶ Aiarep si Esau, si Ishak aipanukaningan si Jakob samba aiobaakeannia iei ka Mesopotamia addeat masigaba sinanalepnia sedda. Ia leuet kateteret aisukatnake si Ishak si Jakob, keranangan si Jakob iputalimou pasamba taiokkora tai Kanaan.

⁷ Samba bagei si Esau iagai le, si Jakob mareddetnia ka tiboiet ukkui samba inania, samba ameiannia ka Mesopotamia.

⁸ Iageti againangan kolou si Esau, si Ishak, ukkuinia, ta'ioba katubut tainanalep tai Kanaan,

⁹ lulut nenda ei si Esau kai Ismael, togat Abraham, samba putalimounangan ka togat Ismael sipuoni Mahalat, bagit Nebayot.

Pangamutet Jakob ka Betel

¹⁰ Iageti kaddiuakenangan si Jakob Bersyeba samba einia ka Haran.

¹¹ Kateteret aibele sulu segenia kasara kudduat, lepa pugogoinangan sedda. Perepnia, samba alanangan bukku kalak utenia.

¹² Lepa geti pangamutnangan, itconangan sara orat sipuririo ka polak samba tutunia siaili manua samba samalaika tugorosot ka orat nenda.

¹³ Samba ka be'benia murio si Tuhan samba kuanangan, “Aku te Tuhan, Taikamanua panindogiet Abraham samba Ishak. Kuaake te geti katubum samba ka sapunuteteunu polak kudduat peremannu nene.

¹⁴ Sapunuteteunu ibailiu geti kele igit abu ka polak. Rapalio geti kupkumendra kasangaliot tutut polak, kapaneiteiatnu samba kasapunuteteunu, Kupanukani le sangamberi bangsa ka polak.

¹⁵ Repdem, Kuropmake samba kusakkeri le geti ekeu, senen kaipa nuei, samba Kuambit geti ekeu toili ka kupkumen laggai nene. Ta' Kukakaddiuake geti teret Kugalai sangamberi sipalelekKu katubum.”

¹⁶ Lepa suru si Jakob ka peremannia samba kuanangan, “si Tuhan ainia ka kudduat sene, tapoi keneigetnan le akuagainia!”

¹⁷ Bailiu malotonangan lepa kuanangan, “Maloto le sita kudduat nene! Bulatnia le nene uman Taikamanua, matat baliu gugurukat manua.”

¹⁸ Kele aimapato simanseman, suru si Jakob, lepa alanangan bukku situluniennia samba rioakenangannia bailiu bukku repdemen. Uruakenangan tulat zaitun kauddut bukku nenda addeat ikokoiakenia ka Taikamanua.

¹⁹ Kudduat nenda ioniakenia Betel; siboiki oninia Lus.

²⁰ Lepa pusuppanangan si Jakob, “Ke' si Tuhan masirop samba masisakeri aku ka puenunganan nene samba masiake katubukku komen samba bibilet

²¹ pat toiliaku ka lalep ukkuiku ka bagat arau baga, bailiunangan si Tuhan Taikamanuangku.

²² Samba bukku sirioakenenku ibailiu geti kudduat panindogat kai Tuhan. Kasangamberi siakeNu katubukku mariuriu le kupanguruatnake seperpulu katubuM.”