1Mos. 26 - BUKO SIPUNENAN

Si Ishak ka laggaira tai Filistin

¹ Ka kupkumen laggi nenda bara minca pulajeat kele sipuaaili kateteret Abraham. Si Ishak masialiake si Abimelekh, rimatatda tai Filistin, ka Gerar samba masitiddou iobaake tukuddu sedda.

² Aigalaiake nenda si Ishak kalulut ai pakoinongngan tubunia si Tuhan katubunia samba kuanangan, “Bui nuei ka Misir, kudduake le ekeu ka kupkumen laggai nene, kele siparentaakenenKu katubum.

³ Kusakkeri samba Kusukanake le ekeu geti. Sangamberi kupkumen laggai nene Kuaake te geti katubum samba katubut sapunuteteunu. Kusunnake le geti palelengan siakeKu kai Abraham ukkuinu.

⁴ Kuake le geti katubum sapunuteteu igit panyanyat ka manua, samba sangamberi kupkumen laggai nene Kukau le katubutdra. Sangamberi bangsa ka polak masitiddou geti bule Aku le masisukatnake sia kele Kusukatnake leuet sapunuteteunu.

⁵ Kususukatnake te geti kam, kalulut si Abraham mareddetnia katubukKu samba aipasikelingan sangamberi samba parentaKu.”

⁶ Oto kaddiuake le si Ishak ka Gerar.

⁷ Kele arapanounouake sirimanua sedda pagalaiat si Ribka, aleginangan si Ishak, si Ribka nenda bagikku, samba ta'sinanalepnia. Si Ishak malotonia ka sirimanua nenda ramamateiakenia addeat masibakkati si Ribka simalainge tubu nenda.

⁸ Piga pa' burunia aikuddu si Ishak sedda, kasara gogoi kinerenangan rimata Abimelekh ka jandelania, samba itconangan si Ishak ainia pauumun pasamba si Ribka, sinanalepnia.

⁹ Iageti sogainangan si Abimelekh si Ishak samba kuanangan, “Ta'pa sinanalep nenda sinanalepnu? Angoi nukua nia bagim?” Aleginangan si Ishak, “Kupaatu, ramamateiake aku ke'kukua, nia sinanalepku.”

¹⁰ Kuanangan si Abimelekh, “Aponia anugalaiake katubumai? Sara katalagat taikaumangku momoi le iperep ka sinanalepnu, ke'bai nenda muaili, ekeu le masibairat puseleatmai nenda.”

¹¹ Lepa geti parepdepnangan si Abimelekh sangamberi taikaumania kise, “Kasei masigeugeu sirimanua nene ele sinanalepnia, tuukum matei le geti.”

¹² Karapmakenangan uremen si Ishak addeat mangurep ka kupkumen laggai nenda, samba rura nenda bara buania sangotu ngaminca igit sikarapmakenennia, kalulut aisukatnakenia si Tuhan.

¹³ Pukayoatnia memei itutuppai samba bailiunangannia simakope kayo.

¹⁴ Tai Filistin matutu baga le katubunia kalulut maigi paguguletnia, mungkuat biribiri samba jaui.

¹⁵ Lepa palabbukirangan polak sangamberi uggungan sigaigai sapagugulet Abraham, ujut ai purimanua si Abraham.

¹⁶ Lepa geti kuanangan si Abimelekh kai Ishak, “Kaddiuake laggaimai. Makopean le anumagege katubumai.”

¹⁷ Oto, tuitui si Ishak samba musapou ka peleu Gerar. Sedda kuddunia piga pa' ujunia.

¹⁸ Gaigainangan minca uggungan sigaigai kateteret Abraham samba sipalabbura tai Filistin lepat ai matei si Abraham. Sangamberi uggungan nenda tukauoni simakere kele sikau ukkuinia.

¹⁹ Sapagugulet Ishak masigaigai uggungan ka peleu Gerar nenda samba seserangan oinan simalilimai.

²⁰ Tapoi sipasijajago tarimeu ka Gerar paukle pasamba sipasijajago tarimeu Ishak. Kuarangan, “Oinan nene kai le sibakkatnia.” Lulut nenda oniakenangan si Ishak uggungan nenda “Paukelat”.

²¹ Sapagugulet Ishak masigaigai minca uggungan bagei, iageti bara paukelat pagalaiat uggungan nenda leuet. Lulut nenda oniakenangan si Ishak uggungan nenda “Pasaggangan”.

²² Lepa geti tuituinia sedda samba gaigainangan minca uggungan bagei. Pagalaiat uggungan nene ta'abara paukelat. Lulut nenda, oniakenangan si Ishak uggungan nenda “Kabelaiat”. Kuanangan, “Kineiget aiakean ka sita si Tuhan oggak mukuddu ka kupkumen laggai nene, samba bailiunangan sita geti simakayo murimanua sene.”

²³ Lepa geti kaddiuakenangan si Ishak kudduat nenda samba sege' ka Bersyeba.

²⁴ Ka soibo nenda patoilanangan tubunia si Tuhan katubunia samba kuanangan, “Aku te Taikamanuan ukkuini si Abraham. Bui numaloto', Aku masipaalei ekeu. Kususukatnake te geti ekeu samba Kuaake te geti katubum sapunuteteu simaigi kalulut palelenganKu ketubut Abraham, paguguletKu.”

²⁵ Iageti rioakenangan si Ishak kudduat pasibuluat samba masipanindougi si Tuhan kakudduat nenda. Pukemanangan sedda samba sapagugulet leu masigaigai uggungan bagei.

²⁶ Ka sara gogoi oi si Abimelekh barania ka Gerar, pasamba si Ahuzat, sipangantrunia, samba si Pikhol, panglima saladdunia masiailiake si Ishak.

²⁷ Iageti parerenangan si Ishak, “Angoi anuoi kam masiailiake aku kineiget, siboki nusaggangi samba nutuituiake le kam aku ka kupkumen laggaimui?”

²⁸ Lepa alegirangan, “Kineiget kuagai kai, si Tuhan le masipaalei ekeu, lulut nenda kuamaian maeru peile tabaraakekam palelengan. Pusuppa le,

²⁹ ta'an te geti nugagalai katai katubumai, kele kai leuet taan kugagalaikai katai katubum. Amuparaboatnankai simaeru katubum samba masiobaake ekeu mutuitui kabagat aban. Amakolouan kakai si Tuhan le masipanukani ekeu.”

³⁰ Lepa geti tarekngakenangan komen si Ishak, iageti pukomrangan samba mulo.

³¹ Patonia simansenan pusupparangan senenda. Iageti obaakenangan raputuiutui si Ishak, samba kaddiuakerangannia kabagat aban.

³² Ka gogoi nenda leuet oi sapagugulet Ishak samba masipaagai katubunia pagalaiat uggungan sigaigaira. Kuarangan, “Aku sesengan kai oinan.”

³³ Iageti oniakenangan si Ishak uggungan nenda “Suppa”. Nenda te pubakkanannia ituoniake laggai nenda Bersyeba.

³⁴ Kateteret si Esau ainia epat pulu ngarura, putalimounangan pasamba rua taiokko sibara ka suku bangsa Het, iate Judit togat Beeri, samba Basmat togat Elon.

³⁵ Karua tainanalep nenda masibaraake pubesikat paatuat Ishak samba si Ribka le.