1Mos. 25 - BUKO SIPUNENAN

Sapunuteteu Abraham sibara ka sinanalepnia ka bagei

¹ Si Abraham mutalimou minca pasamba sara sinanalep sipuoni si Ketura.

² Sinanalepnia nenda tutuakenangan matat toga simanteu sipuoni: Zimran, Joksan, Medan, Isybak, samba Suah.

³ Si Joksan ukkui Syeba samba Dedan, samba punuteteu Dedan iate tai Asyur, tai Letus, samba tai Leum.

⁴ Tatogat Median iate si Efa, Efer, Henokh, Abida, samba Eldaa. Sangamberitdra sapunuteteu Ketura.

⁵ Kenanen aiikepmakean si Abraham sangamberi pukayoatnia kai Ishak,

⁶ ujut puririmanuania maigi aikau panguruat ka tatogania sibara ka sinanalepnia sabagei. Lepa geti koiniakenangan tatoga nenda mujaujau kakupkumen laggai ka isit kabelaiat sulu Kanaan, bule tuareu kai Ishak, togania.

Kamateiat Abraham samba turateiake

⁷ Si Abraham aiailingannia sangotu pitu pulu lima ngarura,

⁸ lepa mateinia. Ai matei kateteret amabulauan alainia, amabajaannia, iageti ruruakerangannia ka muntogat taikebbukatnia.

⁹ Tatogania si Ishak samba Ismael rateiakerangannia kabagat ngaliu Makhpela, sikuddu ka mone ka isit kabelaiat sulu Mamre. Siboiki mone nenda sibakkatnia si Efron togat Zohar, tai Het,

¹⁰ tapoi lepat aisakinia si Abraham ka tai Het nenda. Si Sara, sinanalep Abraham leu turateiake sedda.

¹¹ Kele ai matei si Abraham, sukatnakenangan Taikamanua si Ishak, togat Abraham. Kateteret nenda si Ishak mukuddu ka bebet uggungan sipouni “Nia sipuletsei Aku”.

Sapunuteteu Ismael

¹² Si Ismael iate togat Abraham samba Hagar, sinanalep tai Misir, pagugulet Sara.

¹³ Nene onin tatogat Ismael siripokat reddenan putu'tukat matatdra: Nebayot, Kedar, Adbeel, Mibsam,

¹⁴ Misyama, Duma, Masa,

¹⁵ Hadad, Tema, Jetur, Nafish samba Kedma.

¹⁶ Tatoga nenda te ibailiu taikebbukat pulu rua suku bangsa, samba laggai sabeu samba pusapougatda tukua siripokat onindra.

¹⁷ Kateteret ailango si Ismael ainia sangotu telupulupitu ngarura.

¹⁸ Sapunuteteunia mukuddu ka kupkumen laggai kaoggak Hawai samba Syur ka kabelaiat sulu Misir ka isit Asyur. Rapurimanua sipasasara le ka sapunuteteu Abraham sabagei.

Pututukat matat Esau samba Jakob

¹⁹ Nene te enungan puririmanuan Ishak, tagat Abraham.

²⁰ Kateteret ai si Ishak epat pulu ngarura, putalimounangan kai Ribka, bagit Laban, togat Betuel, sara tai Aram sibara ka Mesopotamia.

²¹ Kalulut si Ribka ta'anai tuppai tubunia, panindounangan si Ishak kai Tuhan addeat sinanalepnia. Samba si Tuhan aiarepi le panindogat Ishak, pat pusurukatnangan si Ribka.

²² Si Ribka masisuruket toga tairua, samba kepei mutu'tu mata tatoga nenda, paguilerangan aisia ka suruketnia. Kuanangan si Ribka, “Angoi kele kise muaili katubukku?” Iageti tiddounangan enungan kai Tuhan.

²³ Kuanangan si Tuhan katubunia, “Rua bangsa ai ka suruketnu, nutu'tuake geti rua bangsa sipasasaggak, baginia peile magege ka kebbunia sikebbukat mupagugulet ka sisule.”

²⁴ Kele aiaili tetere ipusule si Ribka, tu'tuakenangan rua tatoga simanteu.

²⁵ Si kebbukat tubunia simakabonan samba kulitnia kele juba simabulu. Lulut nenda tuoniakenia Esau.

²⁶ Kateteret aipututu mata baginia, kabeinia aiuuka bukkut reret Esau. Lulut nenda tuoniake Jakob. Kateteret arapututu mata tatoga nenda si Ishak ainia enem pulu ngarura.

Si Esau masisakiake pusisikebbukatnia

²⁷ Karua tatoga nenda memei muurau sia. Si Esau ibailiu sipangungungru simaeru samba ioba mukuddu ka su'su', tapoi si Jakob simakolou tubu samba ioba mukuddu ka lalep.

²⁸ Si Ishak manuntu pei le bagania kai Esau, aipoi si Esau ioba mukom akkula tarimeu sipana. Tapoi si Ribka manuntu pei le bagania kai Jakob.

²⁹ Ka sara gogoi kateteret ai maneneu gulei kacang simabonan si Jakob, oi si Esau barania kapangungkuratnia. Malajenia.

³⁰ Kuanangan kai Jakob, “Malaje aku. Ake pei goiso kacang simabonan nenda.” (Nenda te lulunia tukuania Edom.)

³¹ Aleginangan si Jakob, “Maeruan, tapoi ake boiki bakkat ikepakenen siripokat pusisikebbukat.”

³² Kuanangan si Esau, “Apananku pubabakkat nenda. Mateian le aku laje!”

³³ Kuanangan si Jakob leuet, “Pusuppa boiki, aakenu pubabakkanu katubukku.” Pusuppanangan si Esau samba kaunangan pusisikebbukatnia kai Jakob.

³⁴ Lepa nenda kaunangan si Jakob katubunia roti samba sangarubeiat kacang simabonan nenda. Pukomnangan si Esau samba pulonangan lepa tuinia. Kise te' aipuarak si Esau pubabakatnia sibailiu toga sikebbukat.