1Mos. 22 - BUKO SIPUNENAN

Isibo Taikamanua tonem bagat Abraham

¹ Piga pa' tetere tusabau sibonangan Taikamanua nuntut bagat Abraham. Pasogainangan Taikamanau, “Abraham!” Lepa aleginangan si Abraham, “Oi, Tuhan.”

² Kuanangan Taikamanua, “Kenan le ka laggai Moria pasamba si Ishak, togam sisasara, simakiliu baga samba panguruatnakenia sedda sibailiu buluakenan sirarak ka sara leleu sinausauKu katubum.”

³ Kele aimapato simanseman, pokpoknangan loina si Abraham addeat buluakenan silabo samba apraakenangan loina nenda ka uddut kalideinia. Tuituinia pasamba si ishak samba rua sapaguguletnia nenda kakudduat sikuat Taikamanau katubunia.

⁴ Ka gogoi sikatelu itconangan si Abraham kudduat nenda mareunan peile.

⁵ Lepa kuanangan katubut sapaguguletnia, “Kudduakean kam sene pasamba kalidei nene. Aku samba togaku mei le sedda manindou kai Tuhan, lepa toili kai minca katubumui.”

⁶ Lepa alanangan si Abraham loina nenda kaunangannia ka ta'tat Ishak ibairatnia, samba si Abraham aiaambit obengan samba pisau. Ai sia mueenung simakere,

⁷ kuanangan si Ishak, “Ukkui!” Aleginangan si Abraham, “Apa sirou?” Panounounangan si Ishak, “Ataambitnan obengan samba loina, tapoi kaipa togat biribiri rarangen buluakenen nenda?”

⁸ Aleginangannia si Abraham, “Taikamanua le geti masitatarekngake togat biribiri nenda.” Lepa riuriuakerangan rapuenung rudda.

⁹ Kele arasege ka kudduat sukuat Taikamanua katubunia. Rioakenangan si Abraham sara kudduat pasibuluat samba pagalaknangan loina nenda ka uddutnia. Iageti kabenangan si Ishak, togania nenda samba galakngakenangannia ka kudduat pasibuluat, ka uddut loina siruruakenennia nenda.

¹⁰ Lepa nenda alanangan palitteinia ipunu togania.

¹¹ Tapoi mugerei le malaikat Tuhan barania ka manua katubunia, “Abraham, Abraham!” Aleginangan si Abraham, “Oi, Tuhan.”

¹² “Bui nubesiki toga nenda ele bui nugalai apa pa' katubunia,” ngangan Tuhan kapaneiteiat malaika nenda. “Kineneiget Akuagaian, masuru' samba mareddet le ekeu katubukKu. Kalulut ta'nukera nuake togam sisasara nenda katubukKu.”

¹³ Lepa pitcaakenangan matania si Abraham samba itconangan sangamuneng biribiri simanteu ka teiteinia, bannia aisasakkut se'se. Alanangan si Abraham biribiri nenda, lepa panguruatnakenangannia kai Tuhan sibailiu buluakenen sirarak silit togania.

¹⁴ Oniakenangan si Abraham kudduat nenda, “Si Tuhan masipatarek apa simagulai.” Teret kineiget rakua sirimanua, “Ka uddut leleuNia, si Tuhan masipatarek apa simagulai.”

¹⁵ Pusoganangan Malaikat Tuhan sikaruania kai Abraham,

¹⁶ “Kuanangan si Tuhan: Musuppa le Aku ka oningKu, kalulut anugalaian poi pagalaiat nene samba ta'anukera masiake togam sisasara nenda katubukKu,

¹⁷ Kupanukani le geti ekeu simariuriu samba kugalai le muntogatnu kele igit panyanyat ka manua samba igit ngai ka be'bet koat. Sapunuteteunu geti rakalaake le saggakdra.

¹⁸ Sangamberi bangsa ka polak ratiddou le geti katubukKu bule Kusukatnake sia, kele leuet Kupanukani sapunuteteunu, kalulut anureddetnan poi perentaKu.”

¹⁹ Lepa nenda toili si Abraham katubut sapaguguletnia, iageti ei sia simakere ka Bersyeba, samba si Abraham kuddunia sedda.

Sapunuteteu Nahor

²⁰ Ai kebbut Abraham sipuoni si Nahor. Lepat sipuaaili ka leleu Moria nenda, arepnangan si Abraham, si Milka sinanalep Nahor aian balu tatogania simanteu, iate:

²¹ sikebbukat si Us, baginia si Bus samba si Kemuel, lepa geti bailiu ukkui Aram,

²² Kesed, Hazo, Pildas, Jidlaf, samba Betuel,

²³ lepa geti bailiu ukkui Ribka. Nenda te balu tatoga sinutuakenen Milka kai Nahor, sarainan Abraham.

²⁴ Si Nahor ai umunakenennia oninia si Reuma, samba umunnakenennia nenda tutuakenangan mata Tebah, Gaham, Tahas, samba Maakha.