1Mos. 20 - BUKO SIPUNENAN

Abraham samba Abimelekh

¹ Lepa tuitui si Abraham barania ka Mamre ka isit kakaiaman polak Kanaan, samba kuddunia katalagat Kades samba Syur. Pasat pigangagogoi pa', kateteret aikuddu ka Gerar,

² kuanangan si Abraham, si Sara sinanalepnia iate baginia. Kalulu nenda rimata Abimelekh sibara ka Gerar masikoiniake pakoiniennia masiambit si Sara katubunia.

³ Ka sara soibo patoilanangan tubunia Taikamanua katubut rimata nenda kabagat pangamutet, samba kuanangan, “Mamatei le ekeu, kalulut anualaan poi sinanalep nenda, aipoi aian simanteunia.”

⁴ Tapoi si Abimelekh ta'pei airape si Sara, iageti kuanangan rimata nenda, “Tuhan, ta'masele aku! Tuhan numamateiake leu pa' aku samba bangsaku?

⁵ Si Abrahan le amasikua, sinanalep nenda baginia, samba sinanalep nenda leu masikua kisedda leu et. Aku galaiake kele nenda kabagat linat paatuat, ota ta'masele aku.”

⁶ Iageti aleginangan Taikamanua kabagat pangamutet nenda, “Kerenangan, Kuagai, nugalaiakenia ka paatuat simalina. Kalulut nenda te Akukekreake ekeu masigalai jo katubukKu, samba ta'Kuobaake nurape sinanalep nenda.

⁷ Tapoi kineneiget, toiliakenia ka simanteunia. Simanteunia sara nabi, samba manindou te getinia bule bui numatei. Tapoi, ke'tanotoiliakenia, repdep, ekeu samba sangamberi taikauman metei le geti!”

⁸ Mansep simansep sogainangan si Abimelekh sangamberi paguguletnia samba paagainangan katubutra sangamberi sipuaaili nenda. Bailiu malotorangan somakope.

⁹ Lepa nenda si Abraham masisogai si Abimelekh samba kuanangan, “Apa anugalaiake katubumai? Apa selekku katubum, pat baraakenungan sibabara nene katubukku samba kapurimataatku? Bulat ta'mateu nugalaiake kele nenda katubukku.

¹⁰ Angoi nugalaiake kasedda?”

¹¹ Aleginangan si Abraham, “Kupaatu le, sene ta'anai sirimanua simaloto ka Taikamanua, bailiu mateiakerangan geti aku sirimanua simakiddi ka baga ka sinanalepku.

¹² Sara pei nia bagiku. Kai sisara ukkui, tapoi ina ta'makere, lepa geti putalimoumaian.

¹³ Kateteret aikoiniake aku Taikamanua masikaddiuake lalep ukkuiku samba mujaujau kalaggai sirimanua. Kuakungan ka sinanalepku, ‘Pakoinong nuntut bagam katubukku pasamba masikua kasenen sirimanua, aku nene kebbunu.’ ”

¹⁴ Lepa nenda si Abimelekh toiliakenangan si Sara kai Abraham, samba kateteret nenda ikau leuet sapagugulet, biribiri samba jaui.

¹⁵ Kuanangan rimata nenda kai Abraham, “Nene te sangamberi laggai kupkumenku, pukuddu kaipa siobat bagam.”

¹⁶ Lepa kuanangan kai Sara, “Aku kauan ka kebbunu sangaribu bulagat perak sibailiu toggaiat kasangamberi sirimanua, ekeu bulatnia ta'masele.”

¹⁷ Lepa panindounangan si Abraham ka Taikamanua, samba Taikamanua masialeake si Abimelekh samba sinanalepnia samba sapakoiniennia sinanalep, pat tu'tuakerangan matat togadra.

¹⁸ Aipoi siboiki si Tuhan aigalaian sangamberi tainanalep ka purimataat Abimelekh ilatukngake le' sia, kalulut sipuaaili kai Sara, sinanalep Abraham nenda.