1Mos. 17 - BUKO SIPUNENAN

Sunat sibailiu toggaiat palelengan

¹ Kateteret si Abram ainia siba pulu siba ngarura, patoilanangan tubunia si Tuhan katubunia samba kuanangan, “Aku te Taikamanua Sipulugege. Retdet tibo'etKu samba galaiake siobagat bagaKu simareirei.

² Kuaapra le geti palelengan pasamba ekeu samba masiake katubum sapunuteteu simaigi.”

³ Iageti purekuknangan si Abram, lepa geti kuanangan Taikamanua,

⁴ “Nene te palelengan sigalaiKu pasamba ekeu: Kupalelek le, ibailiu le geti ekeu taikebbukat bangsa simigi.

⁵ Lulut nenda onim ta'an si Abram, tapoi si Abraham.

⁶ Kuaake le geti katubum sapunuteteu simaigi, samba katalagatra dda ai te geti ibailiu tai rimata. Sapunuteteunu maigi le geti, bailiu le sia sabangsa-bangsa.

⁷ Kususunnake le geti palelenganKu katubum samba ka sapunuteteunu, siprereddenan, samba palelengan nenda tamasususu'. Aku ibailu Taikamanuam samba Taikamanuan sapunuteteunu.

⁸ Kuaake le geti katubum samba ka sapunuteteunu, polak nene, kuddujietnu kineneiget sibailiu sirimanua sitoi. Sangamberi polak Kanaan ibailiu le geti bakkatda sapunuteteunu teret buru-buru samba Aku ibailiu le geti Taikamanuandra.”

⁹ Kuanangan minca Taikamanua kai Abraham, “Ekeu leuet buita nuukaake palelenganKu nene, ekeu samba sapunuteteunu sipurereddenan.

¹⁰ Ekeu samba sangamberi sapunuteteunu simanteu buita tusunat.

¹¹ Barania kineneiget buita tusunat senen tatoga simanteu sipurura balu ngagogoi, samba sapaguguletnu sipututumata ka lalepnu ele sisakim.

¹² Sunat nenda ibailiu le geti toggaiat ka palelengan katalagat Aku samba ekeu.

¹³ Senen sirimanua buita tusunat, samba nenda ibailiu le geti toggaiat pupolangan masipakoinong, palelenganKu pasamba ekeu nenda tamasususu'.

¹⁴ Senen taimanteu sitaisusunat ta'an tuaadeakenia minca laddou paamianKu kalulut ta'aiukkaake palelengan nenda.”

¹⁵ Lepa geti kuanangan Taikamanua kai Abraham, “Ba'an sosogai minca onin sinanalepnu si Sarai; barania kineneiget oninia Sara.

¹⁶ Kupanunukani le geti nia samba itutuake le geti matat sara tatoga simanteu akenenKu geti katubum. Oo, Kususukanake le geti si Sara, samba bailiunia inan sangamberi bangsa. Katalagat sapunuteteunia geti ai tai rimata.”

¹⁷ Lepa pulukkuknangan si Abraham, tapoi mugaga samba ikua le kapaatuatnia: “Kaipa te iooi ibara sara tatoga katubut sara simanteu sangotu ngarura? Kaipa te iooi itutuake matat tatoga si Sara siba pulu ngarurangannia?”

¹⁸ Lepa kuanangan ka Taikamanua, “Simerunia si Ismael le sibailiu sipasiikepku.”

¹⁹ Tapoi kuanangan Taikamanua, “Taa. Sinanalepnu si Sara itutu'tuake te geti matat tatoga simanteu samba oniakenungannia geti si Ishak. Kureddet le geti palelenganKu pasamba toga nenda samba sapunuteteunia teret buru-buru. Palelengan nenda tamasususu'.

²⁰ Tapoi akuarepingan leuet panindogatnu pagalaiat si Ismael, kalulut nenda Kususukatnake leuet nia samba Kukau sapunuteteu simaigi. Ibailiu le geti nia taikebbukat pulu rua utet suku, samba sapunuteteunia Kubailiuake le geti sara bangsa sabeu.

²¹ Tapoi palelenganKu, Kuaapre le geti pasamba si Ishak, togam itututuake geti Sara, karura kamata kagogoi kele nene leuet.”

²² Lepat aikua kasedda, kaddiuakenangan Taikamanua si Abraham.

²³ Ka gogoi nenda leuet, si Abraham reddetnangan tiboiet Taikamanua samba masisunat si Ismael togania, samba sangamberi sirimanua simanteu kabagat lalepnia, samba sapagugulet sipututu mata ka lalepnia ele sisakinia.

²⁴ Si Abraham ainia siba pulu siba ngarura, kateteret ai tusunatnia

²⁵ samba si Ismael togania, ainia pulu telu ngarura.

²⁶ Tusunat sia ruadda ka gogoi simakere,

²⁷ pasamba sangamberi pagugulet Abraham.