1Mos. 15 - BUKO SIPUNENAN

Palelengan Taikamanua pasamba si Abram

¹ Lepat nenda, silonangan si Abram itcotmata samba masiarep ipanibo si Tuhan katubunia, “Bui numaloto', Abram, Aku le sakkeratnu samba masiake katubum upa sabeu.”

² Tapoi kuanangan si Abram, “Tuhan Kapata apangan le lulunia upa nenda kaku, kalulut togakku ta'anai. Sirimanua sipasiikep pukayoatku sarat si Eliezer le, paguguletku sibara ka Damsik.

³ Taanupanguruatnake toga katubukku. Lulut nenda sipasiikepmake pukayoatku sarat sara sirimanua sibara ka paguguletku.”

⁴ Lepa geti arepinangan si Abram ipanibo si Tuhan katubunia, “Ta'paguguletnu geti ibabailiu sipasiikep pukayoatnu, tapoi togam simanteu le.”

⁵ Si Tuhan masiambit si Abram ka uja lepa kuanangan kamatania, “Kinere le ka manua samba sibo masiadde sangamberi panyanyat; babara te geti sapunuteteunu kele igit panyanyat nenda.”

⁶ Matonen le bagat Abram kai Tuhan, samba kalulut nenda isilo le nia si Tuhan sibailiu sirimanua siangkaake bagaNia.

⁷ Lepa geti kuanangan minca si Tuhan katubunia, “Aku te si Tuhan, sipaneinei ekeu bela baram ka laggai Ur ka Babilonia, masiake polak nene kekeu bule ibailiu bakkatnu.”

⁸ Tapoi parerenangan si Abram, “Oi, Tuhan Kapata, kipa iooi kuagai polak nenda ibailiunia bakkatku?”

⁹ Aleginangan si Tuhan, “Ala le addeatKu sangamuneng jaui sinanalep, sangamuneng kambing sinanalep samba sangamuneng kambing simanteu, rurania senenia bui'ta telungarura, samba ala leuet sangamunenga limendeu samba sangamuneng ngorut.”

¹⁰ Lepa alanangan si Abram sangamberi tarimeu nenda rubeiat kai Tuhan. Jaui, kambing samba biribiri nenda senenia silanangannia bailiu rua, samba sipasila nenda galakngakenangania sipamamatai, kabagat rua ngatunan. Tapoi sangamberi uma' nenda ta'aipabekka.

¹¹ Akkulat tarimeu nenda ileuki le sangamberi uma' sipasikokom simabute, tapoi iusinangannia si Abram.

¹² Kele aibele sulu, maunengnangan si Abram. Sinulut bara lotot tubunia siamkope.

¹³ Kuanangan si Tuhan katubunia, “Repdep le, sapunuteteunu ibailiu le geti sitoi ka laggai bagei; ibabailiu le geti sia sedda pagugulet samba tubesiki le sia epatngotu ngarura ujunia.

¹⁴ Tapoi bangsa sipakoini sapunuteteunu nenda Kuukum le geti samba kateteret rakaddiuake sapunuteteunu laggai nenda, ambitrangan te geti pukayoat simigi.

¹⁵ Ekeu geti itutuppai le ruram; matei le geti ekeu ka angkat baga, samba rateiake.

¹⁶ Pasat epat ngareddenan, sapunuteteunu toili minca sene, kalulut ta'Kututuituiake tai Amori bulat makatai sia.”

¹⁷ Kele ai masoibo, sinulut bara sara obengan sipukukujuk samba solo' siputotoro, iageti sabau kapaoggangan sinilakat akkula tarimeu nenda.

¹⁸ Keteteret nenda leuet baraakenangan si Tuhan palelengan pasamba si Abram. Ngangan Tuhan, “Katubut sapunuteteunu te Kukakau laggai nene, barania ka pasongan laggai Misir teret ka bagat oinan Efrat,

¹⁹ samba leuet polakra tai Keni, Kenas, Kadmon,

²⁰ Het, Feris, Refaim,

²¹ Amori, Kanaan, Girgasi samba Jebus.”