1Mos. 14 - BUKO SIPUNENAN

Si Abram masiropmake si Lot

¹ Epat tai rimata, iate rimata Amrafel sibara ka Babilonia, Ariokh sibara ka Elasar, Kedorlaomer sibara ka Elam, samba Tideal sibara ka Goyim,

² pasaggak masisaggangi lima tai rimata bagei, iate Bera sibara ka Sodom, Birsya sabara ka Gomora, Syinab sibara ka Adma, Semeber sibara ka Zeboim, samba rimata sibara ka Bela oniakenen leuet Zoar.

³ Kalima rimata nenda mukerebaga samba masiruruake saladdutda ka peleu leleu Sidim, kineiget tuoniake Koat Simamatei.

⁴ Puluruanga rura ujunia ikupkup sia si rimata Kedorlaomer, tapoi karura sikapulu telunia, pugegerangan masisagganinia.

⁵ Kabagat rura sikapulu epet, si Kedorlaomer samba sekutunia moi pasamba saladdutda samba masikalaake tai Refaim ka Asyterot-Karnaim, tai Zuzim ka Ham, tai Emim ka Syawe-Kiryataim,

⁶ samba tai Hori ka paleleleleu Edom, lepa kukrurangan sia teret ka El-Paran ka bebet leleu simatangeu.

⁷ Lepa nenda sipasikukukru nenda soksokrangannia minca samba toili sia ka En-Mispat oniakenen kineiget Kades. Kalaakerangan sangamberi laggai Amalek samba leu kalaakerangan tai Amori sikukuddu ka Hazezon-Tamar.

⁸ Lepa geti tai rimata sibara ka Sodom, Gomora, Adma, Zeboim samba Bela masipakuddu patunan saladdutda ka peleu leleu Sidin iageti pasaggak

⁹ masisaggangi tai rimata sibara ka Elam, Goyim, Babilonia, samba Elasar; oto, lima rimata masisaggangi epat rimata.

¹⁰ Peleu leleu nenda sun le uggungan aspal, samba kateteret tai rimata sibara ka Sodom samba ka Gomora rabesiake masituituiake tubu ka pasaggangan, bele sia ka uggungan nenda. Telu tai rimata bagei amoi arabele samba tuitui ka leleu.

¹¹ Kaepat rimata simamanang, masiraurau sangamberinia ka Sodom samba Gomora, guru'kabagania galajet komen, iageti tuitui.

¹² Si Lot momoi' Abram leu kudduatnia ka Sodom, lulut nenda ia leuet rambit taisaggak pasamba sangamberi pukayoatnia.

¹³ Tapoi sara sirimanua siooi bela segeake sangamberi sipuaaili nenda katubut Abram, tai Heber nenda. Ikukuddu si Abram kabebet loina keramat, kudduat panindogat sara tai Amori sipuoni si Mamre. Si Mamre samba sarainania, si Eskol samba Aner, iate saalei pakereakenen bagat Abram.

¹⁴ Kele aiarep si Abram, momoi tukabenia, ruruakenangan sangamberi sirimanua ka pusapougatnia, iate siagai pasaggak, igitra telungotu pulubalu sia, iageti kukrurangan epat tai rimata nenda teret ka laggai Dan.

¹⁵ Sedda rubeinangan si Abram sirimanuania bailiu piga ngarubeiat pa', iageti saggangirangan saggak kateteret sinoibo samba masikalaake sia. Kukrunangan sia teret ka Hoba ka isit kabare' laggai Damsyik.

¹⁶ Iageti oinangan aiala minca si Abram bibilet silepa turaurau, samba leuet si Lot pasamba sangamberi pukaioatnia, samba tainanalep samba sia sabagei sikabe'.

Si Melkisedek masisukatnake si Abram

¹⁷ Lepat aitukalaake rimata Kedorlaomer pasamba tai rimata sekutunia, toili si Abram. Iageti rimata Sodom ei masiailiake nia ka peleu leleu Syawe oniakenen leu peleu Leleu Rimata.

¹⁸ Si Melkisedek, rimata Salem, ia leuet sibailiu imam Taikamanua Kapata, masiambit roti samba anggur addeat kai Abram,

¹⁹ iageti sukatnakenangan si Abram, kuanangan, “Bule Taikamanua Kapata, sipasigagalai manua samba polak masipanukani si Abram!

²⁰ Umun Taikamanua ka Pata, sipasiaake katubum kamamanang ka taisaggaknu.” Lepat nenda kaunangan si Abram kai Melkisedek seperpulu sibara kasangamberi bibilet siraurau siambitnia minca.

²¹ Lepa kuanangan rimata Sodom kai Abram, “Toiliake le kaku sirimanuangku nenda, samba alaan le kekeu bibilet nenda.”

²² Tapoi aleginangan si Abram, “Musuppa le aku kamatat Tuhan, Taikamanua ka Pata, Sipasigagalai manua samba polak,

²³ ta'an kuaala aponia pa bakkatnu nenda, sangatippu banang ele talit tarangai. Bule bui'ioi nupasikua, “Aku te amasigalai si Abram ai makayo.”

²⁴ Ta'kuaoba kuala aponia pa addeatku saraku. Sarat kuoba le masisilo apa sipakeira sirimanuangku. Tapoi eddangan sipaaleiakenenku, si Aner, Eskol samba Mamre, masiala rubeiatra senenda.”