1Mos. 12 - BUKO SIPUNENAN

Taikamanua masisogai si Abram

¹ Kuanangan si Tuhan kai Abram, “Kaddiuake laggainu, muntogatnu samba lalep ukkuinu, iageti ei ekeu ka laggai sinausauKu geti katubum.

² Kuaake te geti katubum sapunuteteunu simaigi samba sia ibailiu le geti bangsa sabeu. Kupanukani le geti ekeu samba masigalai onim tuabeu, teret bailiunangan geti ekeu panguruat.

³ Kupanukani le geti sirimanua sipanukani ekeu samba masitelei sirimanua sipateleiji ekeu. Samba kalulut ekeu le Kupanunukani geti sangamberi bangsa ka polak.”

⁴ Si Abram ainia pitu pulu lima ngarura kateteret aikaddiuake Haran, siripot parentat Tuhan katubunia.

⁵ Si Abram mei ka Kanaan pasamba si Sarai sinanlepnia, samba si Lot bua'nia, samba masiambit sangamberi pukayoat samba pagugulet sinesetra ka Haran. Kale arasege ka Kanaan,

⁶ silaijinangan si Abram polak nenda pat segenia ka loina keramat ka More, iate kudduat panindogat ka Sikhem. (Kateteret nenda tai Kanaan aipeile rakukudduiji polak nenda.)

⁷ Patoilanangan tubunia si Tuhan kai Abram samba kuanangan katubunia, “Nene te laggai akenenKu geti kasapunuteteunu.” Lepa rio'akenangan si Abram sara kudduat pasibuluat sedda addeat Tuhan sipasitotoilaake tubu ka tubunia.

⁸ Lepa nenda riuriuakenangan puenunganannia ka isit kabare, kasimaleleu ka isit kabelaiat sulu laggai Betel, samba musapou kapaoggangan Betel samba Ai ka isit kabelaiat sulu. Sedda leuet rioakenangan kudduat pasibuluat samba manindou kai Tuhan.

⁹ Lepa geti riuriuakenangan minca puenunganannia barania ka kudduat sara ka kudduat begei, masiailiake ka isit kaiaman polak Kanaan.

Abram ka Misir

¹⁰ Tapoi ka Kanaan ai pulajeat simakope, pat si Abram ei peile nia kareunan ka isit ka bare, ka laggai Misir mukuddu sadda teret itusabeu pulajeat nenda.

¹¹ Kateteret aigejengi pasongan samba tuguru' ka laggai Misir, kuanangan kasinanalepnia kai Sarai, “Malainge ekeu, sinanalepku.

¹² Ke'bai raitco ekeu tai Misir, suksukrangan geti, ekeu sinanalepku lepa bui'taramateiake aku samba ekeu raobaake murimanua.

¹³ Oto semaerunia tenan ekeu kua, ekeu bagikku bule tuobaake kupurimanua samba tukauaku maeru kalulut ekeu.”

¹⁴ Samba aisesengan te, lepat aigejengi si Abram pasongan samba sege ka laggai Misir, tai Misir masiitco, si Sarai bulat malainge tubunia.

¹⁵ Piga pa' sipugagalai ka uma purimataat masiitconia samba masipaagai katubut rimata kopet laingenia sinanalep nenda; lulut nenda tuambitnia ka kudduat purimataat.

¹⁶ Kalulut si Sarai, si rimata galainangan simaeru katubut Abram samba kaurangan katubunia sapagugulet, mungkuat biribiri samba kambing, jaui, kalidei samba unta.

¹⁷ Tapoi kalulut si rimata aiala si Sarai, baraakenangan si Tuhan senengamata besi simakope besi kai rimata samba sirimanua kabagat uma purimataatnia.

¹⁸ Lepa sogainanagan rimata si Abram samba kuanangan katubunia, “Apa anugalaiake katubukku nene? Angoi taanukua si Sarai nene sinanalepnu?

¹⁹ Angoi nukua si Sarai nene bagim samba nuobaake kualania ibailiunia sinanalepku? Aikoinia, sinanalepnu; alaan samba tuituiake ekeu!”

²⁰ Kaunangan parenta si rimata katubut piga pa sipugagalainia, samba belakerangan si Abram ka laggai nenda pasamba sinanalepnia samba sangamberi bakkatnia.