1Mos. 11 - BUKO SIPUNENAN

Menara Babel

¹ Kapanandatnia, sabangsa ka sangalio polak sara le nganga samba sia masipakei tiboiet simakere.

² Kateteret arapujaujau ka isit kabelaiat sulu, sege sia kasara polak simalio ka Babilonia, lepa kuddu sia sedda.

³ Patiborangan pasasambatda, “Konan tagalaikam bukku bagata samba laborangannia terei imakela.” Kisedda te aibara bukku bagata addeat bukkut lalep samba ter addeat pasiottotnia.

⁴ Kuarangan, “Konan tarioakekam laggai pasamba sara menara tu'tunia teret ka manua, bule tuabeu sita samba ta'ipasasaragai sita ka sangliao polak.”

⁵ Iageti gorosot si Tuhan masiitco laggai samba menara sirioakenen sirimanua.

⁶ Lepa Kuanangan, “Sia nene sara bangsa sara nganga, samba nene sibau rataadaake sibara ka pinaatutra. Taan mauuju minca momoi le ragalaiake geti apa siobakat bagatra.

⁷ Simaerunia tugororot le Sita samba masipakatai ngangandra bule pasasambagatra taan paagai sia.”

⁸ Kise te aipasabu sia si Tuhan ka sangalio polak. Lepa ari sia masirioake laggai nenda.

⁹ Aipoi laggai nenda tukau oni Babel, kalulut sedda poi aipakatai si Tuhan nganga sangamberi bangsa samba barania sedda ipasabu sia si Tuhan ka sangalio polak.

Punuteteu Sem

¹⁰ Nene te sapunuteteu Sem. Rua ngarura lepat eba sabeu, kateteret ai si Sem sangotu ngarura, bara togania sara simanteu sipuoni si Arpakhsad.

¹¹ Lepa nenda murimanua peilenia limangotu ngarura minca, samba bara tatoga begei.

¹² Kateteret si Arpakhsad ainia telu pululima ngarura, bara togania simanteu, oninia si Selah.

¹³ Lepat nenda si Arpakhsad murimanua peilenia epat ngotutelu ngarura minca.

¹⁴ Kateteret si Selah ainia telupulu ngarura, bara togania simanteu, oninia Eber.

¹⁵ Lepa nenda si Selah murinanua peilenia epat ngotutelu ngarura minca, samba bara tatoga minca.

¹⁶ Kateteret si Eber ainia telupuluepat ngarura, bara togania simanteu, oninia Peleg.

¹⁷ Lepa nenda si Eber marimanua peilenia epat ngotutelu ngarura minca, samba bara tatoga bagei.

¹⁸ Kateteret si Peleg ainia telupulu ngarura, bara togania simanteu, oninia Rehu.

¹⁹ Lepa nenda si Peleg murimanua peilenia rua ngotusiba ngarura minca, samba bara tatoga bagei.

²⁰ Kateteret si Rehu ainia telu pulu ruangarura, bara togania simanteu, oninia Serug.

²¹ Lepa nenda si Rehu murimanua peilenia ruangotu pitu ngarura minca samba bara totoga bagei.

²² Kateteret si Serug ainia telu pulu ngarura, bara togania simanteu, oninia Nahor.

²³ Lepa nenda si Serug murimanua peilenia ruangotungarura minca, samba bara tatogania bagei.

²⁴ Kateteret si Nahor ainia rua pulusiba ngarura, bara togania simanteu, oninia Tera.

²⁵ Lepa nenda si Nahor murimanua peilenia sangotu pulusiba ngarura minca samba bara tatoga bagei.

²⁶ Lepa nenda si Terah ainia pitupulu ngarura, bara telu togania simanteu, iate si Abram, Nahor samba Haran.

Punuteteu Terah

²⁷ Nene te sapunuteteu Terah: Terah ukkui Abram, Nahor samba Haran. Si Haran ai togania simateu, oninia si Lot.

²⁸ Aimatei si Haran ka laggai pututukatmatania, iate Ur ka Kasdim, kateteret aipeile muririmanua ukkuinia.

²⁹ Si Abram mutalimou kai Sarai, samba si Nahor mutalimou kai Milka togat Haran sinanalep. Si Haran aipeile togania simanteu bagei oninia Jiska.

³⁰ Si Sarai nene sitaipususule le.

³¹ Kaddiuakenangan si Terah laggai Ur ka Babilonia pasamba si Abram togania, si Lot punuteteunia, samba si Sarai talikunia, iate sinanalep Abram. Pinaatunia ioba mei ka laggai Kanaan. Tapoi kele aisege ka Haran, mukuddu sia sedda.

³² Samba ka kudduat sedda leuet matei si Terah, katetere ainia ruangotu limangarura.