1Mos. 10 - BUKO SIPUNENAN

Punuteteura tatogat Noak

¹ Nene te sapunuteteu Sem, Jafet, samba Ham, tatogat Noak. Lepat eba, katelutra bara tatoga simanteu.

² Tatogat Jafet iate si Gomar, Magog, Madai, Jawan, Tubal, Mesekh samba Tiras.

³ Sapunuteteu Gomar iate Sipulalaggai ka Askenas, Rifat samba Togarma.

⁴ Sapunuteteu Jawan iate Sipulalaggai ka Elisa, Sipanyol, Siprus samba Rodes.

⁵ Sia taikebbukat sangamberi bangsa sikukuddu ka sangantat buggei samba ka tobbou laggai. Nenda te sangamberi punuteteu Jafet. Senen bangsa samba suku mukuddu ka senen-senen laggainia, samba ai nganga senenda.

⁶ Tatogat Ham iate Kus, Misir, Libia samba Kanaan.

⁷ Sapunuteteu Kus iate sipulalaggai ka Seba, Hawila, Sabta, Raema samba Sabtekha; punuteteu Raema iate sipulaggai ka Syeba samba Dedan.

⁸ Si Kus ai togania simanteu sipuoni Nimrod sibailiu simagege siboiki ka polak.

⁹ Kaparoman Tuhan, bailiunia sipangungungru simagege. Lulut nenda sirimanua mareirei rakua, “Bule si Tuhan ibailiuake ekeu sara sipangungungru simagege kele si Nimrod.”

¹⁰ Siboiki purimataatnia silakkup Babel, Erekh, samba Akad, katelunia ka Babilonia.

¹¹ Barania sedda einia ka Asyur, lepa rioake laggai Niniwe, Rehobot-Ir, Kalah,

¹² samba Resen sikukuddu kaoggak Niniwe samba Kalah. Sengamberinia nenda iate laggai sabeu.

¹³ Sapunuteteu Misir iate sipulalaggai ka Libia, Anamim, Lehabim, Naftuhim,

¹⁴ Patrusim, Kasluhim, samba Kaftorim. Bangsa Kasluhim nenda taikebbukat bangsa Filistin.

¹⁵ Tatogat Kanaan iate Sidon, sikebbukat, samba si Het.

¹⁶ Si Kanaan leuet taikabbukat bangsa Jebusi, Amori, Girgasi,

¹⁷ tai Hewi, Arki, Seni,

¹⁸ Arwadi, Semari samba Hamati. Sasuku bangsa Kanaan nenda ipasaragai le kasareunan,

¹⁹ bailiu pateteret laggaira malio barania ka Sidon ka isit Kaiaman siailiake Gerar, teret kabe'bet Gaza, samba ka isit kabelaiat sulu sialiake Sodom, Gomora, Adma, samba Zeboim, teret kabe'bet Lasa.

²⁰ Nenda te sangamberi punuteteu Ham. Senen bangsa samba suku mukuddu ka senen laggainia samba ai nganganda senenda.

²¹ Si Sem, kebbut Jafet, iate taikebbukat sangamberi bangsa Heber.

²² Tatogat Sem iate si Elam, Asyur, Arpakhsad, Lud samba Aram.

²³ Sapunuteteu Aram iate sipulalaggai ka Us, Hul, Geter samba Mas.

²⁴ Arpakhsad ukkui selah. Samba si Selah ukkui Eber.

²⁵ Si Eber ai rua toga simanteu; siboiki sipuoni si Peleg, kalulut kateterenia, sangamberi bangsa ka polak ibailiu tuparubei; sikarua sipuoni si Joktan.

²⁶ Sapunuteteu Joktan iate sipilalaggai ka Almodad, Selef, Hazar-Mawel samba Jerah,

²⁷ Hadoram, Uzal, Dikla,

²⁸ Obal, Abimael, Syeba,

²⁹ Ofir, Hawila samba Jobab. Sangamberinia nenda sapunuteteu Joktan.

³⁰ Kupkumen kudduatra malilio le barania ka Mesa ka Sefar, iate tobbou kapaleleleu ka isit kabelaiat sulu.

³¹ Nenda te sangamberi sapunuteteu Sem. Senen bangsa samba suku mukuddu senenda ka laggainia samba ai nganganda senenda.

³² Sangamberinia nenda sapunuteteu Noak, bangsa ka bangsa, siripot tiboi tubu punuteteura senenda. Sia te amasipakakra sabangsa ka polak nene lepat eba sabeu nenda.