1Mos. 1 - BUKO SIPUNENAN

Panandaat manua samba polak samba sibabara ka bagania

¹ Kapanandatnia, Taikamanua masigalai manua samba polak,

² polak tapei aibailiu tubunia samba berisara sibabara kabagania, gepgep masilakkup koat samba Ketsat Taikamanua mumanyang ka uddut oinan.

³ Kuanangan Taikamanua, “Kau ibara pato.” Iageti mapatonangan leu et.

⁴ Taikamanua masiitso pato nenda maeru, lepa pasaraakenangan pato nenda ka gepgep.

⁵ Samba oniakenangan pato nenda “Ta'go” samba gepgep nenda “Soibo.” Bara kasoibokat samba bara simansep. Nene te gogoi siboiki.

⁶ Lepa panibonangan Taikamanua, “Kau ibara lakkup katalagat oinan sibailiu pasongan oinan ka oinan.”

⁷ Iageti baraakenangan Taikamanua lakkup samba ipasaraake oinan ka tei lakkup nenda ka oinan sikukuddu ka uddutnia. Puailinangan kele nenda.

⁸ Oniakenangan lakkup polak nenda, “Manua” pasat soibo samba bailiu simansep. Nene te' gogoi sikarua.

⁹ Lepa kuanangan Taikamanua, “Kau le iparuru oinan sikuddu ka tei manua ka sara kudduat, bailiu matoilanangan polak.” Iageti bara kele nenda.

¹⁰ Taikamanua masioniake simagarak nenda, “Polak”, samba parurukat oinan nenda ioniake “Koat”. Maangka le bagat Taikamanua masiitco nenda.

¹¹ Panibonangan minca Taikamanua, “Kau le ibelaake polak senengamata siureman, iate siureman sibara luiku, samba siureman sibaraake bua.” Iageti bara kele nenda.

¹² Kise te ibelaake polak senengamata siureman. Taikamanua maangka bagania masiitso kele nenda.

¹³ Kapplu sisoibo bailiu simansep. Nene te gogoi sikatelu.

¹⁴ Lepa geti kuanangan Taikamanua, “Kau ibara simatoro ka manua masitoroiji polak bule ipasaraake sinago ka soibo. Eddangannia simatoro nenda ibailiu patuaggaiat tetere, gogoi samba rura,

¹⁵ samba sibailiu simatoro ka manua nenda masitoroiji polak.” Iageti bara kele nenda.

¹⁶ Kise te aigalai Taikamanua karua toro sabeu, iate sulu masitoroi ta'go samba laggo masitoroi gepgep; samba Igalai leu et panyanyat.

¹⁷ Taikamanua masigalakngake sipasitoroi nenda ka manua bule itoroiji polak,

¹⁸ bule itoroiji ta'go samba soibo, samba masipasaraake ta'go ka gepgep. Samba maangka bagat Taikamanua masiitco nenda.

¹⁹ Pasat sinoibo, bara simansep. Iate gogoi si kaepat.

²⁰ Lepa geti kuanangan Taikamanua, “Kau le kabagat oinan senengamata sipungongoingoi samba pauma' uma' simigi sitububurut katei manua.”

²¹ Lepa baraakenangan Taikamanua iba sabeu ka koat samba senengamata sipungongoingoi ka oinan samba senengamata uma. Samba maangka bagat Taikamanua masiitco nenda.

²² Taikamanua masisukatnake sangamberinia nenda pasamba masikau parenta katubut sipungongoingoi kabagat oinan bule ramakakra samba masisunnake koat, samba katubut pauma-uma bule ituppai iginia.

²³ Pasat soibo, bara simansep. Nene te gogoi si kalima.

²⁴ Lepa kuanangan Taikamanua, “Kau le ibaraake polak senengamata leitit polak, simaom samba simalia, sabeu samba sigoiso.” Iageti bara ibara nenda.

²⁵ Kise te aigalai sangamberinia nene Taikamanau samba maangka le bagania masiitco sangamberinia nenda.

²⁶ Lepa kuanangan, “Kineiget tabaraake sirimanua simakere kele tubutta. Bule sia masipaneinei geti sangamberi iba, uma samba sangamberi leiti bagei, simaom samba simalia.”

²⁷ Kise te aibaraake Taikamanua sirimanua samba bailiuakenangan sia kele tubuNia. Galainangan sia, simanteu samba sinanalep.

²⁸ Lepa geti sukatnakenangan sia pasamba tiboiet, “Kau ibara punuteteumui simigi, bule rakudduji samba raikepmake sangaliot polak. Kukau le ekeu masipasikeli paiba-iba, uma sangamberi leiti simalia.

²⁹ Komennu Kuake le katubum senengamata siureman sibara luiku samba buat mone.

³⁰ Tapoi katubut sangamberi uma samba leiti simalia, Kukau le parou samba siureman sibara buluk sibailiu komennia.” Iageti bara kele nenda.

³¹ Itconangan sangamberi sigalaiNia nenda Taikamanua, samba bulat maangka bagaNia. Pasat soibo, bara simansep. Nenda te' gogoi sikaenem.