1Kor. 6 - BUKO SIPUNENAN

Mupakaro ka sipasiukum sitaimatonem baga

¹ Bara ibara ka talagamui sipajojoggolo pasasamba tai Kristen, maeme koi nia mei masinganduake ka sipasiukum sitaimatonem baga, ta ka tai Kristen?

² Ele ta pa nuagai kam, sia sipunenan le masiuukum geti polak nene? Oto ke kam le masiuukumake polak nene, ta pa mateu nupasikeli kam pagalaiat sigoiso nene?

³ Ta pa nuagai kam, sita masiuukumake samalaika? Sara pei pa pagalaiat purimanuaiat sisenen gogoi.

⁴ Kenanen kisedda, bara pajoggolat pagalaiat purimanuaiat sisenen gogoi, ka sia sitaiaaddeakenen paamian nusegeake kam nia?

⁵ Kukukua nia nene numaila kam. Ta pa anai beri sara ka talagamui simasiku paatuat siooi masipagaba pajoggolatda sasaraina?

⁶ Pakakaro pa saraina ka saraina, ai pei bagei ka tubuda sitaimatonem baga?

⁷ Oto kababarat pakaromui pasasambamui bulat amakalangan kam. Angoian pa eddangannia nuorik kam taimaroipo? Ta pa maeru pei le rarugiake kam?

⁸ Tapoi kam tubumui masigalaiake sitaimaroipo samba kam tubumui masibaraake purugiat, samba ka tubuda sasarainamui pei bagei nugalaiake kam nia.

⁹ Ele ta pa nuagai kam, sia sitaimaroipo ta raiikepmake Purimataat Taikamanua? Bui numapepe kam! Sia sipuuumun, sipanindogi buluat, sipaeelet, simaolop tubu, sipujojo pasasambada simanteu,

¹⁰ sipananangkou, simaalau baga, simalo simapuinengen, sipakatai nganga samba sipatataju, ta raiikepmake Purimataat Taikamanua.

¹¹ Kisedda leu te paraboatda piga pa ka talagamui siburu. Tapoi kineneiget atulinaakean kam, atusipunenanakean kam, atuparoipongan kam ka onin Tuhan Jesus Kristus samba ka bagat Ketsat Taikamanuanta.

Latsatnake Taikamanua ka bagat tubum

¹² Sangamberinia le momoi kaku; tapoi ta sangamberinia ai kauta nia. Sangamberinia le momoi kaku; tapoi ta kuoobaake tubuku ipaneinei nia apa pa.

¹³ Kan ia te puektengan balugu samba balugu ektekngakenen kan; tapoi ruania itatataake le Taikamanua. Tapoi tubu ta puumunakenen, kaunen kai Tuhan le, samba si Tuhan katuuktungan tubu.

¹⁴ Taikamanua sisuruake Tuhan Jesus, sita leu isusuruake kalulut gegenia.

¹⁵ Ta pa nuagai kam, tubumui ia te laddou Kristus? Mateu pa kuala laddou Kristus, kukau nia ka puumunan? Bulat ta momoi!

¹⁶ Ele ta pa nuagai kam, kasei sitabbaraake tubunia ka sinanalep sijo, aibailiuan sia ruada sangaakkula? Kise poi aikua Surat Sipunenan, “Ruada bailiu sangaakkula.”

¹⁷ Tapoi kasei sitabbaraake tubunia kai Tuhan, bailiu sisara Ketsat sia si Tuhan.

¹⁸ Areuake kam tubumui ka puumunan! Pajoojoo bagei sigalaiakenen sirimanua, ta sisappo tubunia. Tapoi sigalaiake puumunan, ka tubunia le aigalai jo.

¹⁹ Ele ta pa nuagai kam, tubumui ia te uman Ketsat Sipunenan sikuddu ka bagamui, Ketsat Sipunenan sinilomui ka Taikamanua, – samba kam, ta kam sibakkat tubumui?

²⁰ Aipoi makeppu sakimui aisaki kam Taikamanua. Oto pakei kam tubumui sibailiu katulatsanan Taikamanua.