1Kor. 5 - BUKO SIPUNENAN

Jo ka bagat paamian

¹ Bulat amaarepman kababarat puumunan ka talagamui; beringan ka sipuarat sabulungan ta anai atusese puumunan kele nene, ia te ai sipuumunake sinanalep ukkuinia.

² Kenanen kisedda, mabuak le paatuatmui. Ta siripokatnia marereureu le bagamui samba nuareuake kam ka talagamui sirimanua sigalaiake kele nene?

³ Aipoi aku, kenanen tubuku ta anai ka talagamui, ka bagat ketsat geti ai aku ka talagamui, samba kele ai aku ka talagamui akutakkiakean ukuman ka sia sigalaiake kele nene.

⁴ Ke paruru sita ka bagat ketsat, kam samba aku, ka geget Jesus Tuhanta,

⁵ buita tusegeake sirimanua nenda ka Sanitu ka onin Tuhan Jesus imatei tubunia, bule ipuarau ketsatnia ka gogoi kaoijanan Tuhan.

⁶ Ta maeru nuumunake kam tubumui. Ta nuagai kam, goiso le sioman, bailiu mugoo sangatatappa tapung.

⁷ Ribbaiake kam sioman siburu, bule ibailiu kam tapung sibau, kirenangan poi ta sisiomi kam. Aipoi Togat Biribiri Paskata atubuluakean, ia te Kristus.

⁸ Oto kauan tapupunen kam, bui ka sipusioman siburu, bui leu ka sioman pukataikat samba pujojo, tapoi ka roti sitasioman le, ia te pulinakat samba pubulanan.

⁹ Ka suratku akusuratnakean ka kam, bui nupaaleiake kam sia sirimanua sipuuumun.

¹⁰ Ta sangamberi sipuuumun ka polak nene kukukua, ele sangamberi simaalau baga, ele sipatataju ele sipanindogi buluat. Kisedda bai nia, buita belangan le kam ka polak nene.

¹¹ Nene le akukua ka kam ka surat, bui nupaaleiake kam sia kenanen raoniake tubuda Kristen, tapoi sipuuumun le, simaalau baga, sipanindogi buluat, simaasa, sipupupuineng ele sipatataju; sirimanua kele nene bulat bui nupakomake kam sia.

¹² Aipoi apananku kuukum sia sikuddu ka bebe? Ta sia saladdou paamian le ukumakenenmui?

¹³ Sia sikuddu ka bebe geti Taikamanua le iuukum sia. Areuake kam sia ka talagamui sigalai jo.