1Kor. 4 - BUKO SIPUNENAN

Beunannia pasikelatda tai apostel

¹ Pagugulet Kristus le addeake kam kai, sinegeakenen masipasikeli pakeleat Taikamanua.

² Ka kalepakatnia gabaet ka tubuda sipupapasikelat kele nene, ia te buita katoneman le sia.

³ Kaku geti ta anai galainia, kam pa masiukum aku ele pakarot sirimanua; beringan aku leu ta kuukum tubuku.

⁴ Ta tedda iagai tubuku apa pa seleku; tapoi ta kalulut nenda ikakau aku maroipo. Sipasiuukum aku geti si Tuhan le.

⁵ Ianenda, bui nupasiukum kam ta ka teterenia, ke tapei amoi si Tuhan. Nia le masitotoroiji simalipput ka bagat pugepgeman samba masipatotoila isiat paatuat. Sedda pei te senen sirimanua masisilo katuumunan sibara ka Taikamanua.

⁶ Sangamberinia nene sasaraina, ka tubuku samba kai Apollos le kuoorakngake nia kalulut kam, bule sibara ka kai nugelai kam: “Bui nusaliuake kam sitususurat,” bui ibara ka kam sibuakngake tubuna ka bagat masiabeuake sisara, masipabele sabagei.

⁷ Kasei poi amasipabaggei ekeu ka sabagei? Samba aponia sibabara ka tubum, ta sinilonu ka Taikamanua? Oto ke sinilonu le, angoi nuumunake tubum, nukau tubum kele ke sitaipaninilo?

⁸ Amaektekngan kam, amakayongan kam, aibailiuan kam rimata, kai taa. Keleu pa bulatnia ibailiu kam rimata, bule kai leu bailiu rimata, tapurimata sambata.

⁹ Aipoi siripot sipaatuku, kai tai apostel aikauan kai Taikamanua ka kudduat sikateitei, kele sirimanua siukumakenen matei, kalulut aibailiuan kai ikbungenda taikalopak, samalaika samba sirimanua.

¹⁰ Kalulut Kristus, sitaiagai paatuatnan le kai, kam geti simasiku paatuat ka bagat Kristus. Simasaggo le kai, kam geti simaron. Kam umunakenen, kai geti paloloiet le.

¹¹ Pat aili teret kise, sipulalaje samba simaoggou le kai, sipububulutut, boboket samba ta anai kudduat simariuriu;

¹² kumomoake kai tubumai mugalai masigaba purimanuaiat. Rapakuaiji kai, kusukatnake kai sia; rapaoreji kai, tenan le kai omake;

¹³ rapaloloi kai, kualegi kai ka tiboiet simaleppet; kele paporapora ka polakngan le kai, samba kele abut apa pa, aili teret kise.

¹⁴ Ta te masipakaila kam kususuratnake surat nene, masiaseake kam le, kele tatoga kilibet bagaku.

¹⁵ Aipoi kenanen ai pulu ribu gurumui ka bagat Kristus, ukkuimui geti ta maigi. Aku le poi sibailiu ukkuimui ka bagat Kristus Jesus kalulut Katuareman Simaeru sipaarepku ka kam.

¹⁶ Oto kutubbui kam: ului kam aku!

¹⁷ Ia te lulunia akukoiniake ka kam si Timoteus, togaku kilibet baga samba simatopit ka bagat Tuhan. Nia te masiparerepdep kam puririmanuangku ka bagat Kristus Jesus, kele sigelaiakenenku kaipa kaipa ka senen paamian.

¹⁸ Ai piga pa ka talagamui simabuak paatuat, ka bagada poi taan momoi aku ka kam.

¹⁹ Tapoi momoi aku simaruei ka kam, ke iteuake bai si Tuhan. Sedda te kuagai nia, pagalaiat ronda sia simabuak paatuat, ta sarat tiboietda.

²⁰ Aipoi Purimataat Taikamanua ta ka tiboiet, tapoi ka gege le.

²¹ Apa le siobamui? Ka bagat bobobo kuoi ka kam, ele ka bagat nuntut baga samba paatuat leppet baga?