1Kor. 3 - BUKO SIPUNENAN

Pagugulet Taikamanua le sipaarep Katuareman Simaeru

¹ Aku leu sasaraina ka teteret nenda ta momoi kupanibo ka kam kele ka sirimanua sibara Ketsat Taikamanua, tapoi ka sirimanua akkula le, kele taiguigui ka bagat Kristus.

² Susu le akuake ka kam, ta kan simakela, aipoi tapei momoi nukom kam nia. Beringan kineneiget tapei momoi nusilo kam nia,

³ aipoi sirimanua akkula pei le kam. Aipoi ke ai ka talagamui tutut baga samba pajoggolat, ta ia ne masipatoila sirimanua akkula le kam, samba muparaboat siripot pusisirimanua?

⁴ Aipoi ke sisara masikua, “Si Paulus le kutut kaku,” sabagei masikua, “Kaku si Apollos,” ta ia ne masipatoila, sirimanua akkula le kam?

⁵ Kasei poi si Apollos? Kasei si Paulus? Pagugulet Taikamanua le sia, sipalulu kam mutonem baga, samba senenda masienungake siripot panguruat Tuhan.

⁶ Aku masiurep, si Apollos masisubui, tapoi Taikamanua le masitututuake.

⁷ Kalulut nene ta abeuakenen sipasiuurep ele sipasisusubui; Taikamanua le sipasitututuake.

⁸ Sipasiuurep samba sipasisusubui makere le; samba senenda masisilo upa siripot sigalaira.

⁹ Aipoi alei pagalaiakenen Taikamanua le kai; kam monen Taikamanua, lalep Taikamanua.

¹⁰ Siripot kiliu bagat Taikamanua sipanguruatnakenennia kaku, aku kele tukang siagai kabei, akugalakngakean bongen, sabagei masirioake minca ka uddutnia. Tapoi senen sirimanua kau ipagaba kipa ipasigalai ka uddutnia.

¹¹ Ta poi anai kasei pa siooi masigalakngake bongen bagei silit silepa galak, ia te Jesus Kristus.

¹² Ke mas, perak, bukku simakeppu saki, loinat, sigaratat ele loinan bera bai rarioake ka uddut bongen nenda,

¹³ matotoila le geti galajetda senenda. Gogoi Tuhan poi masipatotoila, aipoi api le ipatotoila nia samba kipa erunia galajet senen sirimanua, api le isisibo nia.

¹⁴ Ke ta malabo sirioakenen sirimanua ka uddut bongen nenda, silonangan upa.

¹⁵ Ke malabo le sigalainia, maruginangan; tubunia geti muririmanuania, tapoi kele silalau ka apingan le.

¹⁶ Ta nuagai kam, uman Taikamanua le kam, samba Ketsat Taikamanua mukuddu ka tubumui?

¹⁷ Ke ai sipakatai uman Taikamanua, ipakakatai leu nia Taikamanua. Sipunenan le poi uman Taikamanua, ia te kam.

¹⁸ Bui bara kasei pa sipataju tubuna. Ke ai ka talagamui sipaatu tubunia simasiku paatuat siripot kirekat polak nene, kau le ikau tubunia sitaiagai paatuat, bule ibailiu nia simasiku paatuat.

¹⁹ Aipoi sikut paatuat polak nene, putaiagaiat paatuat le ka Taikamanua. Atusuratnakean poi ka Surat Sipunenan, “Ilalaba le simasiku paatuat Taikamanua ka bagat pabelokatda.”

²⁰ Samba minca, “Iagai si Tuhan paatuatda simasiku paatuat; sangamberinia siboboi le.”

²¹ Oto bui bara kasei pa siumunake sirimanua, sangamberinia le poi kam le sibakkatnia:

²² ele Paulus, ele Apollos, ele Kepas, ele polak, ele purimanuaiat, ele kamateiat, ele sibabara kineneiget, ele sibabara geti, sangamberinia kam le sibakkatnia.

²³ Tapoi kam, Kristus le sibakkat kam, Kristus geti bakkat Taikamanua le.