1Kor. 16 - BUKO SIPUNENAN

Paroman kaunen ka sapaamian ka Jerusalem

¹ Pagalaiat ruruket bulagat kaunen ka saalei tai Kristen, galai kam kele sitoneakenenku ka sapaamian ka Galatia.

² Senen gogoi Menggui senemui masiruruake bulagat teret sibabara, koiri ka kudduatnia, bui teret amoian le aku ia pei tutaddaake masiruru.

³ Amoian geti aku, koiniakekungan sia simatonem bagamui raambit surat masisegeake panguruatmui ka Jerusalem.

⁴ Ke tubesiake geti samba aku mei, ei kai sambamai.

Isiat puenunganan Paulus

⁵ Momoi aku masibalou kam, lepa kusabau Makedonia, aipoi kusasabau le Makedonia.

⁶ Pasese bai nia kuddu aku goiso ka kam, ele teret sabau tetere simaleppet, bule kam le masirom masipasikeli aku kuriuriuake pueijananku.

⁷ Aipoi ta koba kineneiget kuitco kam ka pasabagat le; kukaroni mauju goiso kukuddu ka talagamui, ke iteuake bai si Tuhan.

⁸ Tapoi ka Epesus le kukukuddu, teret punen Pentakosta,

⁹ aipoi se ai oggak kaku mugalai galajet sabeu sibaraake uktuk, kenanen maigi leu sipasisasaggangi.

¹⁰ Ke moi si Timoteus, puuku kam nia, bui ka bagat loto ikuddu ka talagamui, aipoi galajet Tuhan le igagalai keleu aku.

¹¹ Oto bui bara kasei pa sipaloloi nia! Tapoi romake le kam nia, bule imariuriu puenunganannia, bule itoili minca kaku; aipoi ai le kungengenaake nia sambamai sasaraina sabagei.

¹² Pagalaiat sarainanta si Apollos geti, akutubbuian nia simakope bule moi nia sambada sasaraina sabagei masibalou kam, tapoi bulat tapei ioba moi kineneiget. Aiipoan geti oggak sipasesese, momoi leu nia.

Tiboiet pasilepa samba salam

¹³ Pumata kam, murio simaron ka bagat tonem baga, magege samba riuriu ron!

¹⁴ Sangamberi galajetmui ka bagat nuntut baga galai kam nia!

¹⁵ Ai pei le tiddogetku ka kam sasaraina. Nuagai kam Stefanus samba saeppunia ia te sipukikristen siboiki ka Akhaya, samba rabuluake tubuda masipasikeli paamian Taikamanua.

¹⁶ Bule nureddet kam sia sirimanua kele nene samba sabagei sipugagalai samba sipusasaggo tubu.

¹⁷ Maangka bagaku kaooi Stefanus, Fortunatus samba Akhaikus, kalulut rasutnake simagulai pei le ka kam;

¹⁸ arapakula poi ketsatku samba ketsatmui. Suru kam sia sirimanua kele nene!

¹⁹ Salam ka kam sibara ka sapaamian ka Asia. Si Akwila, Priska samba paamian ka lalepda masisegeake salam simaigi ka kam ka bagat Tuhan.

²⁰ Salam ka kam sibara ka sangamberi sarainanta. Pasalam kam pasasambamui ka pasiggungan sipunenan.

²¹ Tuppainia minca bulat sinurat kabeiku: Salam sibara kaku Paulus.

²² Kasei ta masipununtuki baga si Tuhan, teleiet le nia!

²³ Kiliu bagat Tuhan Jesus masipaalei kam.

²⁴ Nuntut bagaku masipaalei kam sangamberimui ka bagat Kristus Jesus.