1Kor. 15 - BUKO SIPUNENAN

Katusuruat Kristus ka simamatei

¹ Kineneiget kuparepdep ka kam sasaraina pagalaiat Katuareman Simaeru sipaarepku ka kam, samba sinilomui, samba amaronan nupurio kam ka bagania.

² Kalulut nia leu aituarauake kam ke maron bai nuukkaake kam tiboiet sipaarepku ka kam; ke ta kisedda siboboi le putotonem bagamui.

³ Aipoi bulat sabeunia akusegeakean ka kam, samba siniloku leu, ia te amateian Kristus lulut jota, siripot Surat Sipunenan,

⁴ samba aturateiakean nia, samba atusurungan nia ka gogoi sikatelunia, siripot Surat Sipunenan;

⁵ samba aipatoilaan tubunia kai Kepas, lepa ka sipasiuluinia sipulurua.

⁶ Lepa nenda patoilanangan minca tubunia ka sasaraina silima ngotu legei sangakerekat. Maigi pei le sia sipuririmanua teret kineneiget, sabagei geti amateian sia.

⁷ Lepa patoilanangan tubunia kai Jakobus, lepa ka sangamberi tai apostel.

⁸ Bulat pasilepania patoilanangan leu tubunia kaku kele toga siputututu mata sitaiaili laggo.

⁹ Aipoi aku le simakope epe ka sangamberi tai apostel, kalulut akukukuru poi paamian Taikamanua.

¹⁰ Tapoi kalulut kiliu bagat Taikamanua, bailiu kele kisean aku kineneiget, samba kikiliuna aku ta siboboi. Bailoknia, saliu pei le pugagalaira sangamberida pugagalaiku; tapoi ta leu aku, kiliu bagat Taikamanua le aipaalei aku.

¹¹ Oto ele aku, ele sia, kisedda te pungangantomanmai samba kisedda numatonem kam baga.

Katusuruatta ka simamatei

¹² Oto ke kupaarep kai katususurut Kristus ka simamatei, kipa te ibabara ka talagamui sipasikukua ta anai katusuruatda simamatei?

¹³ Ta bai anai katusuruatda simamatei, Kristus leu ta atusuru.

¹⁴ Tapoi ke ta bai tusuru Kristus, siboboi le ngantomanmai samba siboboi leu tonem bagamui.

¹⁵ Saliu pei le nenda, bulat apabokongan kai ka pagalaiat Taikamanua, kalulut kumunengake kai susuruakena Kristus – oto ta aisuruake nia, ke bulatnia bai ta tusuruake simamatei.

¹⁶ Aipoi ke ta bai tusuruake simamatei, Kristus leu ta tusuruake.

¹⁷ Samba ke ta bai tusuru Kristus, siboboi le tonem bagamui samba ai pei le kam muririmanua ka bagat jomui.

¹⁸ Kisedda bai, simamatei ka bagat Kristus leu, limai le sia.

¹⁹ Ke sarat puririmanua ka polak nene le tapukaronan kam ka Kristus, oto sita le bulat simakope kasisibbu ka sangamberi sirimanua.

²⁰ Tapoi bulatnia atusurungan Kristus ka simamatei, sikebbukat ka sangamberi simamatei.

²¹ Aipoi kele kalulut sara sirimanua bara kamateiat, kisedda leu kalulut sara sirimanua bara katusuruat.

²² Kele kalulut pasambaat kai Adam sangamberi sirimanua matei, kisedda leu et kalulut pasambaat ka Kristus sangamberi sirimanua murimanua.

²³ Tapoi senen sirimanua siripot patunanda: Boiki Kristus; lepa siangan bakkatnia ka gogoi kaoijanannia.

²⁴ Lepa bara kalepakatnia, ia te teteret isegeake Purimataat ka Taikamanua Ukkui, lepa aitataake sangamberi pupamarentaat, pugegeat samba puroron.

²⁵ Aipoi buita murimata le nia, teret ikau Taikamanua sangamberi saggaknia kalak rerenia.

²⁶ Saggak sikateitei sikalaakenennia ia te kamateiat.

²⁷ Aipoi sangamberinia aikalaakean Taikamanua bailiu kalak rerenia. Tapoi ke ikua, “sangamberinia aikalaakean”, kolou, nia sipasikakalaake sangamberi bailiu kalak reret Kristus ta ioorak nia.

²⁸ Tapoi ke amakalangan sangamberinia ka tubut Kristus, oto nia leu kele Toga ikalaake tubunia ka tubut sipasikakalaake sangamberinia ka tubunia, bule Taikamanuangan le sangamberinia ka bagat sangamberinia.

²⁹ Ke ta tusuruake sia simamatei, apa kaura nia sirimanua turau sia punu tubuda simamatei? Ke bulatnia bai ta tusuru sia simamatei, raoba kodda turau sia punu tubuda simamatei?

³⁰ Ka kai leu, angoi kukakau kai tubumai ka bagat gejat baga senen tetere?

³¹ Kukua nia sasaraina, senen gogoi le kuorik kamamatei, katuumunanku kalulut kam ka bagat Kristus Jesus, Tuhanta.

³² Ke sarat kalulut pusisirimanua le bai akulaba tarimeu simasakbak ka Epesus, aponia uktukku? Ke ta bai tusuru sia simamatei, kauan “mukom samba muloan le sita, aipoi mancep matei sita.”

³³ Bui numapepe kam! Paaleiat sikatai masipakatai paraboat simaeru.

³⁴ Toiliake kam paatuat simaeru samba baan gagalai kam jo! Aipoi ai piga pa ka talagamui sitaiagai Taikamanua. Kukukua nia nene, bule numaila kam.

Katusuruat tubu

³⁵ Tapoi ai pa sipasinonounou, “Kipa te ratusuru simamatei? Samba kipa tubuda raoi minca?”

³⁶ Kam sitaiagai paatuat! Karamen sikaramakenennu, ta muririmanua, ke ta matei nia boiki.

³⁷ Samba sikaramakenennu nenda ta te tubut uremen siputututu, tapoi luiku sibaba le, ele gandum pa, ele luikut bagei.

³⁸ Tapoi Taikamanua masikau ka sia tubu siripot teu bagania, samba ka senen luiku ikau tubunia ka sia.

³⁹ Ta te makere sangamberi akkula; akkulat sirimanua ta makere ka akkulat tarimeu; sara le akkulat uma, sara le akkulat iba.

⁴⁰ Ai putubuat manua samba ai putubuat polak; tapoi latsat putubuat manua ta makere ka latsat putubuat polak.

⁴¹ Sara le latsat sulu, sara latsat laggo, samba latsat laggo ta makere ka latsat panyanyat, samba latsat panyanyat sara ta makere nia ka latsat panyanyat bagei.

⁴² Kisedda leu te pagalaiatnia katusuruatda simamatei. Tukaramake simaaanau, tusuruake sitaimaaanau.

⁴³ Tukaramake sitaimalatsat, tusuruake simalatsat. Tukaramake simasaggo, tusuruake simaron.

⁴⁴ Sikaramakenen ia te tubu puakkulakat, sisuruakenen tubu puketsanan. Ke ai tubu puakkulakat, ai leu tubu puketsanan.

⁴⁵ Kele sitususurat ka Surat Sipunenan leu, “Sirimanua siboiki ia te si Adam bailiu sibaraakenen sipuririmanua,” tapoi Adam sikateitei bailiu ketsat sipasiririmanuaake.

⁴⁶ Tapoi siooi siboiki ta tubu puketsanan, tubu puakkulakat le; pasat nenda ia pei oi tubu puketsanan.

⁴⁷ Sirimanua siboiki sibara ka abut polak le samba muparaboat polak, sirimanua sikarua geti sibara ka sorga le.

⁴⁸ Sirimanua sibara ka polak makere sia kele sirimanua sibara ka abut polak samba sia sipuririmanua ka sorga makere kele nia sibara ka sorga.

⁴⁹ Samba kele papakeita putubuat sirimanua sibara ka abut polak, kisedda leu tapapakei geti putubuat sibara ka sorga.

⁵⁰ Nene le kuanenku ka kam sasaraina: akkula samba logau ta iikepmake Purimataat Taikamanua samba simaaanau ta iikepmake sitaimaaanau.

⁵¹ Arep kam kukua ka matamui pakeleat: ta sangamberita mamatei, tapoi sangamberita tusisili le geti,

⁵² ka bagat sangapeipeikat mata, ka teteret ipunau pipiau sikateitei. Munanau poi pipiau samba simamatei tusuruake ka bagat taimaaanau samba sita sangamberita sili itusili.

⁵³ Aipoi simaanaget nene buita ipakei sitaimaanaget samba simamateiet nene buita ipakei sitaimamateiet.

⁵⁴ Ke aipakeian simaanaget nene sitaimaanaget samba simamateiet aipakeian sitaimamateiet, puailinangan tiboiet Tuhan sitususurat ka Surat Sipunenan: “Kamateiat, aigukngan nia kamanangan.

⁵⁵ Oi kamateiat, kaipangan ne kamanangannu? Oi kamateiat, kaipangan ne pasorom?”

⁵⁶ Pasorot kamateiat ia te jo, samba geget jo ia te Surukat.

⁵⁷ Tapoi sura le ka Taikamanua sipasiaake ka sita kamanangan kalulut Tuhanta Jesus Kristus!

⁵⁸ Oto sasaraina kilibet bagaku, kau numaron kam, bui ipageugeu kam, samba kau imariuriu ngamangmui ka galajet Tuhan, nuagai poi kam, saggot tubumui ka bagat Tuhan ta musisiboboi.