1Kor. 13 - BUKO SIPUNENAN

Nuntut baga

¹ Kenanen moi kupanibo ka sangamberi ngangan sirimanua samba ngangan malaika, ke ta anai kaku nuntut baga, makere le aku kele ngong sipunanau ele kateuba sipugogoilo.

² Samba kenanen moi kusegeake katuareman sibara ka Taikamanua samba kuagai sangamberi pakeleat samba sangamberi puaagai; samba kenanen aian kaku tonem baga simasun pat oi kuritsiake leleu, tapoi ke ta anai nuntut baga kaku, siboboi le aku.

³ Samba kenanen kuparubei sangamberi bibiletku, samba kenanen bai kukau tubuku itulabo, tapoi ke ta anai nuntut baga kaku, beri goiso uktuk ka tubuku.

⁴ Nuntut baga ia te om baga samba erut baga; nuntut baga ta anai sisit baga, nuntut baga ta masiumunake tubu samba mubuak paatuat,

⁵ ta igagalaiake sitaimateu, ta igagaba puuktungan tubunia sarania, ta maruei mugolu samba ta iaaddeake joda sabagei.

⁶ Nuntut baga ta ipuaangkaki baga sitaimaroipo, pubulanan le ipuaangkaki baga.

⁷ Nuntut baga masilabbu sangamberi, masikatonemi sangamberi, masikaroni sangamberi, maom baga masiorik sangamberi.

⁸ Om baga ta anai kalepakat; pasisesegeake katuareman sibara ka Taikamanua geti tukakappulu le; punganganga kiseiet muaari le; puaagai tatata le.

⁹ Aipoi puaagaita ta masun samba pamomoiliatta katuareman sibara ka Taikamanua ta masun.

¹⁰ Amoian geti simasun, tata itata sitaimasun nenda.

¹¹ Ka teteret tatoga pei le aku, paniniboku kele tatoga, puaagaiku kele tatoga, pasipaatuku leu kele tatoga. Kele akumabeu, galakngakekungan galai tubuda tatoga.

¹² Aipoi siitcota kineneiget ailiggou simarappet pei le ka puailiggobat, tapoi lepa geti patuggut matangan le. Kineneiget tapei mamuine pasiaagaiku, tapoi lepa geti agaikungan nia simakolou kele aagaina aku.

¹³ Oto telunia nene te simariuriu: tonem baga, pukakaronan samba nuntut baga; tapoi bulat siabeunia geti ia te nuntut baga.