1Kor. 12 - BUKO SIPUNENAN

Pagalaiat panguruat Ketsat

¹ Pagalaiat panguruat Ketsat, ta koba ta nuagai kam nia sasaraina.

² Nuagai kam, ka teteret sipuarat sabulungan pei le kam, taipaatuetmui aitiktikngan kam ka buluat sitaiagai manibo.

³ Kalulut nene kupaagai ka kam, ta anai kasei pa sinopsop Ketsat Taikamanua masikua, “Teleiet le Jesus!” samba ta anai kasei pa siooi masimunengake, “Jesus ia te Tuhan,” ke ta kalulut Ketsat Sipunenan.

⁴ Maigi ngamata panguruat, tapoi sara le Ketsat.

⁵ Samba maigi ngamata pasikelat, tapoi sara le Tuhan.

⁶ Samba maigi ngamata galajet kiseiet, tapoi Taikamanua sara le sipasigagalaiake sangamberinia ka bagat sangamberi sirimanua.

⁷ Tapoi ka senen sirimanua ipanguruatnake panoilakat Ketsat puuktungan sangamberi.

⁸ Aipoi ka sisara ipanguruatnake Ketsat manibo ka sikut paatuat, ka sabagei Ketsat nenda leu et masikau panguruat muagai manibo.

⁹ Ka sisara Ketsat nenda leu et masipanguruatnake tonem baga, samba ka sabagei ikau panguruat masialeake sirimanua.

¹⁰ Ka sabagei gege masibaraake kiseiet, ka sabagei pasipoilianan, ka sabagei panguruat masipabaggei sene ngamata ketsat, ka sabagei ikau panguruat manibo ka nganga kiseiet, samba ka sabagei ikau panguruat masikolouake nganga kiseiet.

¹¹ Tapoi sangamberinia nene Ketsat sisara nenda leu et masigagalaiake nia, iparubei nia ka senen sirimanua, siripot teu bagania.

Maigi laddou tapoi sara le tubu

¹² Aipoi kele tubu sara le samba maigi laddounia, tapoi sangamberi laddou, kenanen maigi, bailiu sara tubu le, kisedda leu te Kristus.

¹³ Aipoi ka bagat sara Ketsat leu sita sangamberita turau bailiu sara tubu, ele tai Jahudi, ele bangsa begei, ele pagugulet ele ta pagugulet; samba sangamberita tupalo sibara ka sara Ketsat.

¹⁴ Aipoi tubu leu ta sara laddounia, tapoi maigi.

¹⁵ Ke ikua bai rere, “Kalulut ta kabei aku, ta tuaddeake aku rubeiat tubu,” ta kalulut nene taibailiunangan nia rubeiat tubu.

¹⁶ Samba ke ikua bai talinga, “Kalulut ta mata aku, ta rubeiat tubu aku,” ta kalulut nene taibailiunangan talinga rubeiat tubu.

¹⁷ Ke sangalio tubu bai mata, kaipangan le pasiarep? Ke sangamberi bai talinga, kaipangan le pasiping?

¹⁸ Tapoi aipagalakngan Taikamanua sangamberi laddou ka kudduatda senenda ka tubu siripot teu bagania.

¹⁹ Ke sangamberinia bai sangaladdou, kaipangan le tubu?

²⁰ Bulatnia maigi laddou, tapoi tubu sara le.

²¹ Oto ta momoi ikua mata ka kabei, “Ta anai kauku ekeu.” Ele ute masikua ka rere, “Ta anai kauku ekeu.”

²² Bailoknia laddou tubu addeakenen si ta paluluat, ia le bulat abeu kauta nia.

²³ Samba laddou tubu addeakenen ta bulat suruket, kau tasuru nia simakope; samba laddou tubuta simagulai lainge, tapasikeli simakope.

²⁴ Tapoi laddou tubuta simalainge geti ta leu makope tupasikeli. Aipagalakngan Taikamanua tubuta kele kise, bule laddou tubu sitaimalatsat, tusuru simakope,

²⁵ bui ibara pasaraat ka bagat tubu, tapoi sangamberi laddou pasopo pasasambada.

²⁶ Ia te lulunia ke masiorik sara laddou, sangamberi laddou le masiorik; ke tusuru sara laddou, sangamberi laddou le muangka baga.

²⁷ Kam sangamberimui te tubut Kristus samba senemui laddounia.

²⁸ Samba ka bagat paamian, airioakean piga pa Taikamanua: siboiki tai apostel, sikarua tai nabi, sikatelu tai guru. Ia geti sia sisilo panguruat masigalai kiseiet, masialeake, masirom, masipaneinei, samba manibo ka bagat sene ngamata nganga kiseiet.

²⁹ Sangamberida pa apostel, ele nabi, ele guru? Sangamberida pa masisilo panguruat masigalai kiseiet,

³⁰ ele masialeake, ele manibo ka bagat nganga kiseiet, ele masikolouake nganga kiseiet?

³¹ Oto besiake kam masisilo panguruat bulat sabeu. Tapoi kusausau pei le ka kam enungan bulat simaeru.