1Kor. 11 - BUKO SIPUNENAN

¹ Ului le kam aku, kele aku masiului Kristus.

Pagalaiat masitabbo ute ka bagat parurukat

² Bulat kuumunake kam, aipoi ka bagat sangamberinia mariuriu le nurepdep kam aku samba nuukkaake kam nganturat sigelaiakenenku ka kam.

³ Tapoi koba le bule nuagai kam pagalaiat nene, ia te Ute ka senen taimanteu ia te Kristus, ute ka tainanalep ia te simanteu samba Ute ka Kristus ia te Taikamanua.

⁴ Senen taimanteu sipaninindou ele sipamomoiliat katuareman sibara ka Taikamanua sibara tutu ka ute, masipaloloi Kristus.

⁵ Tapoi senen tainanalep sipaninindou ele sipamomoiliat katuareman sibara ka Taikamanua, sitaitabbo ute, masipaloloi simanteunia utenia, aipoi makere le nia ka sinanalep sisapu alai.

⁶ Aipoi ke ta ioba itabbo utenia sinanalep, kau le isapu alainia. Tapoi ke ibailiu puailaat ka tainanalep itusapu alainia, ele tukirit, oto kau itabbo utenia.

⁷ Simanteu geti ta leu itabbo utenia, lulut masipatoila tularat samba pulatsanan Taikamanua le nia. Tapoi sinanalep geti masipatoila pulatsanan simanteunia.

⁸ Aipoi ta sibara ka sinanalep simanteu, sinanalep le sibara ka simanteu.

⁹ Samba ta kalulut sinanalep aitubaraake simanteu, tapoi kalulut simanteu le aitubaraake sinanalep.

¹⁰ Ia te lulunia sinanalep buita ipakei toggaiat gege ka utenia kalulut samalaika.

¹¹ Kenanen kisedda, ka bagat Tuhan geti, ta anai sinanalep ta pasamba simanteu, samba ta anai simanteu ta pasamba sinanalep.

¹² Aipoi kele sinanalep sibara ka simanteu, kisedda leu et simanteu sinutuakenen sinanalep; tapoi sangamberinia sibara ka Taikamanua.

¹³ Paatu pei kam ka kam: Mateu pa sinanalep manindou ka Taikamanua si ta tabbot ute?

¹⁴ Ta ainganturungan kam katukelat, puailaat le ka simanteu mualai simananta,

¹⁵ tapoi ka sinanalep geti pulatsanan le ka tubunia ke mualai simananta? Aipoi alai atupanguruatnake ka tubunia silit panambo.

¹⁶ Tapoi ke ai sioba pajoggolo, ta anai ka sita ele ka sapaamian Taikamanua arat kele kisedda.

Pagalaiat Pukoman Sipunenan

¹⁷ Ka bagat toneakenenku tuppainia nene, ta kuumunake kam, aipoi parurukatmui ta masibaraake katuerukat, masibaraake katukataikat le.

¹⁸ Aipoi siboiki akuarep, ruru nuparuru kam ka pupaamianan, ai pasaraat ka talagamui, samba matonem bagaku kababarat nene.

¹⁹ Aipoi ta momoi ta ibara pabaggeiat ka talagamui, bule imatoila kasei ka talagamui bulat Kristen sipulelelek.

²⁰ Ke paruru kam, ta bulat mukom Pukoman Sipunenan nugagalai kam.

²¹ Aipoi ka pukoman, senen sirimanua paalau sikom kanna, pat ai simalaje, ai sabagei simapuineng.

²² Ta pa anai lalepmui senemui, bule sedda nupukom kam samba nupulo kam? Ele noba nupaloloi kam paamian Taikamanua samba nupakaila kam si ta anai apa pa? Aponia kuanenku ka kam? Kuumunake pa kam? Ka bagat nene ta kuumunake kam.

²³ Aipoi sinegeakenenku ka kam, siniloku sibara kai Tuhan le, ia te: Tuhan Jesus, ka soibot katusegekatnia, alanangan roti,

²⁴ kuanangan sura; paabbonangan nia, kuanangan, “Tubuku te nene, sinegeakenen lulumui; galai kam nene, pasirerepdepmui Aku!”

²⁵ Kisedda leu et alanangan pulokat lepat koman, kuanangan, “Pulokat nene pakerekat baga sibau ka logauku te; galai kam nene pasirerepdepmui aku senen nulo kam nia.”

²⁶ Aipoi senen nukom kam roti nene samba nulo kam ka pulokat nene, kamateiat Tuhan le nupopoiliat kam teret oi nia.

²⁷ Kasei masikom roti ele masilo ka pulokat Tuhan ka enungan sitaimateu, bailiu masele le nia ka tubu samba logau Tuhan.

²⁸ Ia te lulunia senen sirimanua kau le ilelekngake galai tubunia boiki, ia pei komnangan roti samba lonangan ka pulokat.

²⁹ Aipoi sipasikokom samba sipasilolo sitaipuletsei tubut Tuhan, masibaraake ukum ka tubunia le ikokom samba ilolo nia.

³⁰ Ia te lulunia maigi ka talagamui simasaggo samba simabesi samba ta magulai simamatei.

³¹ Ke talelekngake tubuta ta leu tuukumake sita.

³² Tapoi ke iorak sita ukum sibara kai Tuhan, masikiroi sita le, bule ta tuukum sita pasamba polak nene.

³³ Kalulut nene sasarainangku, ke paruru kam mukom, pangena kam pasasambamui.

³⁴ Ke ai simalaje, kau ipukom boiki ka lalepnia, bui sikau kam tuukum parururumui. Bagei geti, amoian geti aku kolouakekungan nia ka kam.