1Kor. 10 - BUKO SIPUNENAN

Joda tai Israel sibailiu nganturat

¹ Koba le nuagai kam nia sasaraina, taikebbukatta siburu aikunemi sia tanairusa samba sangamberida masitalipoki koat.

² Ibailiu sia sipasitutut si Mose sangamberida aturauan ka bagat tanairusa samba ka bagat koat.

³ Sangamberida mukom kan puketsanan simakere

⁴ samba sangamberida mulo lo puketsanan simakere, aipoi sangamberida mulo ka bukku bulak puketsanan sipasitutut sia; bukku bulak nenda ia te Kristus.

⁵ Tapoi kenanen kisedda maigi ka talagada taioobaket Taikamanua, ia te lulunia aramasubu ka simatangeu.

⁶ Sangamberinia nene sibailiu itcoket ka sita, masiparepdep sita, bui taoba masigalai sikatai kele sigalaira.

⁷ Samba bui leu ibailiu sita sibuluji buluat kele piga pa ka talagada, kele sitususurat, “Kuddu sia bangsa nene mukom samba mulo; lepa suru sia muturu.”

⁸ Bui tagalai puuumun, kele sigalaira piga pa ka talagada, bailiu matei sia ka bagat sangagogoi rua pulu telu ribu sirimanua.

⁹ Samba bui tasibo si Tuhan, kele sigalaira piga pa ka talagada, bailiu matei sia ipapilaji ulou.

¹⁰ Samba bui nupungungu kam, kele sigalaira piga pa ka talagada, bailiu isubuake sia malaika sipasilalango.

¹¹ Sangamberinia nene muaili ka tubuda sibailiu itcoket samba tusuratnake sibailiu repdemen ka sita sipuririmanua kineneiget ka bagat tetere aiailingan kalepakat polak.

¹² Oto kasei ipaatu amaronan ipurio, kau ipagaba tubunia bui ibele.

¹³ Pasisiboat siorikmui, pasisiboat simareirei le, sitaisaliu ron sirimanua. Katoneman poi Taikamanua, ta ioobaake itusibo kam sisaliu ronmui. Ka teteret tusibo kam iaake enungan kabelaiat, oinangan nuom kam nia.

¹⁴ Oto sasaraina kilibet bagaku, kaddiuake kam pasibubuluji buluat!

¹⁵ Ka kam simaagai paatuat le kupaninibo. Paatu le kam sikuaku nene!

¹⁶ Loketta ka pukoman sipunenen, suraakenenta nenda, ta pa patabbaratta ka logau Kristus? Samba roti paabboketta, ta pa patabbaratta ka tubut Kristus?

¹⁷ Kalulut roti sara le, sita leu kenanen maigi sita, sara tubu le, aipoi sangamberita masisilo rubeiat ka bagat sara roti.

¹⁸ Itco le kam bangsa Israel siripot akkula. Sia sipasikokom sibuluakenen, ta pa amusarangan sia ka kudduat pasibuluat?

¹⁹ Apa katukolobatnia sikuaku nene? Sibuluakenen nenda ai pa kuanennia? Ele buluat ai pa kuanennia?

²⁰ Ta nia. Nene le: Sibuluakenenda ka sanitu le arabuluake nia, ta ka Taikamanua. Ta koba nupagalu kam tubumui ka sanitu.

²¹ Ta momoi nulo kam ka pulokat Tuhan samba ka pulokat sanitu. Ta momoi nupurubeiat kam ka pukoman sipunenan Tuhan samba ka pukoman sanitu.

²² Ele taoba pa tangoingoiake bagat Tuhan? Sita pei le pa maron ka Taikamanua?

²³ “Sangamberinia le momoi.” Aisesengan, tapoi ta sangamberinia ai kauta nia. “Sangamberinia le momoi.” Aisesengan, tapoi ta sangamberinia masipaeru.

²⁴ Bui bara kasei pa masipasikeli sarat uktuk tubunia, tapoi kau leu ipasikeli uktukda sabagei.

²⁵ Sangamberi sinakiakenen ka pasakiat, kom kam, ta leu tupaatu apa pa kalulut agai baga.

²⁶ Aipoi: “Polak nene samba sangamberi ka bagania si Tuhan le sibakkatnia.”

²⁷ Ke rarauma kam sitaimatonem baga, samba nusilo kam pasogaiatda, apa sinattatnakenenda ka matamui kom kam, ta leu tupaatu apa pa kalulut agai baga.

²⁸ Tapoi ke ai sipasikukua ka matamui: “Akkula nene atubuluakean ka buluat!” Bui nukom kam nia, nia le poi amasikua ka matamui samba kalulut agai baga.

²⁹ Agai baga sikuaku nene ta te agai bagam saram, tapoi agai bagada sabagei. Ele ai pa sipasikukua, “Angoi iteuake agai bagada sabagei puujaatku?

³⁰ Ke akusuraakean nenda sikopku, apa lulu rakua sikatai ka tubuku, kalulut komen sisuraakenenku?”

³¹ Oto ke mukom ele mulo ekeu, ele apa pa nugalai, sangamberinia galaiake sibailiu katulatsanan Taikamanua.

³² Bui nubaraake kam kabelekat baga, ele ka tai Jahudi ele ka sabangsa bagei, ele ka sapaamian Taikamanua.

³³ Kele ke kaku kuangkaake bagada sangamberi sirimanua ka bagat sangamberinia, ta masibesiake puuktungan tubuku, tapoi uktukda sirimanua simigi le, bule rasese puaragat.