1Kor. 1 - BUKO SIPUNENAN

Salam ka paamian

¹ Sibara kai Paulus, sinogai bailiu apostel Kristus Jesus ka teu bagat Taikamanua, samba sibara kai Sostenes sarainanta,

² masiailiake paamian Taikamanua ka Korintus, sia sipuneni ka bagat Kristus Jesus, sioniakenen sipunenan sambada sangamberi sirimanua ka senen kudduat, sipasisosogai onin Tuhanta Jesus Kristus, Tuhanda samba Tuhanta.

³ Kiliu baga samba aban sibara ka Taikamanua, Ukkuita samba kai Tuhan Jesus Kristus masipaalei kam.

Pusurakat

⁴ Sarat kukua sura ka Taikamanuangku kalulut kam, kurepdep kiliu bagat Taikamanua sipanguruatnakenennia ka kam ka bagat Kristus Jesus.

⁵ Aipoi ka bagat Kristus, amakayongan kam ka bagat sangamberinia: ka sene ngamata tiboiet samba sene ngamata puaagai,

⁶ sedda te imatotoila pasimunengan pagalaiat Kristus bulat amaronan ka kam.

⁷ Taan te anai simagulai ka kam panguruat apa pa ka pangenaatmui katutoilakat Tuhanta Jesus Kristus.

⁸ Nia leu masiparoron kam teret kalepakatnia, bailiu kam malina ka gogoi kaoijanan Tuhanta Jesus Kristus.

⁹ Taikamanua, sipasisosogai kam ka pasambaat Togania Jesus Kristus Tuhanta, Taikamanua katoneman le.

Pasaraat ka bagat paamian

¹⁰ Tapoi kunganturu kam sasaraina ka onin Tuhanta Jesus Kristus, bule sisara tiboiet kam sangamberimui, bui ibara pasaraat ka kam, kau le imaron nupusara kam, sikere baga samba sikere paatuat.

¹¹ Arasegeake poi ka mataku tai Klo'e pagalaiat kam sasarainangku, kababarat pajoggolat ka talagamui.

¹² Nene le kukukua, aipoi senemui masikua, “Si Paulus le kutut kaku,” sabagei masikua, “Kaku si Apollos,” sabagei masikua, “Kaku si Kepas,” sabagei, “Kaku Kristus le kutut.”

¹³ Atuparubei pa Kristus? Atusiliktengaake pa si Paulus punu tubumui? Ele ka onin Paulus pa aiturau kam?

¹⁴ Sura le kukua, kalulut ta anai kam beri sara akurau, sarat si Krispus samba si Gayus le;

¹⁵ bailiu ta anai sipasikukua, ka oningku le aiturau kam.

¹⁶ Samba sia ka lalep Stefanus aku leu airau sia. Bagei geti taan kuagai, ele ai pa akurau.

¹⁷ Aipoi ta masirau aikoiniake aku Kristus, masipaarep Katuareman Simaeru le; beri nenda ta ka agai mutitiboat, bui ipusiboboi siliktengan Kristus.

Kristus ia te gege samba sikut paatuat Taikamanua

¹⁸ Aipoi katuareman pagalaiat siliktenga, putaiagaiat paatuat le ka sia sieei ka pulangokat, tapoi ka sia siarauakenen, ron Taikamanua le nia.

¹⁹ Atusuratnakean poi ka Surat Sipunenan, “Kupepeake le sikut paatuatda simasiku paatuat, samba puaagaira simaagai paatuat kutatataake le.”

²⁰ Kaipa sia simasiku paatuat? Kaipa sia siagaisurat? Kaipa sia sioba pajoggolo ka polak nene? Ta aibailiuakean Taikamanua pusikuat polak nene bailiu putaiagaiat paatuat?

²¹ Kalulut sikut paatuat Taikamanua, ta momoi raagai Taikamanua taikapolak ka sikut paatuatda, obanangan Taikamanua iarauake simatonem baga kalulut ngantoman Katuareman Simaeru addeakenenda taikapolak putaiagaiat paatuat.

²² Tai Jahudi masikiddi kerek, tai Grika masigaba sikut paatuat,

²³ kai geti Kristus siniliktengaakenen le kupaarep kai; sibailiu kabelekat baga ka tai Jahudi samba ka sabangsa bagei putaiagaiat paatuat.

²⁴ Tapoi ka sia sinogai geti, ele tai Jahudi, ele ta tai Jahudi, Kristus ia te ron samba sikut paatuat Taikamanua.

²⁵ Aipoi putaiagaiat paatuat Taikamanua ia pei le maron ka sikut paatuat sirimanua samba putataimaron Taikamanua, ia pei le maron ka sirimanua.

²⁶ Repdep le kam sasaraina, pagalaiat tubumui, ka teteret atusogai kam: siripot kirekat sirimanua ta maigi kam simasiku paatuat, ta maigi simagege, ta maigi siabeu tiboi tubu.

²⁷ Tapoi sitaimaagai paatuat ka polak nene le aipili Taikamanua masipakaila sia simasiku paatuat, samba sitaimaron ka polak nene aipili Taikamanua masipakaila simaron.

²⁸ Sigoiso tiboi tubu samba loloietda taikapolak ipili Taikamanua; bulatnia sitaiaaddeakenen ipili Taikamanua masiputata addeakenen,

²⁹ bui bara kasei pa siumunake tubuna ka matat Taikamanua.

³⁰ Sibara ka Taikamanua le poi aikau kam musara ka Kristus Jesus, sibailiu sikut paatuat ka sita, siparoipo, sipuneni samba sipasitetebui sita.

³¹ Bule kele sitususurat ka Surat Sipunenan, “Kasei masiumun tubu, kau ipasiumun tubu ka bagat Tuhan.”