1Joh. 5 - BUKO SIPUNENAN

Tonem baga masikalaake polak

¹ Senen sipasikakatonemi Jesus, ia te Kristus, siputututu mata sibara ka Taikamanua le nia; samba senen sipununtuki Ukkui sipasi tututuake, masipununtuki leu Toga sinuntuakenennia.

² Ka bagat nene le ituaagai nuntut bagata ka tatogat Taikamanua, ia te: ke tapununtuki baga Taikamanua samba tagalaiake surukatnia.

³ Nene le nuntut baga ka Taikamanua, ia te masireddet surukatnia. Samba surukatnia ta maoru,

⁴ aipoi senen siputututu mata sibara ka Taikamanua masikalaake polak; samba kamanangan sikalaake polak ia te tonem bagata.

⁵ Kasei poi sikalaake polak, le ta nia sikatonemi Jesus, iate Togat Taikamanua?

Pasimunengan pagalaiat Jesus Kristus Togat Taikamanua

⁶ Jesus Kristus nene ye siooi ka bagat oinan samba ka logau; ta sarat ka bagat oinan, tapoi ka oinan samba ka bagat logau. Samba sipasimunengake ia te Ketsat, aipoi Ketsat ia te pubulanan.

⁷ Aipoi ai telu sipasimumuneng:

⁸ Ketsat, oinan samba logau; samba telunia sara le.

⁹ Beringan pasimunengan sirimanua tasisilo; tapoi pasimunengan Taikamanua pei le maron. Aipoi kise te pasimunengan Taikamanua, masimunengake pagalaiat Togania.

¹⁰ Sipasikakatonemi Togat Taikamanua, aian pasimunengan nene ka paatuatnia. Sitaikatonemi Taikamanua, aikauan Taikamanua simaboko, aipoi ta matonem bagania ka pasimunengan Taikamanua pagalaiat Togania.

¹¹ Samba nene le pasimunengan: Aipanguruatnakean Taikamanua purimanuaiat sitaitatata ka sita, samba purimanuaiat nenda ai ka bagat Togania.

¹² Sipasibabakkati Toga, aibakkatingan purimanuaiat; sitaibakkati Toga, ta ibakkati purimanuaiat.

Pagalaiat purimanuaiat sitaitatata

¹³ ulunia kususuratnake sangamberinia nene ka kam, nuagai kam nia, kam simatonem baga ka onin Togat Taikamanua, anubakkatingan kam purimanuaiat sitaitatata.

¹⁴ Nene te emen bagata ka Taikamanua, iaarepi panindogatta ke tatiddou apa pa ka tubunia siripot teu bagania.

¹⁵ Samba ke taagai iaarepi apa pa sinindouta, agaitangan leu, atasiloan sangamberi sinindouta ka tubunia.

¹⁶ Ke ai kasei pa sipasiitco sarainania mugalai jo, ia te jo sitaibaraake kamateiat, kau itiddouake nia ka Taikamanua, samba ikakau Taikamanua ka sia purimanuaiat, ia te sigalaijo sitaibaraake kamateiat. Ai jo sibaraake kamateiat; ta pagalaiat jo nenda kukukua ipanindou.

¹⁷ Sangamberi galajet sikatai ia te jo, tapoi ai jo sitaibaraake kamateiat.

¹⁸ Taagai kam, senen sinuntuakenen sibara ka Taikamanua, ta igagalai jo, aijajago poi nia Togat Taikamanua, samba ta ipagegeugeu nia Sijo.

¹⁹ Taagai kam, senen sinuntuakenen sibara ka Taikamanua, ta igagalai jo, aijajago poi nia Togat Taikamanua, samba ta ipagegeugeu ai le ka paneineiat Sijo.

²⁰ Tapoi taagai kam, amoian Togat Taikamanua samba aiakean puaagai paatuat ka sita, bule taagai kam Taikamanua sibulatnia; samba ai le sita ka bagat Taikamanua sibulatnia, ka bagat Togatnia Jesus Kristus. Taikamanua sibulatnia le nia samba purimanuaiat sitaitatata.

²¹ Ale tatogaku, jago kam tubumui ka buluat.