1Joh. 4 - BUKO SIPUNENAN

Ketsat Taikamanua samba ketsat sipasipepe

¹ Sasaraina kilibet baga, bui nukaonemi kam senen ketsat, tapoi sibo le kam paketsatketsat, ele sibara ka Taikamanua pa; aipoi amaigingan nabi sipatataju muottou mei ka sangalio polak.

² Kise le nuaagai kam ketsat sibara ka Taikamanua: Senen ketsat simunengake Jesus Kristus amoian nia ka pusisirimanua, ia te ketsat sibara ka Taikamanua.

³ Samba senen ketsat sitaimunengake Jesus, ta sibara ka Taikamanua. Ketsat nenda ketsat saggak Kristus le samba pagalaiat nia anuarepman kam kaooinia, samba kineneiget amoian nia ka polak nene.

⁴ Kam geti sibara ka Taikamanua le, samba anukalaakean kam nabi sipatataju; aipoi Ketsat sikuddu ka bagamui pei le abeu ka ketsat sikuddu ka polak.

⁵ Sibara ka polak le sia; ia te lulunia pagalaiat sibabara ka polak le ratitiboi, samba taikapolak raoba masiarepi sia.

⁶ Sita geti sibara ka Taikamanua le; sipasiaagai Taikamanua, iaarepi sita, sitaibara ka Taikamanua geti ia iaarepi sita. Kisedda te ituaagai Ketsat Taikamanua samba ketsat sipasipepe.

Nuntut baga le Taikamanua

⁷ Sasaraina kilibet baga, kau tapanuntu baga pasasambata, aipoi nuntut baga sibara ka Taikamanua le; samba senen sipunununtu baga, siputututu mata sibara ka Ukkui le samba iagai Taikamanua.

⁸ Sitaimanuntu baga, ta iagai Taikamanua, aipoi nuntut baga le Taikamanua.

⁹ Ka bagat nene le imatotoila nuntut bagat Taikamanua ka sita, ia te kokoiniakena Togania sisasara Taikamanua ka polak, bule tapurimanua kalulut nia.

¹⁰ Ne le nuntut baga: Ta sita amasipununtuki baga Taikamanua, Taikamanua le amasipununtuki sita baga, samba aikoiniake Togania pasiaban ka jota.

¹¹ Sasaraina kilibet baga, ke kise nuntut bagat Taikamanua ka sita, sita leu mateu panuntu baga pasasambata.

¹² Beri pei sara sipasiitco Taikamanua. Ke panuntu sita baga pasasambata, pukuddunangan Taikamanua ka bagata samba nuntut bagania sun ka bagata.

¹³ Ka bagat nene le taagai kukudduta ka bagat Taikamanua samba nia ka bagata, ia te: aiakean ka sita Ketsania.

¹⁴ Akuitcoan kai samba kumunengake kai kokoiniakena Ukkui Togania bailiu Sipaarau taikapolak.

¹⁵ Kasei simunengake, Jesus, ia te Togat Taikamanua, ka tubunia ipukuddu Taikamanua samba nia ka tubut Taikamanua.

¹⁶ Ataagaian samba atakatonemingan nuntut bagat Taikamanua ka sita. Nuntut baga le Taikamanua, kasei sipukukuddu ka nuntut baga, ka Taikamanua le aipukuddu samba Taikamanua mukuddu ka tubunia.

¹⁷ Itususutnake nuntut bagat Taikamanua ka bagata, bule tamaeme ka gogoi pasiukuman, aipoi kipa puririmanuan Kristus, kisedda leu leu sita ka polak nene.

¹⁸ Ka bagat nuntut baga ta anai loto; aipoi nuntut baga simasun masi tataake loto. Aipoi loto ai pei le ka bagat ukuman, samba kasei simaloto ta masun ka bagat nuntut baga.

¹⁹ Tapunununtu baga, kalulut Taikamanua le boiki amasipununtuki sita baga.

²⁰ Ke ai bai sipasikukua, “Manuntu bagaku ka Taikamanua,” tapoi malaga bagania ka sarainania, sipaboboko le nia. Aipoi sitaipununtuki baga sarainania siitconia, ta momoi ipununtuki baga Taikamanua taiitcoketnia.

²¹ Samba surukat sinilota sibara ka Kristus ia te: Sipununtuki baga Taikamanua, kau leu ipununtuki baga saraininania.