1Joh. 3 - BUKO SIPUNENAN

Tatogat Taikamanua

¹ Itco pei kam beunan nuntut baga sipanguruatnakenen Ukkui ka sita, amuoningan sita tatogat Taikamanua; kirenangan tatogat Taikamanua le sita. Ia te ta raaagai sita taikapolak, kalulut ta poi raagai Taikamanua.

² Sasaraina kilibet baga, tatogat Taikamanuangan te sita, taimatotoilana pei le kipa sita geti. Tapoi ataagaian, amatoilaan geti Kristus, makeretangan ka tubunia, bulat tubungangan poi taiitco.

³ Senen sipukakaronan kele nene ka Kristus, masipuneni tubunia, kele Kristus sipunenan.

⁴ Senen sigalai jo, sipasabau surukat leu et, aipoi jo, ia te pasipasasabau surukat.

⁵ Samba nuagai kam, aioi Kristus ia te masiposa sangamberi jo, samba ka tubunia ta anai jo.

⁶ Senen sirimanua simariuriu ka tubut Kristus, taan igagalai jo; senen sirimanua simariuriu mugalai jo, tapei aiitco samba aiagai Kristus.

⁷ Ale tatogaku, bui rapepeake kam kasei pa. Sigalaiake puroipoat, simaroipo te nia, makere kele Kristus simaroipo.

⁸ Simariuriu mugalai jo, sibara ka Sanitu le nia, aipoi Sanitu sigalai jo le, barania ka panandaatnia. Ia te aioi Togat Taikamanua, bule isubuake galajet Sanitu.

⁹ Senen siputututu mata sibara ka Taikamanua, taan igagalai jo; aipoi galai tubut Taikamanua aian ka tubunia samba ta momoi igalai jo, sinutuakenen Taikamanua poi nia.

¹⁰ Ka bagat nene le imatotoila putotogat Taikamanua samba putotogat Sanitu: Senen sitaigalaiake puroipoat, ta sibara ka Taikamanua, kisedda leu sitaimanuntu baga ka sarainania.

Nuntut baga ka sasaraina ia te toggaiat puririmanua sibau

¹¹ Aipoi nene le katuareman siarepmui ka panandaatnia: Buita panuntu sita baga.

¹² Bui kele si Kain sibara ka Sijo samba simateiake baginia. Samba apa lulu aimateiake nia? Aipoi sangamberi galajetnia sikatai le, galajet baginia geti maroipo.

¹³ Bui imakisei ka bagamui sasaraina, ke rapulagaki kam baga taikapolak.

¹⁴ Ataagaian, amutalipoan sita barata ka kamateiat mei ka purimanuaiat, kalulut punununtut bagata ka sarainanta. Sitaimanuntu baga, sarat ka kamateiatnan le nia.

¹⁵ Senen simalaga baga ka sarainania, simateiake sirimanua le nia. Samba nuagai kam, senen simateiake sirimanua, ta anai ka tubunia purimanuaiat sitaitatata.

¹⁶ Ka bagat nene te taagai kam nuntut baga: Kristus aibuluakean engania punu tubuta. Sita leu mateu tabuluake enganta punu tubuda sasarainanta.

¹⁷ Kasei simabibilet samba iitco sarainania simageba, tapoi iluplupmake le paatuatnia ka sarainania nenda, kipa te iooi ikuddu nuntut bagat Taikamanua ka tubunia?

¹⁸ Ale tatogaku, bui sarat ka nganga ele ka lila tapununtu baga, kau le itugalaiake samba ka bagat pubulanan.

Emen baga ka Taikamanua

¹⁹ Kisedda te taaagai nia sibara ka pubulanan le sita, bailiu pasanangtangan paatuatta ka matat Taikamnua,

²⁰ aipoi ke inganduake sita paatuatta, Taikamanua abeu ka paatuatta, samba iagai sangamberinia.

²¹ Sasaraina kilibet baga, ke taan inganduake sita paatuatta, maemenangan bagata masilegeri Taikamanua,

²² samba apa le tatiddou samba apa le tatiddou, tasisilo sibara ka tubunia, kalulut tareddet surukatnia samba tagalaiake obaket bagania.

²³ Samba nene le surukatnia: bule imatonem bagata ka onin Togania, Jesus Kristus samba panuntu sita baga pasasambata kele sitoneakenen Kristus ka sita.

²⁴ Samba sipasirereddet surukatnia ka Taikamanua le ikuddu samba Taikamanua mukuddu ka tubunia. Samba kisedda te taaagai nia pukukuddut Taikamanua ka tubuta ia te kalulut Ketsat sipanguruatnakenennia ka sita.