Zekariya 9 - Mawu a Mulluku

Weeruziwa wa adani a Ayuda

¹ Alla tti mawu oovenyera wa Apwiya oohumullulla ellapo ya Hadraki ni muzinda wa Damasiko. Khe mallokove a Israele eri ayiwa komattho

² Hamati, muzinda oyo ori m'malireni ni Hadraki, mizinda dda Tiro ni Sidoni naari athwiiwa eri eezeru ddinchichi.

³ Tiro ohiimakella yeekha mpanda woollipa ni wiitthukumanihella siliva wonanko nthupi navettho golide wonanko matokwi a m'musewuni.

⁴ Koma ngoonani, Apwiya eneeromwaakha erive ello ariiyena. Eneeromuvokhella mu enyanja nave olliye aneeroshellella ni munllo.

⁵ Muzinda wa Ashikeloni oneerewoona ddenndda nave oneerewoova. Nayeenettho Gaza aneerotthukumella wunchichi, emoddamoddave yeeyo Ekeroni ekaamba yawi etiyerellwaaye eneerotathiya. Gaza khakhallanattho ni mwene nave o Ashikeloni khokhallattho athu.

⁶ Athu oottakanyihereya mitundu sika enaakhalle o Ashidodi. Apwiya enallota wi, “Kineerewoononga wiitukhulla wa Afilisti.

⁷ Khewa echattho enama yanikhame apaalle erive yoocha yoohaakhullelliwa. Oohalla attheene enaakhalle athwaaka nave enaakhalle wonanko a nlloko na Yuda. Aekeroni enaakhallettho mmodda mwa athwaaka wonanko yeerelle Ayebusi.

⁸ Sika kineeroyiteteza ellapwaaka wi ahiphwanyeye ooviramo apaalle oovollowamo. Kheyiivo adani enaawore waanyingallella vawi mi sika kinapwatha ddenndda.”

Mwene amuhoollo

⁹ Nyu athu a o Ziyoni, hakallallani wunchichi! Nyu athu a o Yerusalemu, thapellani! Ngoonani, mwenaanyu animawa wa nyuwaano! Anawa ari oopambana ni oogonjiha koma awiiyeviha ni oomuwella bulu, mwananankhoro a bulu.

¹⁰ Apwiya enallota wi, “Kinerewaavenyihawo magareta akhoto o Efuremu, kineerewaakusawo akavalo o Yerusalemu, miira ddakhoto ddineerokotholliwa. Mwenaawo eneerokeraatthiha murendelle variyari va mitundu dda athu. Aneerekolamulella ovenyera o enyanja emodda ophiya o enyanja emodda, ovenyerattho o muhinje wa Yufurate ophiya o makomello a ellapo yavatthi.”

Ohokollowa wa athu a Apwiya

¹¹ Apwiya enallota wi, “Ekaamba ya echipanganwaaka ni nyuwaano eyo yallipihiwe ni nikhame na mikutho, kineerewaakhumiha mu nlliti noohikhalla ni maaddi athwaanyu ayo erive wuukaporoni.

¹² Nyu akaporo eetiyerello, hokollowani, hokollweellani o mpandaanyu woollipa. Kinasimikiza ollello wuuhokollosellani ddaphaama ddinchichi va nnddo mwaakhiweenyu.

¹³ Kineeromukunga Yuda wonanko muura wa akhoto, Efuremu sika anaakhalle mpaambiiwa. We Ziyoni, kineerewaakusa anaawo, wi ellipane ni anaawo, we Grisi, wonanko nsupada na akhoto amasiva.”

¹⁴ Vano Apwiya eneerowooneyella athwiiwa, eneerovokha miira ddiwa wonanko ettari. Apwiya Mulluku Amasiva Mattheene eneerewoopa nipallapata, eneereweeta mu namangalle oomwera.

¹⁵ Apwiya Amasiva Mattheene eneerowaakiha, alliwa eneerewaapambana ni waagonjiha adaniiwa vawaavokhani malluku, eneerowirya nikhame na adaniiwa nngu ekhuwaka wonanko emuvonille vinyo. Nikhamenno nineereweetellella wonanko na mukutho, nawiithellelliwa ni kapu va nikuwa.

¹⁶ Nllapo nenno Apwiya Mullukwiiwa eneerewaavullusa, vawi athwiiwaayo tti wonanko enkhosa. Mwiillaponi mwiwa athwaayo eneeronyezimella wonanko malluku oowallamella mutengo va enduwira yoomwene.

¹⁷ Ellapweeyo enaakhalle yooreeresesa, tirigu aneerewaallipiha asombwe, vinyo musha anerewaareeriha anamwalli.