Zekariya 8 - Mawu a Mulluku

Apwiya enalonjeza omumakattho Yerusalemu

¹ Mawu a Apwiya Amasiva Mattheene yaawa wa miyaano wi,

² “Mi Apwiya Amasiva Mattheene kinallota wi murimaaka muttheene ori va Ziyoni, kinnamukondesesa wunchichi nave ekaamba ya ehache owallaaka oneerewaamorella adanaaye.

³ Mi Apwiya Amasiva Mattheene kineerohokollweella o Ziyoni nave kinaakhalleke o Yerusalemu, muzindaaka waweella. Sika Yerusalemu aneeroromolliwa Muzinda Woororomelleya. Mwaango wa mi Apwiya Amasiva Mattheene oneeroromolliwa Mwaango Waweella.

⁴ Allopwana ni atthiyana awuulluvalla, aweeta ni mutooto ekaamba yawuulluvalla, eneereweetattho mu misewu dda mu Yerusalemu. Mi Apwiya Amasiva Mattheene koollota.

⁵ M'misewuni muneeroddalla anamwani aallopwana ni aatthiyana ettheellaka.”

⁶ Apwiya Amasiva Mattheene enallota wi, “Naari ddooneyaka wonanko ddoohiworeya wa athu a ellapo yeella ayo ehanlle, ethiyo ddenndda ttuukhalla ddoohiworeya ni miyaano?

⁷ Mi Apwiya Amasiva Mattheene kineerewaavullusa athwaaka ayo eri wookhuma nndduwa ni woovollowa nndduwa.

⁸ Kineerewaahokollosa wi yakhallettho o Yerusalemu. Sika eneerokhalla athwaaka nave kineerokhalla Mullukwiiwa, moororomelleya ni moolungama.”

⁹ Apwiya Amasiva Mattheene enallota wi, “Khallani amasiva. Vano munniiwa mawu a anamallotella ayo yallotiiwa va enthawi yookeraatthiha matthipello a enyumba ya Apwiya Amasiva Mattheene wi emakiwettho.

¹⁰ Vawi ehinaphiye enthawi yeeyo khevaari ollivella wa muthu apaalle enama. Khevaari muthu aweeta mwamurendelle ekaamba ya adani vawi athu attheene kaawoopaniha miru mmodda ni mukhwaaye.

¹¹ Koma vano athu oohalla ngiweerella moollikana ni mmo kaaweerelleemi athu khalle. Mi Apwiya Amasiva Mattheene koollota.

¹² Eneerekomidda mwamurendelle, mpesa oneerewimma ezipaso, ethaya eneerekewimmiha wunchichi nave oddullu khowumma. Madaliso mattheenaalla kineerewaavelleella wa oohalla mwa athu.

¹³ Nyu mabanja a Yuda ni Israele, khalle mwaari echizindikiro ya matembelelo variyari va mitundu ddimodda dda athu. Koma vano kineerewuuvullusani wi mukhalle echizindikiro ya madaliso. Muhoove, llipani murima.”

¹⁴ Apwiya Amasiva Mattheene eni, “Valle kaasimikiza wi kiwoonongeni ekaamba yawi makhollwaanyu yaakishiha murima nave Ngaapanlle waamorella ethakaraka.

¹⁵ Koma vano koosintha maganizo koosimikiza wi kimweerelle ddaphaama Yerusalemu ni nibanja na Yuda. Sika muhoove!

¹⁶ Ddoopaalleya weera tti ddawi arive muthu alloteke ddawoona ni mukhwaaye. Mweeruzeke mwawoona ni mwamurendelle m'mathatoni mwanyu.

¹⁷ Muhiganizeraneke ddoonanara m'murimani mwanyu mmodda ni mukhwaaye nave muhikondeke ollupella mwawoottha vawi mi Apwiya Amasiva Mattheene kinniitanana ddenndda.”

¹⁸ Mawu a Apwiya Amasiva Mattheene yaawa wa miyaano wi,

¹⁹ “Ohalla ocha* wa mweeri waneesese, waneetthanu, waneetthanu ni piilli ni waneekhumi onaakhalle ohakallalla ni othapella o nibanja na Yuda. Mukondeke ddawoona ni murendelle.”

²⁰ Apwiya Amasiva Mattheene enallota wi, “Enthawi ya owa wa athu oovenyera o mizinda ddinchichi eneerokwakhwana.

²¹ Athu a muzinda mmodda eneeroya wa a athu muzinda mmodda ni ollota wi, ‘Hankoni naallapelle Apwiya Amasiva Mattheene ni waaveka wi enidalise. Hiyaanottho ninaya wenko!’

²² Athu anchichi ni mitundu ddimodda ddamasiva eneerewaallapella Apwiya Amasiva Mattheene o Yerusalemu ni waaveka wi yaadalise.

²³ Va mallapo yaayo athu khumi oovenyera o mitundu dda athu ddoohiyanahiyana eneeromuwanddeellella Muyuda ni ollota wi, ‘Nithaananena kaambiiwa nohiiwa wi Mulluku ari ni nyuwaano.’ ”