Zekariya 7 - Mawu a Mulluku

Ohalla ocha wawoottha

¹ Va nllapo naneesese na mweeri waneetthanu ni sese, mweeri wa Kisilevi, muyakha waneesese wa omwene wa Dariusi, mawu a Apwiya yaawa wa Zekariya.

² Athu a o Beteli yaari emurumalle Sharezere ni Regemumeleki vamodda ni athwiiwa wi yaveke echifundo wa Apwiya.

³ Yapaallattho wi yaakohe allupa mukutho a o enyumba ya Apwiya Amasiva Mattheene ni anamallotella wi, “Ethiyo hiyaano ninlleke ni ohalla ocha* va mweeri waneetthanu wonanko mmo neerelleehu wa miyakha ddinchichi?”

⁴ Vano mawu a Apwiya Amasiva Mattheene yaawa wa miyaano wi,

⁵ “Alleelle athu attheene a mwiillaponi ni allupa mukutho wi mwahalleenyu ocha ni winlla va mweeri waneesese ni va mweeri waneetthanu ni piilli wa miyakha 70, khamweera ekaamba ya miyaano.

⁶ Mwacheenyu ni owirya, mwiihakallalliha nyookha.”

⁷ Alla tti mawu yallotille Apwiya oweella mwa anamallotella akhalle valle Yerusalemu aatilleeye ni athu nave aariiye va murendelle vamodda ni mizinda ddimodda ddawaapheella o ezigawo dda omwera ni o ntapo.

Ohiiwellella onnawiiha okaporo

⁸ Mawu a Apwiya yaawattho wa Zekariya wi,

⁹ “Mi Apwiya Amasiva Mattheene kinallota wi, ‘Mweeruzaneke moolungama, mumorellaneke ethakaraka ni weerellana echifundo.

¹⁰ Muhaahooseke anaamukhwelle ni akhwaadduni, alleto apaalle oohoowa navettho omuganizera ddoonanara mukhwiinyu.’

¹¹ “Koma alliwa yaakhoota waapella maaru, yaakireya etulli ni yaatiyella maarwiiwa wi ehiiwe.

¹² Yahummiha mirima ddiwa wunchichi wi ehiiwe malamulo ni mawu ayo mi Apwiya Amasiva Mattheene kaahuddihalleemi ni munepaaka oweella mwa anamallotella akhalle. Ekaamba ya yeella mi Apwiya Amasiva Mattheene kahaananariwella wunchichi.

¹³ Vawi kheyaakaapenlle maaru kawiithanilleemi, miyaanottho ngaawaapenlle maaru yakiithaniiwa. Mi Apwiya Amasiva Mattheene koollota

¹⁴ Kahaapallallesa wonanko namangalle variyari va athu a mitundu ddimodda nnddo yahiddidduwelliiwa. Sika ellapwiiwa yaatthattuwa echipululu ni ntepe mwawi khaavo naari mmodda eetamo.”