Zekariya 6 - Mawu a Mulluku

Masomphenya a magareta

¹ Mu masomphenya mamodda kahoona magareta masese ekhumaka variyari va miyaango miilli ddamukuwa.

² Nigareta nawaamba nakokiwa ni akavalo oofiira, naneepiilli ni akavalo ooripa,

³ naneeraru ni akavalo aweella nave naneesese ni akavalo amankhaanga oosiripa.

⁴ Vano kaamukoha mungelo olle allota ni miyaano wi, “Apwiya, ethiyo ddenndda ddinattaphullella tini?”

⁵ Olliye aakaakhulla wi, “Ddenndda ddinattaphullella ephevo ddisese ddoovenyera vamiitthoni va Apwiya a ellapo yavatthi ettheene.”

⁶ “Nigareta na akavalo ooripa ninaya ompoto, na akavalo aweella ninaya woovollowa nndduwa nave na akavalo amankhaanga oosiripa ninaya omwera.

⁷ Akavalo amasiva yaakhuma nave yaapaallesesa weeteeta mu ellapo yavatthi ettheene.” Olliye ahaalleella wi, “Khaweni mweetelle ellapo yavatthi.” Nave akavalwaayo yaaya waweetella ellapo yavatthi.

⁸ Vano mungelo aakilleella mookhuwa wi, “Ayo enaya o ellapo ya ompoto eneerokhurumusa munepaaka wenko.”

Enduwira ya Yoswa

⁹ Nave mawu a Apwiya yaawa wa miyaano wi,

¹⁰ “Waakhelle emphaso ovenyera wa Heledai, Tobiya ni Yedaya ayo ahihokollowille wuukaporoni o Babiloni. Nllapo nenno oye wa Yosiya mwaana a Zefaniya.

¹¹ Opange enduwira ovenyera o siliva ni golide onaamwaakheewe. Nave enduwireeyo omakelle omuruni wa mullupa mukutho muullupalli Yoswa mwaana a Yehozadaki.”

¹² Vano omulleelle wi, “Mi Apwiya Amasiva Mattheene kinallota wi muthu kamwaakeemoolle ooromolliwa Enthambi tti yoolla. Aneerophuwa ni wunnuwella ariiyemvo nave aneeromaka enyumbaaka.

¹³ Olliye sika anaamake enyumbaaka nave aneerovahiwa olemu woophwanella mwene. Vakhuviru ni mpandwaaye woomwene vineerokhalla mullupa mukutho nave eellaayo enaapharelleke mutteko nimodda mwamurendelle ni mwawiiwanana.

¹⁴ Enduwireeyo enaayisunge mu enyumbaaka wi ekhalle yawuupusella wa Heledai, Tobiya, Yedaya ni Yosiya mwaana a Zefaniya.”

¹⁵ Ddawoona, athu awoorekama eneeroowa wi emake enyumba ya Apwiya. Sika muneerodduwella wi Apwiya Amasiva Mattheene aakiruma wa nyuwaano. Ddenndda ddineereweereya nyuwaano mwaawiiwellellaka mwawaakuva Apwiya Mullukwaanyu.