Zekariya 5 - Mawu a Mulluku

Masomphenya a nibukhu noovava

¹ Mu masomphenya mamodda kahoona nibukhu noovava.

² Mungelo aakikoha wi, “Ethiyo onoona tini?” Kahaakhulla wi, “Nibukhu noovava, noorekama mamita matthanu ni masese nave nooramballalla mamita masese ni hafu.”

³ Sika aavirellella ollota wi, “Vaavo voolembiwa tembelelo nno ninaamorelle ellapo yavatthi ettheene. Arive mullupaawiiya aneerovenyihiwa mwiillaponi moollikana ni nnddo ddilembiwe embali emodda. Arive muthu oollupella mwawoottha olliyettho aneerovenyihiwa moollikana ni nnddo ddilembiwe embali emoddeella.

⁴ Apwiya Amasiva Mattheene eni, ‘Tembelelo nenno kineeronirumiha mpa mwa mullupaawiiya ni mpa mwa muthu oollupella mwawoottha vooromollani nnddina naka. Nineerokhalla mpammo ophiyera yoonongeyille ettheene, matabwiiwa ni mallukwiiweene.’ ”

Masomphenya a mutthiyana ari m'mutaangani

⁵ Vatulli viwa mungelo olle allota ni miyaano aahokollowattho allota wi, “Ngoona ello emodda enaweella.”

⁶ Kaakoha wi, “Vano ella tti tini?” Olliye aakaakhulla wi, “Olla tti mutaanga woolingella nave oniimellella machimo a ellapo ettheene.

⁷ Yookhuneellaniiwa yaari yamuthove nave ekhunuuwalle, kaamoona mutthiyana akeraatthille mwemmo.”

⁸ Mungelo aallota wi, “Mutthiyanoolla aniimellella onanara.” Sika aamukakhella mutthiyanoolle m'mutaangani nave ahokollosella yookhuneella yamuthove vaddullu viwa.

⁹ Kiwehillettho kaawoona atthiyana eelli ookhalla ni muuphello wonanko a nasekwa evavihiwaka ni ephevo. Nave yaavavellana mutaangoolle variyari va ellapo yavatthi ni oddullu.

¹⁰ Kaamukoha mungelo olle allota ni miyaano wi, “Ethiyo mutaangoolla enayaana wuuwi?” Olliye aakaakhulla wi,

¹¹ “Enayaana o ellapo ya Babiloni wi yawumakelle enyumba yamallapello. Enyumbeeyo yamalla, mutaangooyo onaahiyiwe mwemmo va nipuro nayiwanayiwa.”