Zekariya 4 - Mawu a Mulluku

Masomphenya a yoohiyavo enyali

¹ Mungelo olle allota ni miyaano aahokollowa akivenyiha wonanko muthu anavenyihiwa akonaka.

² Aakikoha wi, “Onoona tini?” Nave kahaakhulla wi, “Kinoona yoohiyavo enyali, ettheene yagolide ni embale vaddullu viwa. Eri ni enyali dditthanu ni piilli, erive enyali yoophovolliwa otthanu ni opiilli moovollochihamo matthupu.

³ Vakhwipi va yoohiyavo enyali viri miteekho miilli dda olivi, mmodda onnattanatta, mmodda wuunyotthoni.”

⁴ Vano kaamukoha mungelo allota ni miyaano wi, “Apwiya, vano ella tti tini?”

⁵ Aakikoha wi, “Ethiyo we khonadduwella?” Kahaakhulla wi, “Apwiya, ee, nginadduwella.”

⁶ Vano olliye aakilleella wi kimulleelle Zerubabele mawu a Apwiya awi, “Ddawoona, oneeropambana koma ohiri ni ekhoto apaalle ni masivaawo koma ni munepaaka. Mi Apwiya Amasiva Mattheene koollota.

⁷ Ethiyo we mwaango woorekama, wettho ttaani? Oneerotthattuwa nipuro noomwaramwareya vamiitthoni va Zerubabele. Nave yawaana nlluku noomalliha na va enyumbaaka, voonihiyani vaddullu, athu eneerokhuwa wi, ‘Oreera, oreera!’ ”

⁸ Mawu mamodda a Apwiya yaawa wa mi wi,

⁹ “Zerubabele aamaka matthipello a enyumba yeella ni mattaaye, aneeroyimalliha ni mattaaye yaayo. Vano muneerodduwella wi Apwiya Amasiva Mattheene sika ekirumalle.

¹⁰ Ethiyo ttaani avevullalle nllapo na ddeko dding'onong'ono? Athu yamoona Zerubabele akusalle nlluku noomallihanne m'mattani mwaye eneerohakallalla.” Mungelo aakilleella wi, “Enyali dditthanu ni piilli tti miittho a Apwiya ayo enawehaweha va ellapo yavatthi ettheene.”

¹¹ Vano kaamukoha mungelo wi, “Miteekho dda olivi ddiri onnattanattani ni wuunyotthoni wa yoohiyavo enyali ddinattaphullella tini?”

¹² Kaamukohattho wi, “Vakhwipi va mapaipi meelli agolide mooweella makhura vookhalla enthambi piilli dda olivi, ddenndda ddinattaphullella tini?”

¹³ Olliye aallota wi, “Ethiyo we khonadduwella?” Kahaakhulla wi, “Apwiya, ee nginadduwella.”

¹⁴ Sika aallota wi, “Alla tti athu eelli ayo Mulluku aatthoollilleeye ni waazoza wi emurumeyelle olliye, Apwiya a ellapo ettheene.”