Zekariya 3 - Mawu a Mulluku

Masomphenya a mullupa mukutho muullupalli

¹ M'masomphenya mamodda Apwiya yaakooniha mullupa mukutho muullupalli Yoswa iimenlle vamiitthoni va mungelo a Apwiya. Nave vakhuviru ni Yoswa vahiimella Satana, akhozekenlle omuhumullulla.

² Mungelo a Apwiya aamulleella Satana wi, “We Satana, ddawoona, Apwiya yuuhumullulle! Apwiya ayo yamutthoollille Yerusalemu yuuhumullullesese. Ethiyo muthu khari wonanko ekhuni yoothumulliwa viikho?”

³ Yoswa awarille ddoowara ddanihiryo iimenlleeye vamiitthoni va mungeloolle.

⁴ Vano mungelo ahaalleella akhwaaye oomuvelleella wi, “Murulleni ddoowara ddaye ddanihiryonnddo.” Vatulli viwa aamulleella Yoswa wi, “Ngoona kohuuvenyihella machimwaawo, vano kinuuwarihe ddoowara ddooreera.”

⁵ Mungelo ahaalleella oomuvelleellaalle wi, “Muwariheni enduwira yooreera.” Sika yaamuwariha enduwira yooreera vamuru, emuwarittho ddoowara ddanaanweene mungelo a Apwiya iimenlle vaavo.

⁶ Vano mungelo a Apwiya aamulleella Yoswa wi,

⁷ “Apwiya Amasiva Mattheene eni, ‘Mwathwara ettilla ddaka ni wiiwellella malamulwaaka, muneerolamulella mu enyumbaaka nave muneerowehera mathatwaaka. Navettho kineerowaakhullellani wi mukhalle vamodda ni alla yiimenlle vamiitthoni vaka.

⁸ We Yoswa, mullupa mukutho muullupalli, iwa! Nyu allupa mukutho akhwaaye, echizindikiro ya ddaphaama ddineereye, iwani! Kineerowaana oorumeyellaaka ooromolliwa Enthambi.

⁹ Vano ngoona nlluku nna kihiyalleemi vamiitthoni va Yoswa, nlluku nimodda na embali dditthanu ni piilli. Mwaneenaaka kineerogobavo mawu. Kineerovenyihavo machimo a ellapweella nllapo nimodda.

¹⁰ Nllapo nenno attheenenyu muneerewiithanihana wi mwahakallallelle murendellaanyu, arive muthu ari va muteekhwaaye wampesa ni wanamukuyu. Mi Apwiya Amasiva Mattheene koollota.’ ”