Zekariya 2 - Mawu a Mulluku

Masomphenya a mukwe woolingella

¹ Mu masomphenya mamodda kaamoona muthu aphareelle mukwe woolingella.

² Kaakoha wi, “Onaya wuuwi?” Olliye aakaakhulla wi, “Kinaya kamulinge Yerusalemu wi koone orekama ni oramballalla waye.”

³ Vano mungelo olle allota ni miyaano aakhuma nave mungelo mmodda aawa aakumanana.

⁴ Awaamboolle aallota ni mukhwaaye wi, “Akuva, mulleelle musombwe akusalle mukwe woolingella wi muneerokhalla athu anchichi ni eziweto ddinchichi mu Yerusalemu mwawi khavipaalleya omaka mpanda.”

⁵ Mi Apwiya kinallota wi, “Kineerokhalla mpanda wamunllo waapheella muzindooyo nave kinaakhalle mwemmo ni ntitimiho naka nittheene.”

Wiithaniwa wi ehokollweelle owaniwa

⁶ Apwiya enallota wi, “Venyani, venyani! Thawani o ellapo ya ompoto. Valle kahuupallallesellani wonanko ephevo ddisese muddullu.

⁷ Nyu a o Ziyoni, nyu ookhalla variyari va a Babiloni, venyani, thawani!

⁸ Vawi arive muthu anuurontthani anaronttha m'mwiitthoni mwaka.” Sika Apwiya Amasiva Mattheene aakirumiha wi kaddilleelle mitundu dda athu nnddo ddawaakhille athwiiwa wi,

⁹ “Mi Apwiya kineerowuukutha athwaayo ni nnatta naka. Nave ayo yaari akaporwiiwa sika enaakhe eyuumiiwa.” Vano muneerodduwella wi Apwiya Amasiva Mattheene sika ekirumalle.

¹⁰ Apwiya enallota wi, “Nyu a o Ziyoni, ipani moohakallalla vawi kinimawa nave kinaakhalle variyari vanyu.

¹¹ Enthawi yeeyo athu anchichi eneeroowa wa mi Apwiya, muneerotthattuwa athwaaka nave kineerokhalla variyari vanyu.” Vano muneerodduwella wi Apwiya Amasiva Mattheene sika ekirumalle.

¹² Apwiya eneeromukusattho Yuda wi akhalle yoohallaniiwa mu ellapo yoopatuleya nave Yerusalemu akhalle muzindiiwa wa vamurimani.

¹³ Nyu athu attheene, erani ellapo tuu vamiitthoni va Apwiya ekaamba yawi aavenya ni okhuma o nipuroni niwa naweella.