Zekariya 14 - Mawu a Mulluku

Ddaweereya va nllapo na Apwiya

¹ Ngoonani, nllapo na Apwiya ninimawa mvo ddeko nnddo adanaawo yawaakhilliiwa enaaddikawaniiwa weyaano woonaka ni miitthwaawo.

² Apwiya eneerewaatthukumaniha athu a mitundu ddittheddene wi emuhelle ekhoto Yerusalemu. Eneerewaakha muzindooyo ni opwaramwasa enyumba ddittheddene nave atthiyana eneeropharelliwa. Hafu a athu a m'muzindanimmo eneeropharelliwa wuukaporoni koma oohalla attheene a m'muzindanimmo khevenyihiwamo.

³ Vatulli viwa Apwiya eneeroowa wi ewane ni adanaayo wonanko yeerelliiwa nllapo na ekhoto.

⁴ Nllapo nenno eneerewiimella va mwaango wa Olivi oyo ori wookhuma nndduwa wa Yerusalemu. Mwaangooyo oneerokawiwa veelli ni ntapo nuullupalli noovenyera wookhuma nndduwa ophiyera woovollowa nndduwa. Hafu a mwaangooyo anaasuselle ompoto nave hafu mmoddooyo omwera.

⁵ Nyuwaano muneerothawa vooweellani mu ntapo nenno na variyari va mwaango. Muneerothawa wonanko mwathawelleenyu enthawi ya echivomezi va enthawi ya Uziya mwene a o Yuda. Vatulli viwa Apwiya Mullukwaanyu eneeroowa vamodda ni aweelliiwa attheene.

⁶ Nllapo nenno khoriirya apaalle khokhalla nakhuttu.

⁷ Ninaakhalle nllapo noowala, khokhalla otthaana apaalle mahiiyu vawi naari misikuwa oneerekemawalave. Nllapo naweereya ddenndda Apwiya weekhiiwa sika enanidduwella.

⁸ Nllapo nenno maaddi ookumi eneerokhuma ovenyera o Yerusalemu. Hafu a maaddaayo eniithellelleke mu enyanja ya wookhuma nndduwa, hafu mmodda mu enyanja ya woovollowa nndduwa. Ddenndda ddineereyeke va enthawi yeellimwe navettho yooriirya.

⁹ Apwiya eneerokhalla mwene a ellapo yavatthi ettheene. Nllapo nenno Apwiya enaallapelliweke ni odduwelliwa ni athu attheene ni nnddina nimoddave.

¹⁰ Ellapo ettheene eneeromwaramwariwa phaama ovenyera o Geba ophiya o Rimoni, omwera wa Yerusalemu. Koma Yerusalemu aneerowellihiwa va nipuro naye ovenyera o mullako wa Benjamini ophiya o nipuro nko waari Mullako Wawaamba, ophiya o mullako wa Ekona navettho ovenyera o nttattha na Hananele ophiya o nipuro noovotella mpesa wa mwene.

¹¹ Athu eneerokhalla o Yerusalemu mwamurendelle vawi khewa yoopopihiwattho ni woonongiwa.

¹² Apwiya eneerorumiha ereta yawoopiha va mitundu dda athu nnddo ddamuhella ekhoto Yerusalemu. Ereteene enaakhalle yawuntiha mwiilli muthu eetaka, miittho eri munipuroni mwiwa navettho nllumi niri muwano.

¹³ Nllapo nenno Apwiya eneerowaapheelliha muru athu ni woova wunchichi ophiyera arive muthu aneeropharaana ni mukhwaaye ni waamba owana anayaayove.

¹⁴ Athu a o Yuda eneerowana ekhoto o Yerusalemu. Nave eyuuma ya athu a mitundu ddawaapheella eneeroyitthukumaniha vamodda monga golide ni siliva munchichi owaaka ddoowara ddinchichi.

¹⁵ Ereta yawoopiha eneerewaamorellattho akavalo, enyuru,* ekamira,* abulu vamodda ni enama ddittheddene ddookhalla o misasa ddakhoto.

¹⁶ Vatulli viwa athu attheene oohalla a mitundu nndde ddawana ni Yerusalemu eneerekowa vamuyakhani omullapella mwene Apwiya Amasiva Mattheene navettho eneerekeweera Ehakallallo Ya Misasa.

¹⁷ Mutundu mmodda wakhoota oyaawo wi wamullapelle mwene, Apwiya Amasiva Mattheene murimu kharupaka variyari viwa.

¹⁸ Athu a o Iguputo yakhoota oyaawo eneerollakiwattho moophwanaphwana ni mmo Apwiya enaallakelliiwa orive mutundu wa athu wookhoota oyaawo o Ehakallallo ya Misasa.

¹⁹ Nngu sika onaakhalle ollaka wa Aiguputo navettho orive mutundu wa athu wooheerana Ehakallallo ya Misasa.

²⁰ Nllapo nenno va mabelo oowara akavalo akhoto vineerolembiwa mawu awi, “Oopatulelliwa wa Apwiya.” Nave epalli dda o enyumba ya Apwiya ddinaakhalle ddoopatuleya wonanko embale dda vanikuwani.

²¹ Erive epalli ya o Yerusalemu ni o Yuda eneeropatulelliwa wa Apwiya Amasiva Mattheene. Attheene oovelleella mukutho o Yerusalemu eneerophariha mutteko epallinnddo vawaapeyani enama dda mukutho. Nllapo nenno khavooneyattho arive amalonda mu enyumba ya Apwiya Amasiva Mattheene.