Zekariya 13 - Mawu a Mulluku

Weellihiwa wa Yerusalemu

¹ Apwiya Amasiva Mattheene enallota wi, “Nllapo nenno nibanja na Davide vamodda ni athu a mu Yerusalemu eneerotuullelliwa neetuutu wi yeellihiwe o machimwiiwa ni ddoonanara ddiwa.

² Navettho nllapo nenno kineerewoononga manddina a mafano mwawi khewa yuupuwelleyattho. Kineerewaavenyihamottho mwiillaponi anamallotella vamodda ni munepa wooripiha. Mi Apwiya Amasiva Mattheene koollota.

³ Nave mmodda aphwanyeya oopaalla wi allotellekeve, attiitthinnya ni amennya oomuyara eneeromulleella wi, ‘Ohikhallettho ni okumi kaambiiwa onallota ddawoottha mu nnddina na Apwiya.’ Sika makhollwaaye eneeromuhoma olliye allotellaka.

⁴ “Nllapo nenno arive namallotella aneerowulliwa muru ni masomphenyiiwa. Khawa awarattho mukanjwaaye wamapururu wa anamallotella wi aallekekena athu.

⁵ “Munipuroni mwiwa anaallote wi, ‘Mi ngihiyo namallotella. Mi tti oollima nave kookhalla killimaka waambeella enamwanaaka.’

⁶ “Nave muthu mmodda amukoha wi, ‘Vano mapamba eri vamutthanani vawomva waarimeedde?’ Olliye aneerewaakhulla wi, ‘Tti dda makhwata ayo kaphoreyilleemi mpa mwa akhwaaka.’ ”

Lamulo nawi mbusa a Apwiya iiphiwe

⁷ Apwiya Amasiva Mattheene enallota wi, “We nsupada, venya, muwukile mbusaaka, mukhwaaka a vamurimani. Mukakathe mbusa nave enkhosa dda mulloko ddineeropallalleya. Kineeroddikakatha vamodda ni dding'onong'ono ddene.

⁸ Mwa athu araru eelli eneerewiiphiwa nave mmodda sika anaahalle ni okumi.

⁹ Athu ayo enaahalle ni okumi kineerewaahiya viikho ni oweelliha wonanko enamweellihelliiwa siliva. Kineerewaayeza wonanko eneerelliiwa ni golide. Sika eneerewiithana mu nnddina nave kineerowaakhulla. Kineerewaalleella wi alliwa tti athwaaka nave eneerewaakhullella wi mi Apwiya tti Mullukwiiwa.”