Zekariya 12 - Mawu a Mulluku

Yerusalemu muzinda woollapellawo athu attheene

¹ Alla sika mawu a Apwiya oollota dda Israele. Apwiya sika yaanddellenlle eddullu ni okeraatthiha ellapo yavatthi navettho yaphatusalle mpweya woovaha okumi. Alliwa eni,

² “Kineeromutthattusa Yerusalemu akhalle wonanko kapu a vinyo oyo anaalezelihe mitundu ddittheddene dda athu ddoomwaapheella. Yuda aneerohelliwattho ekhoto vamodda ni Yerusalemu.

³ Nllapo nenno kineeromutthattusa Yerusalemu nlluku noollemella wunchichi wa mitundu ddittheddene dda athu. Attheene enaaheye otukhulla nineerewaavoreya wunchichi nave mitundu ddittheddene dda va ellapo yavatthi ddineerotthukumana vamodda wi ddillipanena.

⁴ Nllapo nenno kineeromoopopiha mowaapheelliha muru arive kavalo nave oowellavo kineeromusavulla. Kineeroniwehera nibanja na Yuda koma akavalo attheene a adaniiwa kineerewaatthattusa oohoona.

⁵ Vaavo oohoollella a Yuda eneerollota m'murimani mwiwa wi, ‘Apwiya Mulluku Amasiva Mattheene ennaavaha masiva athwiiwa ookhalla mu Yerusalemu.’

⁶ “Nllapo nenno oohoollella a Yuda kineerewaatthattusa wonanko ninkhalla noottotthowa variyari va ekhuni, wonanko mutthiko wookhara variyari va mitolo dda tirigu. Eneerewoosa mitundu dda athu ddittheddene ddoowaapheella, onnattanatta ni wuunyotthoni koma athu a o Yerusalemu enaakhalleve mwamurendelle m'muzindani mwiwa.

⁷ “Apwiya enaambe ovullusa misasa dda Yuda wi eyuuma ettheene ya nibanja na Davide ni ya athu a o Yerusalemu ehikhwaranye ya Yuda.

⁸ Nllapo nenno Apwiya eneerewaateteza ookhalla o Yerusalemu mwawi athu oofooka wunchichi mwa alliwa enaakhalle amasiva wonanko Davide. Sika nibanja na Davide ninaakhalle noolamulella wonanko Mulluku, wonanko mungelo a Apwiya awaahoollella.

⁹ Nllapo nenno kineerewoononga athu mitundu ddittheddene ddoopaalla ohella ekhoto Yerusalemu.

¹⁰ “Vano athu a nibanja na Davide ni attheene a o Yerusalemu kineerewaakawella murima wooddalla ni echifundo ni woovekella. Sika yamuweha oyo yamuhomilliiwa, eneeromwinllella wunchichi wonanko enamwinllelliiwa mwaana akhalla mmoddave.

¹¹ Nllapo nenno oneerokhalla winlla maliro wuullupalli o Yerusalemu monga ddakhallelliiwa voomwinllellani Hadadirimoni mu ntapo na o Megido.

¹² Ellapo eneerewinlla, nirive nibanja vaweekhiiwa. Nibanja na Davide nininlle vaweekhiiwa nave awariyettho eninlle vaweekhiiwa. Nibanja na Natani nininlle vaweekhiiwa nave awariyettho eninlle vaweekhiiwa.

¹³ Nibanja na Levi nininlle vaweekhiiwa nave awariyettho eninlle vaweekhiiwa. Nibanja na Shimei nininlle vaweekhiiwa nave awariyettho eninlle vaweekhiiwa.

¹⁴ Mabanja mattheene oohalla eninlle vaweekhiiwa nave awariwattho eninlle vaweekhiiwa.”