Zekariya 11 - Mawu a Mulluku

Omora wa mamwene oonanara

¹ We Lebanoni, hulla millako ddawo wi munllo oshellellihe mikunguza ddawo.

² Nyu miteekho dda paini, inllani mookhuwa, vawi mikunguza ddookuhiwa, miteekho ddamasiva ddohoonongeya. Nyu mithundu dda o Bashani, inllani mookhuwa vawi otthako woophipa wohuuhiwa.

³ Iwani, abusattho eniminlla mookhuwa vawi munyepwiiwa waphaama wohoonongiwa. Iwani othuruma wa mikango vawi otthako wa o Yordani wohoonongiwa.

Abusa eelli

⁴ Apwiya Mullukwaaka yaakilleella wi, “Wehera phaama enkhosa nnddo ddinaya wawiiphiwa.

⁵ Ookulla enkhosa ennaddiipha koma khaavo anawiipa mullatu. Nave vookullihani enameeyo enallota wi, ‘Apwiya etitimiheye! Noophwanya eyuuma!’ Abusa khenamoriwa ethakaraka ni enkhosa.”

⁶ Apwiya enallota wi, “Sika ngiwa kimmorella ethakaraka arive muthu a va ellapo yavatthi. Kineeromvelleella arive muthu wa oohoollellaaye ni wa mwenaaye. Nave alliwaayo eneerotthollosa ellapo ettheene koma miyaano ngimuvullusa arive muthu m'mattani mwiwa.”

⁷ Vano kahaamba owehera enkhosa ddooya wawiiphiwanndde. Kaakusa ekopo piilli yawaamba kaayiromolla Echisomo nave yaneepiilli Mwiiwanano. Sika kaawuwehera phaama mulloko wa enkhosoolle.

⁸ Va mweeri mmodda kahaavenyihavo abusa araru ayo yaakishihalle murima ni wiitana ni miyaano mwawi ngaawonre waavillella.

⁹ Sika kaawulleella mulloko wa enkhosoolle wi, “Ngiwa kuuweheranittho. Oyo Oophwanella okhwa akhwe, oophwanella orimeella arimeelle nave oohallanyu muttakhunaneke.”

¹⁰ Vatulli viwa kaakusa ekopwaaka yooromolliwa Echisomo kiyinttaka wooniha otathilla echipangano eyo Apwiya yakeraatthihalliiwa ni mitundu ddittheddene dda athu.

¹¹ Sika echipanganweeyo yaamalla nllapo nenno nave ookulliha enkhosa ayo yakiwehesesa yaadduwella wi ddittheddene keereemi ddaari ddoovenyera wa Apwiya.

¹² Vano kaallota ni alliwaayo wi, “Dduuddivellani, kinnyeni mallivellwaaka. Koma ddaahuuddivellani, asungeni makobiraanyu.” Sika alliwa yaheerenga mallivellwaaka ookwakhwana makobiri a siliva 30.

¹³ Vano Apwiya yaakilleella wi, “Khawe waahiye moosungellamo eyuuma.” Sika kaakusa makobiri a siliva, mallivello kaakhenlleemaalle kaavokhella moosungellamo eyuuma ya mu enyumba ya Apwiya.

¹⁴ Vatulli viwa kaayinttakattho ekopo yaneepiilli yooromolliwa Mwiiwanano wooniha omalla wa obale variyari va Yuda ni Israele.

¹⁵ Vano Apwiya yaakilleella wi, “Kusattho ezipangizo dda mbusa oohikhalla ni mutteko.

¹⁶ Vawi kineeromukeraatthiha mbusa mwiillaponimmu, mbusa ahinapwatheke enkhosa ddoorimeella, ahinaashaasheke ddoohollowa apaalle ochiriha ddoorakalla ni ochiha ddookumi. Koma olliye anaakhallelleke ocha enama ya enkhosa ddooneneva ophiyera opwesa ni akokotokwiiwa.

¹⁷ “Otulli okhalle ni mbusa oohikhalla ni mutteko oyo anahiya enkhosa! Emukakathe ni nsupada va muwono ni va niittho naye na onnattanatta. Muwonwaaye onyaalle wunchichi nave niittho nayenno nikhalle noohoona wa enthawi yoohimalla.”